Atiirĩrĩri Bũrũri 21:1-25
-
Mũhĩrĩga wa Benjamini kũhonokio (1-25)
21 Na rĩrĩ, arũme a Isiraeli nĩ meehĩtĩte mwĩhĩtwa marĩ Mizipa makiuga ũũ:+ “Gũtirĩ o na ũmwe witũ ũkaaneana mwarĩ kũrĩ mũndũrũme wa Benjamini atuĩke mũtumia wake.”+
2 Nĩ ũndũ ũcio, andũ magĩthiĩ Betheli+ na magĩikara thĩ mbere ya Ngai ũrĩa wa ma o nginya hwaĩ-inĩ, makĩrĩraga na magĩcakaya marĩ na ruo rũingĩ.
3 Na mooragia ũũ: “Jehova Ngai wa Isiraeli, nĩ kĩĩ gĩtũmĩte ũndũ ũyũ wĩkĩke thĩinĩ wa Isiraeli? Nĩ kĩĩ gĩgũtũma mũhĩrĩga ũmwe ũkorũo ũtarĩ ho ũmũthĩ thĩinĩ wa Isiraeli?”
4 Mũthenya ũrĩa warũmĩrĩire, andũ magĩũkĩra tene na magĩaka kĩgongona nĩgetha marutĩre magongona ma njino ho o hamwe na magongona ma ũiguano.+
5 Andũ a Isiraeli magĩkĩũria ũũ: “Nũũ gatagatĩ-inĩ ka mĩhĩrĩga yothe ya Isiraeli ũtaambatire kũũngana mbere ya Jehova?” nĩ gũkorũo nĩ meehĩtĩte mwĩhĩtwa mũnene atĩ mũndũ o wothe ũtaambatĩte kũrĩ Jehova kũu Mizipa no mũhaka oragwo.
6 Andũ a Isiraeli makĩigua kĩeha tondũ wa ũndũ ũrĩa wakorete Benjamini mũrũ wa ithe wao. Makiuga atĩrĩ: “Ũmũthĩ mũhĩrĩga ũmwe nĩ mweherie thĩinĩ wa Isiraeli.
7 Tũgwĩka atĩa nĩguo tũhe arĩa matigarĩte atumia, na nĩ twĩhĩtĩte mwĩhĩtwa mbere ya Jehova+ atĩ tũtikamanengera airĩtu aitũ matuĩke atumia ao?”+
8 Makĩũria ũũ: “Nĩ mũhĩrĩga ũrĩkũ gatagatĩ-inĩ ka mĩhĩrĩga ya Isiraeli ũtaambatire kũrĩ Jehova kũu Mizipa?”+ Na gũkĩmenyeka atĩ gũtirĩ mũndũ o na ũmwe woimĩte Jabeshi-gileadi agoka kambĩ-inĩ kũrĩa kĩũngano kĩu kĩarĩ.
9 Rĩrĩa andũ maatarirũo, makĩona atĩ gũtirĩ mũndũ o na ũmwe wa aikari a Jabeshi-gileadi warĩ kuo.
10 Nĩ ũndũ ũcio kĩrĩndĩ kĩu gĩgĩtũma arũme 12,000 arĩa maarĩ na hinya biũ mathiĩ kuo. Gĩkĩmaatha gĩkĩmeera ũũ: “Thiĩi mũtharĩkĩre aikari a Jabeshi-gileadi na rũhiũ rwa njora, nginya atumia na ciana.+
11 Ũũ nĩguo mwagĩrĩirũo gwĩka: Mũndũrũme o wothe, o hamwe na mũtumia o wothe wanakoma na mũndũrũme, mwagĩrĩirũo kũmũniina.”
12 Gatagatĩ-inĩ ka aikari a Jabeshi-gileadi, magĩkora airĩtu 400 maarĩ gathirange, mataakomete na mũndũrũme. Nĩ ũndũ ũcio makĩmatwara kambĩ-inĩ kũu Shilo,+ ĩrĩa ĩrĩ bũrũri-inĩ wa Kanaani.
