Atiirĩrĩri Bũrũri 14:1-20
14 Thutha ũcio Samsoni agĩikũrũka Timina, na akĩona mũirĩtu Mũfilisti kũu Timina.*
2 Nĩ ũndũ ũcio akĩambata na akĩra ithe na nyina atĩrĩ: “Kũu Timina harĩ mũirĩtu Mũfilisti nyonete na akangucĩrĩria, na ndĩrenda mũmũgĩĩre atuĩke mũtumia wakwa.”
3 No ithe na nyina makĩmũũria atĩrĩ: “Ndũngĩetha mũtumia gatagatĩ-inĩ ka andũ arĩa mwĩtainwo nao na gatagatĩ-inĩ ka andũ aitũ othe?+ No nginya ũrute mũtumia gatagatĩ-inĩ ka Afilisti matarĩ aruu?” No Samsoni akĩra ithe ũũ: “Ngĩĩrĩra mũirĩtu ũcio, tondũ nĩwe mwega na niĩ.”*
4 Ithe na nyina matiamenyaga atĩ ũndũ ũcio woimĩte kũrĩ Jehova, nĩ gũkorũo eethaga mweke wa gũtharĩkĩra Afilisti, tondũ Afilisti nĩo maathaga Isiraeli hĩndĩ ĩyo.+
5 Nĩ ũndũ ũcio Samsoni hamwe na ithe na nyina magĩikũrũka Timina. Rĩrĩa aakinyire mĩgũnda-inĩ ya mĩthabibũ ya Timina, mũrũthi* ũgĩũka na kũrĩ we ũkĩmũraramagĩra.
6 Naguo roho wa Jehova ũgĩtũma agĩe na hinya,+ akĩũtarũrania maita merĩ o ta ũrĩa mũndũ atarũranagia kabũri maita merĩ na moko matheri. No ndeerire ithe kana nyina ũrĩa eekĩte.
7 Agĩcoka agĩikũrũka na akĩaria na mũirĩtu ũcio, na nowe Samsoni oonaga arĩ mwega maitho-inĩ make.+
8 Thutha ũcio rĩrĩa Samsoni aacokire nĩguo amũinũkie,+ akĩhũgũka mwena nĩguo arore kĩimba kĩa mũrũthi ũcio, na kĩimba-inĩ kĩu kĩa mũrũthi haarĩ na njũkĩ nyingĩ na ũũkĩ.
9 Agĩkũrũra ũũkĩ ũcio akĩwĩkĩra moko-inĩ make agĩthiĩ akĩũrĩaga. Rĩrĩa aakinyĩrire ithe na nyina, akĩmagaĩra marĩe. No ndaameerire atĩ aakũrũrĩte ũũkĩ ũcio kuuma kĩimba-inĩ kĩa mũrũthi.
10 Ithe agĩgĩikũrũka kũrĩ mũirĩtu ũcio, na Samsoni akĩgĩa na iruga kuo, nĩ gũkorũo ũguo nĩguo anake meekaga.
11 Rĩrĩa maamuonire, makĩmũrehera arũme 30 a kũmũrũgamĩrĩra nĩguo makorũo hamwe nake.
12 Nake Samsoni akĩmeera atĩrĩ: “Rekei ndĩmũgwatie ndaĩ. Na angĩkorũo ihinda-inĩ rĩa thikũ mũgwanja cia iruga rĩrĩ nĩ mũgũkorũo mũmĩmenyete na mũkaahe macokio-rĩ, nĩ ngũmũhe nguo 30 cia gatani na nguo mĩthemba 30 thaka.
13 No mwaremwo nĩ kũũhe macokio, no nginya mũũhe nguo 30 cia gatani na nguo mĩthemba 30 thaka.” Makiuga ũũ: “Tũgwatie ndaĩ ĩyo yaku; no twende kũmĩigua.”
14 Nĩ ũndũ ũcio akĩmeera atĩrĩ:
“Kuuma harĩ nyamũ ndĩani gũkiuma kĩndũ gĩa kũrĩa,Na kuuma harĩ nyamũ ĩrĩ hinya gũkiuma kĩndũ kĩrĩ cama.”+
Matiamenyire macokio ma ndaĩ ĩyo kwa ihinda rĩa thikũ ithatũ.
15 Mũthenya wa kana makĩra mũtumia wa Samsoni atĩrĩ: “Heenereria mũthuri waku+ nĩguo atwĩre macokio ma ndaĩ ĩyo. Kwaga ũguo, tũgũgũcina na mwaki hamwe na nyũmba ya thoguo. Kaĩ mũgũtũnyitĩte ũgeni gũkũ nĩguo muoe indo citũ?”
16 Nĩ ũndũ ũcio mũtumia wa Samsoni akĩrĩra amũkomeire na akĩmwĩra ũũ: “Wee nĩ ũũthũũire; ndũnyendete.+ Ũragwatirie andũ aitũ ndaĩ, no ndũrĩ ũranjĩra macokio mayo.” Samsoni aigua ũguo akĩmwĩra atĩrĩ: “O na baba na maitũ ndimeerĩte! Wee nĩwe ngwĩra?”
17 Ĩndĩ aathiire o na mbere kũrĩra amũkomeire thikũ icio ingĩ ciatigarĩte harĩ thikũ icio mũgwanja cia iruga. Marigĩrĩrio-inĩ, thikũ ya mũgwanja Samsoni akĩmumbũrĩra, tondũ nĩ aamũtindĩkĩrĩirie mũno. Mũtumia ũcio agĩcoka akĩra andũ ao macokio ma ndaĩ ĩyo.+
18 Nĩ ũndũ ũcio mũthenya wa mũgwanja riũa rĩtanathũa,* arũme acio a itũũra rĩu makĩra Samsoni atĩrĩ:
“Nĩ kĩĩ kĩngĩkorũo na cama gũkĩra ũũkĩ,Na nĩ kĩĩ kĩngĩkorũo na hinya gũkĩra mũrũthi?”+
Akĩmacokeria ũũ:
“Korũo mũtinarĩma na mori yakwa,+Mũtingĩamenya macokio ma ndaĩ yakwa.”
19 Naguo roho wa Jehova ũgĩtũma agĩe na hinya,+ agĩikũrũka Ashikeloni+ na akĩũraga arũme 30 ao na akĩoya nguo ciao na akĩneana nguo icio kũrĩ andũ acio maamenyire macokio ma ndaĩ ĩyo.+ Na akĩambata agĩcoka nyũmba-inĩ ya ithe arakarĩte mũno.
20 Thutha ũcio mũtumia wa Samsoni+ akĩheanwo kũrĩ ũmwe wa arũme acio maarũgamĩrĩire Samsoni, acio maarĩ hamwe nake.+
Tũũhoro twa magũrũ-inĩ
^ Ũkk., “mũirĩtu kuuma harĩ airĩtu a Afilisti.”
^ Ũkk., “nĩwe mwega maitho-inĩ makwa.”
^ Kana “mũrũthi mwĩthĩ wa njamba.”
^ Kana hihi, “atanaingĩra rumu-inĩ ya thĩinĩ.”