Maũndũ Marĩa Meekirũo nĩ Atũmwo 23:1-35
23 Nake Paulo akĩrora Sanhedrini akĩmeera: “Athuri aya, ariũ a baba, ndũire ndungatagĩra Ngai ndĩ na thamiri ĩtarĩ na ũcuke+ o na hanini nginya ũmũthĩ ũyũ.”
2 Nake Anania, mũthĩnjĩri-Ngai ũrĩa mũnene agĩatha arĩa maarũgamĩte hakuhĩ na Paulo mamũgũthe kanua.
3 Hĩndĩ ĩyo Paulo akĩmwĩra: “Wee rũthingo rũrũ rũhake rangi mwerũ, Ngai nĩ egũkũgũtha. Ũikarĩte thĩ hau ũnduĩre na Watho na no ũroina Watho ũcio na njĩra ya gwathana ngũthwo?”
4 Nao arĩa maarũgamĩte hau makĩmũũria: “Nĩ mũthĩnjĩri-Ngai ũrĩa mũnene ũraruma?”
5 Paulo akiuga: “Ariũ a baba, ndikũmenyaga atĩ nĩ mũthĩnjĩri-Ngai ũrĩa mũnene. Nĩ gũkorũo nĩ kwandĩkĩtwo atĩrĩ, ‘Ndũkanaarĩrie mũtongoria wa andũ anyu ũũru.’”+
6 Na rĩrĩ, Paulo amenya atĩ amwe ao maarĩ Asadukai na arĩa angĩ Afarisai, akĩanĩrĩra akiuga: “Athuri aya, ariũ a baba, niĩ ndĩ Mũfarisai,+ na ndĩ mũrũ wa Afarisai. Ndĩraciirithio nĩ ũndũ wa kĩĩrĩgĩrĩro gĩa kũriũkio kwa arĩa akuũ.”
7 Rĩrĩa ooigire ũguo, gũkĩgĩa ngarari gatagatĩ ka Afarisai na Asadukai, na andũ acio maagomanĩte makĩgayũkana.
8 Nĩ gũkorũo Asadukai moigaga atĩ gũtirĩ kũriũka, kana araika, o na kana roho, no Afarisai nĩ metĩkĩtie* maũndũ macio mothe.+
9 Nĩ ũndũ ũcio gũkiumĩra ngũĩ nene, na andĩki-watho amwe a kĩama kĩa Afarisai makĩrũgama makĩambĩrĩria gũkararania mũno makiugaga: “Gũtirĩ ũndũ mũũru tũrona harĩ mũndũ ũyũ, no angĩkorũo nĩ arĩirio nĩ roho kana nĩ mũraika+—.”
10 Na rĩrĩa ngarari icio ciaingĩhire mũno, mũtongoria wa mbũtũ agĩĩtigĩra nĩ kuona ta Paulo angĩgerũo ngero nĩo, agĩatha thigari cikũrũke ithiĩ imũhurie kuuma harĩ o na imũrehe thĩinĩ wa nyũmba cia thigari.
11 No ũtukũ ũrĩa warũmĩrĩire, Mwathani akĩmuumĩrĩra akĩmwĩra: “Gĩa na ũmĩrĩru!+ Nĩ gũkorũo o ta ũrĩa ũkoretwo ũkĩruta ũira wakwa kĩhinyio gũkũ Jerusalemu, noguo ũgwĩka nginya Roma.”+
12 Na rĩrĩa gwakĩire, Ayahudi acio makĩbanga njama na makĩĩyoha na kĩrumi, makiuga matikũrĩa kana manyue matoragĩte Paulo.
13 Acio maabangire njama ĩyo na makĩĩyoha na mwĩhĩtwa maarĩ arũme makĩria ma 40.
14 Arũme acio magĩthiĩ kũrĩ anene a athĩnjĩri-Ngai na athuri makĩmeera atĩrĩ: “Nĩ twĩyohete na kĩrumi* atĩ tũtikũrĩa kĩndũ o na kĩ o nginya rĩrĩa tũrĩũraga Paulo.
15 Nĩ ũndũ ũcio, inyuĩ hamwe na Sanhedrini-rĩ, ĩrai mũtongoria wa mbũtũ arehe Paulo mbere yanyu ta mũrenda gũthuthuria ciira wake makĩria. No atanakinya, ithuĩ tũgũkorũo twĩhaarĩirie kũmũũraga.”