13 Kĩrĩndĩ kĩu gĩothe gĩgĩcoka gĩgĩtũmana ndũmĩrĩri kũrĩ Abenjamini ndũmba-inĩ ya ihiga ya Rimoni+ na gĩkĩmendera thayũ.
14 Kwoguo hĩndĩ ĩyo andũ a Benjamini magĩũka. Makĩmanengera airĩtu acio matooragire kuuma harĩ atumia a Jabeshi-gileadi,+ no mationire airĩtu a kũmaigana.
15 Nao andũ makĩigua kĩeha tondũ wa ũndũ ũrĩa wakorete Benjamini+ nĩ gũkorũo Jehova nĩ aatũmĩte mĩhĩrĩga ya Isiraeli ĩgayũkane.
16 Athuri* a kĩrĩndĩ kĩu makĩũria atĩrĩ: “Tũgwĩka atĩa nĩguo tũhe arũme arĩa matigarĩte atumia, nĩ gũkorũo atumia othe nĩ maaniinirũo Benjamini guothe?”
17 Magĩcokia ũũ: “Nĩ kwagĩrĩire gũkorũo na igai nĩ ũndũ wa arĩa matigarĩte a Benjamini, nĩgetha gũtikagĩe mũhĩrĩga o na ũmwe ũgũthira thĩinĩ wa Isiraeli.
18 No tũtiĩtĩkĩrĩtio kũneana airĩtu aitũ matuĩke atumia ao, nĩ gũkorũo andũ a Isiraeli nĩ mehĩtĩte ũũ: ‘Kũnyitwo nĩ kĩrumi nĩ mũndũ ũrĩa ũkaahe Benjamini mũtumia.’”+
19 Magĩcoka makiuga ũũ: “Atĩrĩrĩ, nĩ kũgĩaga gĩathĩ kĩa Jehova mwaka o mwaka thĩinĩ wa Shilo,+ ĩrĩa ĩrĩ mwena wa rũgongo wa Betheli na mwena wa irathĩro wa barabara ĩrĩa nene yumĩte Betheli ĩkambata nginya Shekemu na mwena wa mũhuro wa Lebona.”
20 Kwoguo magĩatha arũme a Benjamini ũũ: “Thiĩi mwĩhithe mĩgũnda-inĩ ya mĩthabibũ.
21 Na rĩrĩa mũrĩona airĩtu a Shilo moka kũina ndaci ciao cia gĩthiũrũrĩ, o ũmwe wanyu agĩrĩirũo kuuma mĩgũnda-inĩ ya mĩthabibũ na eyoere mũtumia kuuma harĩ airĩtu acio a Shilo, na thutha ũcio mũcoke bũrũri-inĩ wa Benjamini.
22 Na maithe mao kana ariũ a ithe mangĩtũtetia, tũkũmeera atĩrĩ, ‘Tuoniei tha nĩ ũndũ wao, nĩ gũkorũo tũtinahota kũhe o ũmwe wao mũtumia kũgerera mbaara+ na mũtingĩrahotire kũmahe atumia mũtegũcokererũo nĩ mahĩtia.’”+
23 Na ũguo nĩguo arũme a Benjamini meekire, o ũmwe wao agĩkuua mũtumia kuuma harĩ airĩtu arĩa maathũngũthaga. Thutha ũcio magĩcoka igai-inĩ rĩao na magĩaka matũũra mao rĩngĩ+ na magĩtũũra kuo.
24 Aisiraeli makĩhurunjũka kuuma kũu hĩndĩ ĩyo, o mũndũ agĩthiĩ kũrĩ mũhĩrĩga wake na kũrĩ famĩlĩ yao, magĩkiuma kũu makiumagara o mũndũ agĩthiĩ igai-inĩ rĩake.
25 Matukũ-inĩ macio, gũtiarĩ mũthamaki thĩinĩ wa Isiraeli.+ O mũndũ eekaga ũrĩa oonaga kwagĩrĩire maitho-inĩ make.*
