Atiirĩrĩri Bũrũri 2:1-23
2 Nake mũraika wa Jehova+ akiuma Giligali+ akĩambata Bokimu, akiuga atĩrĩ: “Ndamũrutire Misiri ngĩmwambatia o nginya bũrũri-inĩ ũrĩa nderĩire maithe manyu ma tene kũgerera mwĩhĩtwa.+ Makĩria ma ũguo, ngiuga ũũ, ‘Ndirĩ hĩndĩ ngaathũkia kĩrĩkanĩro gitũ na inyuĩ.+
2 Na inyuĩ-rĩ, mũtikanathondeke kĩrĩkanĩro hamwe na aikari a bũrũri ũyũ+ na nĩ mwagĩrĩirũo gũtharia igongona ciao.’+ No mũtirathĩkĩra mũgambo wakwa.+ Nĩ kĩĩ kĩratũma mwĩke ũguo?
3 Nĩkĩo ningĩ ndoigire ũũ, ‘Ndikaamaingata mehere mbere yanyu,+ na nĩ magaatuĩka mũtego harĩ inyuĩ,+ nacio ngai ciao nĩ ikaamũhĩtithia.’”+
4 Rĩrĩa mũraika wa Jehova eerire Aisiraeli othe ciugo icio, andũ makĩambĩrĩria kũrĩra manĩrĩire.
5 Nĩ ũndũ ũcio magĩta kũndũ kũu Bokimu,* na makĩrutĩra Jehova igongona kuo.
6 Na rĩrĩa Joshua eerire andũ mathiĩ, o Mũisiraeli agĩthiĩ igai-inĩ rĩake nĩguo egwatĩre bũrũri ũcio.+
7 Na andũ acio magĩthiĩ na mbere gũtungatĩra Jehova matukũ mothe ma Joshua na matukũ mothe ma athuri* arĩa maatigirũo muoyo thutha wa Joshua gũkua, arĩa moonete mawĩko mothe manene marĩa Jehova eekĩire andũ a Isiraeli.+
8 Thutha ũcio Joshua mũrũ wa Nuni, ndungata ya Jehova, agĩkua arĩ na ũkũrũ wa mĩaka 110.+
9 Nĩ ũndũ ũcio makĩmũthika gĩcigo-inĩ kĩa igai rĩake Timinathu-heresi,+ ĩrĩa ĩrĩ gĩcigo-inĩ kĩrĩa kĩrĩ irĩma kĩa Efiraimu, mwena wa rũgongo wa Kĩrĩma kĩa Gaashu.+
10 Rũciaro rũu ruothe rũgĩturanĩrũo hamwe na maithe maruo ma tene,* na gũkiumĩra rũciaro rũngĩ thutha waruo rũrĩa rũtooĩ Jehova o na kana maũndũ marĩa eekĩire andũ a Isiraeli.
11 Nĩ ũndũ ũcio Aisiraeli magĩka maũndũ moru maitho-inĩ ma Jehova na magĩtungatĩra* ngai cia Baali.+
12 Kwoguo magĩtiganĩria Jehova Ngai wa maithe mao, ũrĩa wamarutire bũrũri wa Misiri.+ Na makĩrũmĩrĩra ngai ingĩ, ngai cia ikundi cia andũ arĩa maamathiũrũrũkĩirie,+ magĩcinamĩrĩra na makĩrakaria Jehova.+
13 Magĩgĩtiganĩria Jehova na magĩtungatĩra Baali na mĩhianano ya Ashitorethu.+
14 Nĩ ũndũ ũcio marakara ma Jehova makĩrĩrĩmbũkĩra Isiraeli, na akĩmaneana moko-inĩ ma atahani arĩa maamatunyire indo ciao.+ Akĩmendia guoko-inĩ gwa thũ iria ciamathiũrũrũkĩirie,+ na matiahotire gwĩtiiria thũ ciao rĩngĩ.+
15 Kũrĩa guothe maathiaga, guoko kwa Jehova gwakoragwo gũkĩmokĩrĩra, gũkamarehera mathĩna,+ o ta ũrĩa Jehova ooigĩte na o ta ũrĩa Jehova aameerĩte kũgerera mwĩhĩtwa,+ maarĩ na mĩtangĩko mĩingĩ mũno.+
16 Na nĩ ũndũ ũcio Jehova nĩ aamarahũragĩra atiirĩrĩri bũrũri arĩa maamahonokagia kuuma guoko-inĩ kwa atahani.+
17 No nĩ maaregaga gũthikĩrĩria nginya atiirĩrĩri bũrũri acio, makahũũra ũmaraya na ngai ingĩ na magacinamĩrĩra. Makĩgarũrũka o narua magĩtiga kũrũmĩrĩra njĩra ĩrĩa maithe mao ma tene maageragĩra, arĩa maathĩkĩire maathani ma Jehova.+ Makĩaga gwĩka ũguo.
18 Rĩrĩa rĩothe Jehova aamarahũragĩra mũtiirĩrĩri bũrũri,+ Jehova aakoragwo hamwe na mũtiirĩrĩri bũrũri ũcio na akamahonokia kuuma guoko-inĩ gwa thũ ciao matukũ-inĩ mothe ma mũtiirĩrĩri bũrũri ũcio; nĩ gũkorũo Jehova nĩ aaiguaga tha*+ nĩ ũndũ wa mĩnyamaro ĩrĩa maarehagĩrũo nĩ arĩa maamanyamaragia+ na arĩa maamahinyagĩrĩria.
19 No rĩrĩa mũtiirĩrĩri bũrũri ũcio akua, maacokaga gwĩka o maũndũ moru gũkĩra maithe mao na njĩra ya kũrũmĩrĩra ngai ingĩ, magacitungatĩra na magacinamĩrĩra.+ Makĩrega gũtigana na mĩthiĩre yao na mĩtugo yao ya ũremi.
20 Mũthia-inĩ marakara ma Jehova makĩrĩrĩmbũkĩra Isiraeli,+ na akiuga ũũ: “Tondũ rũrĩrĩ rũrũ nĩ rũthũkĩtie kĩrĩkanĩro gĩakwa+ kĩrĩa ndathire maithe maruo ma tene na nĩ rwagĩte kũnjathĩkĩra,+
21 na niĩ ndikũingata rũrĩrĩ o na rũmwe rwehere mbere yao harĩ ndũrĩrĩ iria Joshua aatigire irĩ kuo rĩrĩa aakuire.+
22 Nĩgetha ngerie andũ a Isiraeli nyone kana nĩ mekũrũmia njĩra ya Jehova+ mathiagĩre njĩra-inĩ ĩyo o ta ũrĩa maithe mao meekire.”
23 Nĩ ũndũ ũcio Jehova agĩtĩkĩria ndũrĩrĩ icio itigare kuo. Ndaigana gũcingata na ihenya, na ndaacineanire guoko-inĩ kwa Joshua.
Tũũhoro twa magũrũ-inĩ
^ Rĩĩtwa rĩu riugĩte “Arĩri.”
^ Athuri arĩa meehokeirũo maũndũ.
^ Icio nĩ ciugo ciahũthagĩrũo kuonania gũkua.
^ Kana “magĩthathaiya.”
^ Kana “nĩ eeriraga.”
