Atiirĩrĩri Bũrũri 19:1-30
-
Mehia ma ngomanio ma Abenjamini thĩinĩ wa Gibea (1-30)
19 Matukũ-inĩ macio, rĩrĩa gũtaarĩ mũthamaki thĩinĩ wa Isiraeli,+ Mũlawii ũmwe waikaraga gĩcigo-inĩ kĩrĩa kĩrĩ irĩma kĩa Efiraimu+ akĩoya thuriya kuuma Bethilehemu+ thĩinĩ wa Juda ĩtuĩke mũtumia wake.
2 No thuriya ĩyo yake ĩkĩaga wĩhokeku harĩ we, na ĩkĩmũtiga ĩgĩcoka Bethilehemu thĩinĩ wa Juda mũciĩ gwa ithe. Mũtumia ũcio aaikarire kũu mĩeri ĩna.
3 Mũthuriwe agĩgĩthiĩ kũrĩ we nĩguo amũthaithe acoke; maarĩ na ndungata yake ya mũndũrũme na ndigiri igĩrĩ. Nake mũtumia ũcio akĩmũtonyia nyũmba gwa ithe. Rĩrĩa ithe wa mũtumia ũcio aamuonire, agĩkena mũno nĩ gũcemania nake.
4 Kwoguo, mũthoniwe, ithe wa mũtumia ũcio, akĩmũiguithia maikare nake thikũ ithatũ; maarĩaga na makanyua, na aaraaraga kũu.
5 Mũthenya wa kana, rĩrĩa mookĩrire rũcinĩ tene nĩguo mathiĩ, ithe wa mũtumia ũcio akĩra mũthoniwe atĩrĩ: “Rĩa kĩndũ nĩguo ũgĩe na hinya,* mũcoke muumagare.”
6 Nĩ ũndũ ũcio magĩikara thĩ, na eerĩ makĩrĩanĩra na makĩnyuanĩra; thutha ũcio ithe wa mũtumia ũcio akĩra mũndũ ũcio ũũ: “Ndagũthaitha ũraarĩrĩre gũkũ ũtukũ ũyũ na wĩkenie.”*
7 Rĩrĩa mũndũ ũcio ookĩrire nĩguo athiĩ, ithe wa mũtumia ũcio agĩikara o akĩmũthaithaga, nĩ ũndũ ũcio akĩraara o rĩngĩ.
8 Rĩrĩa ookĩrire rũcinĩ tene mũthenya wa gatano nĩguo athiĩ, ithe wa mũtumia ũcio akĩmwĩra ũũ: “Ndagũthaitha, rĩa kĩndũ nĩguo ũgĩe na hinya.”* Na magĩikara kuo nginya gũgĩkinya hwaĩ-inĩ, na eerĩ magĩthiĩ o na mbere kũrĩa.
9 Rĩrĩa mũndũ ũcio ookĩrire arĩ hamwe na thuriya yake na ndungata yake nĩguo mathiĩ, mũthoniwe, ithe wa mũtumia ũcio, akĩmwĩra: “Atĩrĩrĩ, rĩu nĩ hakuhĩ hwaĩ-inĩ. Ndagũthaitha, raarĩrĩra gũkũ. Kũrĩ hakuhĩ gũtuka. Raarĩrĩra gũkũ na wĩkenie. Rũciũ ũkaaroka gũũkĩra tene nĩ ũndũ wa rũgendo rwaku na wĩthiĩre gwaku mũciĩ.”*
10 No rĩrĩ, mũndũ ũcio ndeendaga kũraarĩrĩra ũtukũ ũngĩ, nĩ ũndũ ũcio agĩũkĩra na agĩthiĩ nginya Jebusi, na nokuo Jerusalemu.+ Aarĩ na ndigiri igĩrĩ ciaigĩrĩirũo matandĩko, thuriya yake, na ndungata yake.
11 Rĩrĩa maarĩ hakuhĩ gũkinya Jebusi, kwarĩ hakuhĩ gũtuka. Kwoguo ndungata ĩyo ĩkĩũria mwathi wayo ũũ: “Hihi no tũrũgame itũũra-inĩ rĩrĩ rĩa Ajebusi tũraarĩrĩre kuo?”
12 No mwathi wayo akĩmĩra ũũ: “Tũtikũrũgama itũũra-inĩ rĩa andũ a kũngĩ matarĩ Aisiraeli. Tũgũthiĩ o nginya Gibea.”+
13 Ningĩ akĩra ndungata yake atĩrĩ: “Ũka nĩguo tũgerie gũkinya Gibea kana Rama; tũkũraarĩrĩra itũũra-inĩ rĩmwe rĩa macio.”+
14 Magĩgĩthiĩ na mbere na rũgendo rwao, narĩo riũa rĩkĩambĩrĩria gũthũa marĩ hakuhĩ gũkinya Gibea ĩrĩa ya Benjamini.
15 Kwoguo makĩrũgama kũu na makĩingĩra nĩguo maraarĩrĩre Gibea. Rĩrĩa maaingĩrire thĩinĩ, magĩikara thĩ kĩhaaro-inĩ kĩa mũingĩ gĩa itũũra rĩu, no gũtirĩ mũndũ wamanyitire ũgeni gwake mũciĩ maraarĩrĩre kuo.+
16 Thutha-inĩ hwaĩ-inĩ ũcio mũthuri mũkũrũ agĩũka oimĩte wĩra wake mũgũnda-inĩ. Aarĩ wa gĩcigo kĩrĩa kĩrĩ irĩma kĩa Efiraimu,+ na aaikaraga Gibea kwa ihinda; no aikari a itũũra rĩu maarĩ Abenjamini.+
17 Rĩrĩa mũthuri ũcio mũkũrũ aatiirire maitho akĩona mũgendi ũcio aikarĩte kĩhaaro-inĩ kĩa mũingĩ gĩa itũũra, akĩmũũria ũũ: “Wathiĩ kũ, na uumĩte kũ?”
