Atiirĩrĩri Bũrũri 12:1-15
12 Na rĩrĩ, arũme a Efiraimu magĩtwo, na makĩringa magĩthiĩ Zafoni* na makĩra Jefitha ũũ: “Ũraregire gũtwĩta tũthiĩ nawe nĩkĩ rĩrĩa ũraringire gũthiĩ kũrũa na Aamoni?+ Tũgũcina nyũmba yaku ũhĩĩre kũu thĩinĩ.”
2 No Jefitha akĩmeera ũũ: “Niĩ na andũ akwa, tũrarĩ na ngucanio nene mũno na Aamoni. Na nĩ ndamwĩtire mũũke mũndeithie, ĩndĩ mũtiigana kũũhonokia kuuma guoko-inĩ kwao.
3 Rĩrĩa ndonire atĩ mũtikũũhonokia, ngĩtua itua rĩa kũingĩria muoyo wakwa ũgwati-inĩ na ngĩthiĩ kũrũa na Aamoni,+ na Jehova akĩmaneana guoko-inĩ gwakwa. Kwoguo-rĩ, nĩ kĩĩ gĩtũmĩte mũũke ũmũthĩ kũrũa na niĩ?”
4 Jefitha agĩgĩcokanĩrĩria arũme othe a Gileadi,+ na makĩrũa na Efiraimu; arũme a Gileadi magĩtooria Efiraimu, o we ũrĩa wameerĩte atĩrĩ: “Inyuĩ nĩ kũũra muorire kuuma Efiraimu, inyuĩ Agileadi arĩa mũrĩ Efiraimu na Manase.”
5 Arũme a Gileadi magĩtunyana iringĩro cia Jorodani+ mbere ya Efiraimu; na rĩrĩa arũme a Efiraimu maageragia gwĩthara, mooigaga atĩrĩ, “Njĩtĩkĩriai ninge mwena ũrĩa ũngĩ”; nao arũme a Gileadi mooragia o ũmwe wao atĩrĩ, “Wee wĩ Mũefiraimu?” Angĩacokirie ũũ, “Aca!”
6 maamwĩraga atĩrĩ, “Uga Shibolethu.” No we ooigaga “Sibolethu,” tondũ ndangĩahotire gũtamũka kiugo kĩu ũrĩa kwagĩrĩire. Nao makamũnyita makamũũragĩra iringĩro-inĩ icio cia Jorodani. Nĩ ũndũ ũcio Aefiraimu 42,000 makĩũragwo hĩndĩ ĩyo.
7 Jefitha aatiirĩrĩire Isiraeli mĩaka ĩtandatũ, thutha ũcio Jefitha Mũgileadi agĩkua na agĩthikwo itũũra-inĩ rĩake thĩinĩ wa Gileadi.
8 Ibizani ũrĩa woimĩte Bethilehemu nĩwe watiirĩrĩire Isiraeli thutha wa Jefitha.+
9 Ibizani aarĩ na ariũ 30 na airĩtu 30. Eerire airĩtu ake mathiĩ makahikio nĩ arũme a mbarĩ ingĩ, na akĩrehe airĩtu 30 mahikio nĩ ariũ ake. Aatiirĩrĩire Isiraeli mĩaka mũgwanja.
10 Thutha ũcio Ibizani agĩkua na agĩthikwo Bethilehemu.
11 Thutha wake Eloni Mũzebuluni agĩtiirĩrĩra Isiraeli; aatiirĩrĩire Isiraeli mĩaka ikũmi.
12 Thutha ũcio Eloni Mũzebuluni agĩkua na agĩthikwo Aijaloni bũrũri-inĩ wa Zebuluni.
13 Thutha wake Abidoni mũrũ wa Hileli Mũpirathoni agĩtiirĩrĩra Isiraeli.
14 Abidoni aarĩ na ariũ 40 na ariũ a ciana ciake 30 arĩa maakuuagwo nĩ ndigiri 70. Aatiirĩrĩire Isiraeli mĩaka ĩnana.
15 Thutha ũcio Abidoni mũrũ wa Hileli Mũpirathoni agĩkua na agĩthikwo Pirathoni bũrũri-inĩ wa Efiraimu kĩrĩma-inĩ kĩa Aamaleki.+
Tũũhoro twa magũrũ-inĩ
^ Kana hihi, “makĩringa magĩthiĩ mwena wa rũgongo.”
