Atiirĩrĩri Bũrũri 20:1-48
-
Abenjamini gũtharĩkĩrũo (1-48)
20 Nĩ ũndũ ũcio, Aisiraeli othe kuuma Dani+ nginya Biri-shiba na kuuma bũrũri wa Gileadi+ makiumagara, na kĩrĩndĩ kĩu gĩothe gĩkĩũngana hamwe* mbere ya Jehova kũu Mizipa.+
2 Anene a andũ na mĩhĩrĩga yothe ya Isiraeli magĩkĩrũgama handũ hao kĩũngano-inĩ kĩa andũ a Ngai—thigari 400,000 cia gũthiĩ na magũrũ irĩ na hiũ cia njora.+
3 Abenjamini magĩkĩigua atĩ arũme a Isiraeli nĩ mambatĩte Mizipa.
Nao arũme a Isiraeli makĩmeera ũũ: “Ta twĩrei atĩrĩrĩ, ũndũ ũyũ mũũru ũguo ũrekĩkire atĩa?”+
4 Nĩ ũndũ ũcio mũndũ ũrĩa Mũlawii+ mũthuri wa mũtumia ũcio woragĩtwo akĩmacokeria atĩrĩ: “Ndĩrathiĩte Gibea+ ya Benjamini tũrĩ na thuriya yakwa nĩguo tũraarĩrĩre kuo.
5 Nao aikari* a Gibea maroka gũũtharĩkĩra na marathiũrũrũkĩria nyũmba ĩyo ũtukũ. Marendaga kũnjũraga, no handũ ha ũguo maranyita thuriya yakwa kĩa hinya, na ĩrakua.+
6 Nĩ ũndũ ũcio ndĩroya kĩimba gĩa thuriya yakwa ndĩragĩtinangia na ndĩratũma icunjĩ icio kũndũ guothe igai-inĩ rĩa Isiraeli,+ tondũ nĩ gĩĩko gĩa thoni na gĩa gĩconoko mareekire thĩinĩ wa Isiraeli.
7 Inyuothe andũ aya a Isiraeli, heanai ũtaaro wanyu na rĩciria rĩanyu+ ũndũ-inĩ ũyũ.”
8 Nao andũ acio othe makĩarahũka marĩ hamwe* makiuga atĩrĩ: “Gũtirĩ mũndũ o na ũmwe witũ ũgũthiĩ hema-inĩ yake kana acoke gwake mũciĩ.
9 Na ũũ nĩguo tũgwĩka itũũra rĩa Gibea: Tũkwambata kũrĩtharĩkĩra kũringana na ũrĩa tũgũcuka mĩtĩ.+
10 Tũkuoya arũme 10 harĩ arũme 100 kuuma mĩhĩrĩga yothe ya Isiraeli, na arũme 100 harĩ 1,000, na arũme 1,000 harĩ 10,000 nĩgetha macokanĩrĩrie irio cia mbũtũ, nĩguo yoe ikinya harĩ Gibea ya Benjamini, nĩ ũndũ wa gĩĩko kĩu gĩa gĩconoko mekĩte thĩinĩ wa Isiraeli.”
11 Nĩ ũndũ ũcio arũme othe a Isiraeli makĩũngana hamwe nĩguo mokĩrĩre itũũra rĩu marĩ na ũrũmwe.*
12 Mĩhĩrĩga ya Isiraeli ĩgĩcoka ĩgĩtũma arũme kũrĩ arũme othe a mũhĩrĩga wa Benjamini makameere atĩrĩ: “Nĩ ũndũ ũrĩkũ ũyũ mũũru ũguo wĩkĩkĩte gatagatĩ-inĩ kanyu?
13 Tũnengerei arũme acio matarĩ kĩene a Gibea,+ nĩgetha tũmorage tweherie kĩndũ kĩũru gatagatĩ-inĩ ka Isiraeli.”+ No Abenjamini makĩrega gũthikĩrĩria Aisiraeli acio ariũ a ithe wao.
14 Abenjamini magĩcoka makiuma matũũra-inĩ makĩũngana hamwe kũu Gibea nĩguo mathiĩ makarũe na arũme a Isiraeli.
15 Mũthenya ũcio Abenjamini magĩta arũme 26,000 kuuma matũũra-inĩ mao marĩ na hiũ cia njora, hatatarĩtwo arũme 700 arĩa maathuurĩtwo kuuma Gibea.
16 Mbũtũ-inĩ ĩyo kwarĩ na arũme 700 maahũthagĩra guoko kwa ũmotho. Na harĩ andũ acio o mũndũ nĩ aahotaga gũikia ihiga na kĩgũtha ũndũ angĩringa rũcuĩrĩ rũmwe na ndahĩtie.