18 Nake akĩmũcokeria atĩrĩ: “Tuumĩte Bethilehemu thĩinĩ wa Juda twerekeire gĩcigo-inĩ kĩrĩa kĩrĩ irĩma kĩa Efiraimu, kũrĩa nyumĩte. Ndĩrathiĩte Bethilehemu thĩinĩ wa Juda,+ na njerekeire nyũmba-inĩ ya Jehova,* no gũtirĩ mũndũ ũranyita ũgeni gwake mũciĩ.
19 Tũrĩ na nyeki na irio cia kũigana ndigiri citũ,+ na mũgate+ na ndibei nĩ ũndũ wakwa, mũtumia ũyũ, na ndungata itũ. Gũtirĩ kĩndũ tũtarĩ.”
20 No mũthuri ũcio mũkũrũ akĩmwĩra atĩrĩ: “Ũrogĩa na thayũ! Nĩ ngũkũhe kĩrĩa gĩothe ũrabatara. No ndũkaraare kĩhaaro-inĩ kĩa mũingĩ.”
21 Nĩ ũndũ ũcio akĩmũtwara gwake mũciĩ na akĩhe ndigiri ciake irio.* Magĩcoka magĩĩthamba magũrũ na makĩrĩa na makĩnyua.
22 Rĩrĩa meekenagia, arũme matarĩ kĩene a itũũra rĩu magĩthiũrũrũkĩria nyũmba ĩyo na makĩambĩrĩria kũgũthagũtha mũrango makĩraga mũthuri ũcio mũkũrũ mwene nyũmba ĩyo ũũ: “Ruta mũndũ ũcio ũũkire gwaku mũciĩ na gũkũ nja nĩgetha tũkome nake.”+
23 Nĩ ũndũ ũcio, mwene nyũmba ĩyo akiuma nja akĩmeera ũũ: “Aca ariũ a ithe witũ, mũtigeke ũndũ mũũru. Mũndũ ũyũ nĩ mũgeni mũciĩ gwakwa. Ndamũthaitha mũtigeke gĩĩko kĩu gĩa gĩconoko.
24 Haha ndĩ na mũirĩtu wakwa gathirange o hamwe na thuriya ya mũthuri ũcio. Rekei ndĩmarute na nja, mũmaconorithie angĩkorũo no mũhaka mwĩke ũguo.*+ No mũtigeke mũndũ ũyũ gĩĩko kĩu gĩa gĩconoko.”
25 No arũme acio makĩrega gũthikĩrĩria mũthuri ũcio mũkũrũ, na nĩ ũndũ ũcio mũndũ ũcio akĩnyita thuriya ĩyo yake+ na akĩmiumia na nja kũrĩ o. Makĩmĩnyita kĩa hinya na makĩmĩthũkia ũtukũ mũgima nginyagia rũcinĩ. Magĩcoka makĩmĩingata rũcinĩ gũgĩkĩa.
26 Rũcinĩ tene, mũtumia ũcio agĩthiĩ na akĩgwa mũromo-inĩ wa nyũmba ya mũthuri ũcio kũrĩa mwathi wake aarĩ na agĩkoma ho nginya gũgĩthererũka.
27 Rĩrĩa mwathi wake ookĩrire rũcinĩ na akĩhingũra mĩrango ya nyũmba nĩguo athiĩ na mbere na rũgendo-rĩ, akĩona mũtumia ũcio thuriya yake, akomete mũromo-inĩ wa nyũmba ĩyo moko make marĩ mũrango-inĩ.
28 Nĩ ũndũ ũcio akĩmwĩra ũũ: “Ũkĩra; nĩ tũthiĩ.” No ndaacokirie. Mũndũ ũcio agĩcoka akĩmũigĩrĩra igũrũ rĩa ndigiri na akĩambĩrĩria rũgendo rwa gũthiĩ gwake mũciĩ.
29 Rĩrĩa aakinyire gwake mũciĩ, akĩoya kahiũ ga gũthĩnja na akĩnyita thuriya ĩyo yake akĩmĩtinangia kĩrũngo gwa kĩrũngo icunjĩ 12, na o gĩcunjĩ agĩgĩtũma gĩcigo-inĩ kĩmwe thĩinĩ wa icigo ciothe cia Isiraeli.
30 Arĩa othe moonire ũndũ ũcio makiuga ũũ: “Ũndũ ta ũyũ ndũrĩ wekĩka o na kana ũkoneka kuuma mũthenya ũrĩa Aisiraeli maambatire kuuma bũrũri-inĩ wa Misiri nginyagia ũmũthĩ. Mwĩcũraniei ũndũ ũcio,* cariai ũtaaro,+ na mũtwĩre ũrĩa tũgwĩka.”
Tũũhoro twa magũrũ-inĩ
^ Kana “gĩa gwĩkĩra ngoro yaku hinya.”
^ Kana “ũkenie ngoro yaku.”
^ Kana “gĩa gwĩkĩra ngoro yaku hinya.”
^ Ũkk., “hema-inĩ.”
^ Kana hihi, “ndungataga nyũmba-inĩ ya Jehova.”
^ Kana “nyeki ndukanie.”
^ Kana “mũmathũkie na mwĩke ũrĩa mũkuona kwagĩrĩire maitho-inĩ manyu.”
^ Kana “Igaai ngoro cianyu ũndũ-inĩ ũcio.”