16 No rĩrĩ, mwanake wa mwarĩ wa nyina na Paulo akĩigua njama ĩrĩa maathugundaga, akĩingĩra nyũmba cia thigari akĩmenyithia Paulo ũhoro ũcio.
17 Nake Paulo agĩta mũnene ũmwe wa mbũtũ akĩmwĩra atĩrĩ: “Twara mwanake ũyũ kũrĩ mũtongoria wa mbũtũ tondũ arĩ na ũndũ arenda kũmwĩra.”
18 Nĩ ũndũ ũcio akĩmũtwara kũrĩ mũtongoria wa mbũtũ akĩmwĩra: “Paulo ũrĩa muohe anjĩta anjĩra ndehe mwanake ũyũ kũrĩ wee tondũ arĩ na ũndũ arenda gũkwĩra.”
19 Mũtongoria wa mbũtũ akĩmũnyita guoko na akĩmũtwara keheri-inĩ akĩmũũria ũũ: “Ũrenda kũnjĩra atĩa?”
20 Nake akĩmwĩra: “Ayahudi maiguithanĩirie atĩ makũũrie ũgaaikũrũkia Paulo ũmũrehe mbere ya Sanhedrini rũciũ, ta marenda gũtuĩria ũhoro makĩria wĩgiĩ ciira wake.+
21 No ndũkareke makũiguithie, tondũ makĩria ma arũme 40 gatagatĩ-inĩ kao nĩ mehaarĩirie kũmuohia, na nĩ meyohete na kĩrumi* atĩ matikũrĩa kana manyue o nginya rĩrĩa marĩmũũraga;+ na rĩu nĩ mehaarĩirie, metereire wĩtĩkĩre ihoya rĩao.”
22 Nake mũtongoria ũcio wa mbũtũ akĩra mwanake ũcio athiĩ thutha wa kũmwatha ũũ: “Ndũkere mũndũ o na ũrĩkũ atĩ nĩ ũnjĩrĩte ũhoro ũcio.”
23 Agĩcoka agĩta anene erĩ a mbũtũ akĩmeera: “Haarĩriai thigari 200 na andũ 70 a gũtwarithia mbarathi na thigari 200 cia matimũ, mathiĩ Kaisarea ta thaa ithatũ cia ũtukũ.
24 Ningĩ mũhaarĩrie mbarathi cia gũkuua Paulo, mũmũtware kũrĩ Felike ũrĩa ngavana.”
25 Agĩcoka akĩandĩka marũa maya:
26 “Nĩ niĩ Kilaudio Lusia. Kũrĩ Felike, Ngavana Mũgaathe: Nĩ ndakũgeithia.
27 Mũndũ ũyũ aranyitĩtwo nĩ Ayahudi na mararĩ hakuhĩ kũmũũraga, no ndĩrathiĩ narua na thigari ciakwa ndĩramũthara+ tondũ nĩ ndĩramenyire nĩ Mũroma.+
28 Na tondũ nĩ ndĩrendaga kũmenya kĩrĩa kĩratũmĩte mamũthitange, ndĩramũikũrũkia ndĩramũtwara kũrĩ Sanhedrini yao.+
29 Ndĩrakora mamũthitangĩire maũndũ megiĩ Watho wao,+ no gũtirĩ ũndũ o na ũmwe athitangĩirũo ũngĩtũma atuĩrũo kũũragwo kana kuohwo njera.
30 Na tondũ nĩ ndĩramenyithirio njama ya kũũraga mũndũ ũcio,+ nĩkĩo ndatũmana o narua arehwo na ndathana arĩa mamũthitangĩte mamũthitange harĩ wee.”
31 Thigari icio igĩkĩoya Paulo+ o ta ũguo ciaathirũo na ikĩmũtwara Antipatiri ũtukũ.
32 Mũthenya ũrĩa warũmĩrĩire cigĩtĩkĩria atwarithia a mbarathi mathiĩ nake, ĩndĩ cio igĩcoka nyũmba-inĩ cia thigari.
33 Atwarithia acio a mbarathi magĩkinya Kaisarea na makĩnengera ngavana marũa na ningĩ makĩneana Paulo kũrĩ we.
34 Nake akĩmathoma agĩcoka akĩũria kũrĩa Paulo ooimĩte, na akĩmenya ooimĩte Kilikia.+
35 Akĩra Paulo atĩrĩ: “Nĩ ngaagũthikĩrĩria wega rĩrĩa arĩa magũthitangĩte magaakinya.”+ Agĩcoka agĩathana Paulo aikare arangĩirũo nyũmba-inĩ ya mũthamaki ya Herode.