17 Nao arũme a Isiraeli magĩta arũme 400,000 marĩ na hiũ cia njora,+ na o ũmwe wao aarĩ njamba ya ita yarĩ na ũmenyeru, no matietire arũme a Benjamini.
18 Magĩũkĩra makĩambata Betheli gũtuĩria ũhoro harĩ Ngai.+ Andũ acio a Isiraeli magĩkĩũria atĩrĩ: “Nũũ gatagatĩ-inĩ gaitũ wagĩrĩirũo gũtongoria mbaara-inĩ kũrũa na Abenjamini?” Jehova akĩmacokeria ũũ: “Juda nĩwe ũgũtongoria.”
19 Thutha ũcio Aisiraeli magĩũkĩra rũcinĩ na makĩamba hema nĩguo matharĩkĩre Gibea.
20 Arũme a Isiraeli magĩgĩthiĩ kũrũa na Benjamini; magĩthiĩ mebangĩte marĩ mbũtũ makamatharĩkĩre kũu Gibea.
21 Nao Abenjamini makiuma kũu Gibea makĩũraga arũme 22,000 a Isiraeli mũthenya ũcio.
22 O na kũrĩ ũguo, mbũtũ ya arũme a Isiraeli ĩkĩonania ũcamba na o rĩngĩ ĩkĩĩbanga o hau yarĩ o ta mũthenya wa mbere.
23 Aisiraeli magĩcoka makĩambata makĩrĩra marĩ mbere ya Jehova o nginya hwaĩ-inĩ na magĩtuĩria ũhoro harĩ Jehova makĩũria ũũ: “Tũthiĩ rĩngĩ kũrũa na ariũ a ithe witũ, andũ a Benjamini?”+ Nake Jehova akĩmeera atĩrĩ: “Ambatai mũkarũe nao.”
24 Aisiraeli magĩgĩkuhĩrĩria Abenjamini mũthenya wa kerĩ.
25 Nao andũ a Benjamini makiuma kũu Gibea magatũngane nao mũthenya wa kerĩ na makĩũraga Aisiraeli angĩ 18,000,+ othe marĩ na hiũ cia njora.
26 Nĩ ũndũ ũcio arũme othe a Isiraeli makĩambata Betheli. Makĩrĩra na magĩikara thĩ hau mbere ya Jehova,+ makĩĩhinga kũrĩa+ mũthenya ũcio o nginya hwaĩ-inĩ na makĩruta magongona ma njino+ hamwe na magongona ma ũiguano+ hau mbere ya Jehova.
27 Thutha ũcio arũme acio a Isiraeli magĩtuĩria ũhoro harĩ Jehova,+ nĩ gũkorũo ithandũkũ rĩa kĩrĩkanĩro kĩa Ngai ũrĩa wa ma rĩarĩ kũu matukũ-inĩ macio.
28 Na rĩrĩ, Finehasi+ mũrũ wa Eliazaru, mũrũ wa Haruni, nĩwe watungataga* mbere yarĩo matukũ-inĩ macio. Magĩkĩũria atĩrĩ: “Tũthiĩ o rĩngĩ tũkarũe na ariũ a ithe witũ, arũme a Benjamini, kana tũtige?”+ Jehova akĩmacokeria ũũ: “Ambatai, tondũ rũciũ nĩ ngaamaneana guoko-inĩ kwanyu.”
29 Andũ a Isiraeli makĩbanga arũme nĩguo mamohie+ mathiũrũrũkĩirie itũũra rĩa Gibea.
30 Aisiraeli magĩkĩambata marũe na Abenjamini mũthenya wa gatatũ, makĩĩbanga marĩ mbũtũ nĩguo matharĩkĩre Gibea o ta maita macio mangĩ.+
31 Rĩrĩa Abenjamini mooimire nĩguo matũngane na mbũtũ ĩyo, makĩgucĩrĩrio kũraihu na itũũra rĩu.+ Na o ta maita macio mangĩ, makĩambĩrĩria gũtharĩkĩra arũme acio makĩmoragagĩra barabara-inĩ iria nene, ĩmwe nĩ ĩrĩa yambatĩte Betheli nayo ĩyo ĩngĩ nĩ ĩrĩa ĩthiĩte Gibea, makĩũraga arũme ta 30 a Isiraeli kũu werũ-inĩ.+
32 Nĩ ũndũ ũcio Abenjamini makĩĩrana atĩrĩ: “Nĩ kũmatooria tũramatooria o ta mbere.”+ No Aisiraeli makĩĩrana ũũ: “Tũkũũra tũthiĩ tũmagucĩrĩirie kũraihu na itũũra rĩu o nginya barabara-inĩ iria nene.”
33 Kwoguo arũme othe a Isiraeli makĩarahũka kuuma harĩa maarĩ na makĩĩbanga marĩ mbũtũ kũu Baali-tamaru nao Aisiraeli arĩa meehithĩte makiumĩra hau meehithĩte hakuhĩ na Gibea.
