Atiirĩrĩri Bũrũri 17:1-13
-
Mĩhianano ya Mika na mũthĩnjĩri-ngai wake (1-13)
17 Na rĩrĩ, nĩ kwarĩ na mũndũ thĩinĩ wa gĩcigo kĩrĩa kĩrĩ irĩma kĩa Efiraimu+ wetagwo Mika.
2 Akĩra nyina atĩrĩ: “Icunjĩ iria 1,100 cia betha iria ciooirũo kuuma kũrĩ wee iria ciatũmire ũrumane kĩrumi, na ngĩigua-rĩ, betha ĩyo nĩ niĩ ndĩ nayo. Nĩ niĩ ndamĩoire.” Nĩ ũndũ ũcio nyina akiuga ũũ: “Jehova arorathima mũrũ wakwa.”
3 Agĩgĩcokia icunjĩ icio 1,100 cia betha kũrĩ nyina, ĩndĩ nyina akiuga atĩrĩ: “Betha ĩno ngũmĩamũrĩra Jehova kuuma guoko-inĩ gwakwa nĩguo mũrũ wakwa amĩhũthĩre gũthondeka mũhianano wa gwacũhio na mũhianano wa cuma.*+ Kwoguo nĩ ndagũcokeria.”
4 Rĩrĩa aacokirie betha ĩyo kũrĩ nyina, nyina ooire icunjĩ 200 cia betha agĩtwarĩra mũturi wa indo cia betha. Agĩgĩthondeka mũhianano wa gwacũhio na mũhianano wa cuma;* na mĩhianano ĩyo ĩkĩigwo thĩinĩ wa nyũmba ya Mika.
5 Mũndũ ũcio wetagwo Mika aarĩ na nyũmba ya ngai ciake, na agĩthondeka ebodi+ o hamwe na mĩhianano ya terafimu*+ agĩcoka akĩamũra* ũmwe wa ariũ ake atuĩke mũthĩnjĩri-ngai wake.+
6 Matukũ-inĩ macio, gũtiarĩ mũthamaki thĩinĩ wa Isiraeli.+ O mũndũ eekaga ũrĩa oonaga kwagĩrĩire maitho-inĩ make.*+
7 Na rĩrĩ, kwarĩ na mwanake warĩ Bethilehemu+ thĩinĩ wa Juda warĩ wa famĩlĩ ya Juda. Aarĩ Mũlawii+ waikarĩte kũu kwa ihinda.
8 Mwanake ũcio agĩkiuma itũũra-inĩ rĩa Bethilehemu thĩinĩ wa Juda agacarie kũndũ gwa gũikara. Na arĩ rũgendo-inĩ rwake, agĩkinya gĩcigo-inĩ kĩrĩ irĩma kĩa Efiraimu, nyũmba-inĩ ya Mika.+
9 Nake Mika akĩmũũria ũũ: “Uumĩte kũ?” Akĩmũcokeria atĩrĩ: “Niĩ ndĩ Mũlawii kuuma Bethilehemu thĩinĩ wa Juda, na thiĩte gũcaria kũndũ gwa gũikara.”
10 Nĩ ũndũ ũcio Mika akĩmwĩra atĩrĩ: “Ũka tũikarage nawe ũtuĩke baba* na mũthĩnjĩri-ngai wakwa. Na nĩ ndĩkũheaga icunjĩ ikũmi cia betha o mwaka na nguo o hamwe na irio.” Mũlawii ũcio agĩkĩingĩra kuo.
11 Kwoguo Mũlawii ũcio agĩtĩkĩra gũikara na mũndũ ũcio, na mwanake ũcio agĩgĩtuĩka o ta ũmwe wa ariũ ake.
12 Makĩria ma ũguo, Mika akĩamũra* Mũlawii ũcio atuĩke mũthĩnjĩri-ngai wake,+ nake agĩgĩtũũra kũu nyũmba-inĩ ya Mika.
13 Mika agĩcoka akiuga ũũ: “Rĩu nĩ njũĩ Jehova nĩ ekũnjĩka maũndũ mega, nĩ gũkorũo Mũlawii ũyũ nĩ atuĩkĩte mũthĩnjĩri-ngai wakwa.”
Tũũhoro twa magũrũ-inĩ
^ Kana “mũhianano wa gũtwekio.”
^ Kana “mũhianano wa gũtwekio.”
^ Ũkk., “akĩiyũria guoko kwa.”
^ Kana “ngai cia mũciĩ.”
^ Kana “ũrĩa eeciragia kwagĩrĩire.”
^ Kana “mũtaarani.”
^ Ũkk., “akĩiyũria guoko kwa.”