Atiirĩrĩri Bũrũri 10:1-18
10 Thutha wa Abimeleku, Tola mũrũ wa Pua, mũrũ wa Dodo, mũndũ wa kuuma mũhĩrĩga-inĩ wa Isakaru, akĩarahũka nĩguo ahonokie Isiraeli.+ Aaikaraga Shamiri gĩcigo-inĩ kĩrĩa kĩrĩ irĩma kĩa Efiraimu.
2 Aatiirĩrĩire Isiraeli mĩaka 23. Agĩcoka agĩkua na agĩthikwo Shamiri.
3 Thutha wake, Jairu Mũgileadi akĩarahũka na agĩtiirĩrĩra Isiraeli mĩaka 22.
4 Jairu aarĩ na ariũ 30 maakuuagwo nĩ ndigiri 30, na maarĩ na matũũra 30, marĩa metagwo Havothu-jairu+ nginyagia ũmũthĩ; makoragwo bũrũri-inĩ wa Gileadi.
5 Thutha ũcio Jairu agĩkua na agĩthikwo Kamonu.
6 O rĩngĩ Aisiraeli magĩka maũndũ moru maitho-inĩ ma Jehova,+ na makĩambĩrĩria gũtungatĩra ngai cia Baali,+ mĩhianano ya Ashitorethu, ngai cia Aramu,* ngai cia Sidoni, ngai cia Moabi,+ ngai cia Aamoni,+ na ngai cia Afilisti.+ Magĩtiganĩria Jehova na makĩaga kũmũtungatĩra.
7 Namo marakara ma Jehova makĩrĩrĩmbũkĩra Isiraeli, na akĩmendia moko-inĩ ma Afilisti na Aamoni.+
8 Magĩkĩhehenja Aisiraeli na makĩmahinyĩrĩria mũno mwaka ũcio—kwa ihinda rĩa mĩaka 18 makĩhinyĩrĩria Aisiraeli othe arĩa maarĩ mũrĩmo wa Jorodani kũrĩa kwarĩ bũrũri wa Aamori thĩinĩ wa Gileadi.
9 Ningĩ Aamoni nĩ maaringaga Jorodani magathiĩ gũtharĩkĩra Juda na Benjamini na nyũmba ya Efiraimu; andũ a Isiraeli magĩgĩtangĩka mũno.
10 Nao Aisiraeli magĩkaĩra Jehova amateithie,+ makiuga ũũ: “Nĩ tũkwĩhĩirie, nĩ gũkorũo nĩ tũtiganĩirie Ngai witũ na tũgatungatĩra ngai cia Baali.”+
11 No Jehova akĩra Aisiraeli atĩrĩ: “Na githĩ ndiamũhonokirie kuuma Misiri+ na kuuma kũrĩ Aamori,+ Aamoni, Afilisti,+
12 Asidoni, Amaleki, na Midiani rĩrĩa maamũhinyagĩrĩria? Rĩrĩa mwangaĩire nĩ ndamũhonokirie kuuma guoko-inĩ kwao.
13 No mũkĩndiganĩria na mũgĩtungatĩra ngai ingĩ.+ Nĩkĩo itekũmũhonokia rĩngĩ.+
14 Thiĩi kũrĩ ngai iria mũthuurĩte na mũcikaĩre imũteithie.+ Rekei imũhonokagie rĩrĩa mwagĩa na mĩtangĩko.”+
15 No Aisiraeli makĩra Jehova atĩrĩ: “Nĩ twĩhĩtie. Twĩke ũrĩa wothe ũkuona arĩ wega maitho-inĩ maku. Ĩndĩ twagũthaitha ũtũhonokie mũthenya ũyũ wa ũmũthĩ.”
16 Na makĩeheria ngai ng’eni kuuma gatagatĩ-inĩ kao na magĩtungatĩra Jehova,+ o nginya akĩremwo gũkirĩrĩria kuona andũ acio a Isiraeli makĩnyamarĩka.+
17 Thutha wa ihinda Aamoni+ makĩũngana hamwe, na makĩamba hema Gileadi. Nĩ ũndũ ũcio Aisiraeli magĩcokanĩrĩra na makĩamba hema Mizipa.
18 Andũ a Gileadi na anene a kuo makĩĩrana atĩrĩ: “Nũũ ũgũtũtongoria kũrũa na Aamoni?+ Nĩ atuĩke mũnene wa aikari othe a Gileadi.”
Tũũhoro twa magũrũ-inĩ
^ Kana “Siria.”