34 Nĩ ũndũ ũcio arũme 10,000 arĩa maathuurĩtwo kuuma harĩ andũ othe a Isiraeli magĩthiĩ mbere ya itũũra rĩa Gibea, na mbaara ĩyo yarĩ nene mũno. No Abenjamini matiamenyaga atĩ thĩna warĩ hakuhĩ kũmakora.
35 Jehova agĩtooria andũ a Benjamini+ marĩ mbere ya andũ a Isiraeli, na mũthenya ũcio Aisiraeli makĩũraga arũme 25,100 kũu Benjamini, othe marĩ na hiũ cia njora.+
36 Ĩndĩ Abenjamini meeciragia atĩ arũme a Isiraeli nĩ megũtoorio rĩrĩa moorire kuuma Benjamini,+ no moorire tondũ nĩ meehokete arũme arĩa meehithĩte hakuhĩ na Gibea.+
37 Arũme acio meehithĩte meekire na ihenya makĩguthũka merekeire Gibea. Arũme acio magĩcoka makĩnyagana kũu makĩniina itũũra rĩu rĩothe na rũhiũ rwa njora.
38 Na rĩrĩ, arũme a Isiraeli nĩ maabangĩte na arũme acio meehithĩire itũũra rĩu matoogie ndogo yambate kuuma kuo nĩguo ĩkorũo ĩrĩ kĩmenyithia.
39 Rĩrĩa Aisiraeli maagarũrũkire morĩre mbaara, arũme a Benjamini makĩambĩrĩria kũmatharĩkĩra na makĩũraga arũme ta 30 a Isiraeli+ na makiuga atĩrĩ: “Nĩ kũmatooria tũramatooria, o ta ũrĩa twamekire mbaara-inĩ ĩyo ĩngĩ.”+
40 Ĩndĩ kĩmenyithia gĩkĩambĩrĩria kwambata na igũrũ kĩrĩ gĩtugĩ kĩa ndogo kuuma itũũra-inĩ rĩu. Rĩrĩa arũme a Benjamini meehũgũrire, makĩona itũũra rĩu rĩothe rĩgĩakana mwaki warĩrĩmbũkaga na igũrũ.
41 Arũme a Isiraeli makĩmagarũrũkĩra, nao arũme a Benjamini makĩiyũrũo nĩ guoya, nĩ gũkorũo nĩ moonire atĩ thĩna nĩ warĩkĩtie kũmakora.
42 Nĩ ũndũ ũcio makĩũrĩra arũme a Isiraeli merekeire werũ-inĩ, ĩndĩ mbaara ĩkĩmarũmĩrĩra; nao arũme arĩa mooimaga matũũra-inĩ makĩnyitanĩra na acio angĩ kũmoraga.
43 Magĩthiũrũrũkĩria Abenjamini makĩmateng’eria mategũtigithĩria. Makĩmarangĩrĩria marĩ mbere ya Gibea mwena wa irathĩro.
44 Mũthia-inĩ arũme 18,000 a Benjamini makĩũragwo, na othe maarĩ njamba cia ita ciarĩ hinya.+
45 Arũme a Benjamini makĩgarũrũka na makĩũrĩra werũ-inĩ ndũmba-inĩ ya ihiga ya Rimoni,+ nao Aisiraeli makĩũragĩra arũme 5,000 barabara-inĩ iria nene, na magĩthiĩ o na mbere kũmateng’eria o nginya Gidomu; na makĩũraga arũme angĩ 2,000.
46 Arũme a Benjamini arĩa othe mooragirũo mũthenya ũcio maarĩ 25,000 marĩ na hiũ cia njora,+ na othe maarĩ njamba cia ita ciarĩ hinya.
47 No arũme 600 makĩũrĩra werũ-inĩ ndũmba-inĩ ya ihiga ya Rimoni, na magĩikara kũu ndũmba-inĩ ya ihiga ya Rimoni mĩeri ĩna.
48 Nao arũme a Isiraeli makĩgarũrũka magĩthiĩ gũtharĩkĩra Abenjamini na makĩũraga andũ arĩa maarĩ itũũra-inĩ rĩu na rũhiũ rwa njora, makĩũraga andũ o hamwe na mahiũ, kĩrĩa gĩothe gĩatigarĩte. O na ningĩ matũũra marĩa mothe maakorire na kũu, makĩmacina na mwaki.
Tũũhoro twa magũrũ-inĩ
^ Ũkk., “ta arĩ mũndũ ũmwe.”
^ Kana hihi, “ene itũũra.”
^ Ũkk., “ta mũndũ ũmwe.”
^ Ũkk., “ta arĩ mũndũ ũmwe.”
^ Ũkk., “warũgamaga.”
