Atiirĩrĩri Bũrũri 3:1-31
3 Ici nĩcio ndũrĩrĩ iria Jehova aarekire itigare nĩgetha igerie andũ othe a Isiraeli arĩa matooĩ ũhoro wĩgiĩ mbaara o na ĩmwe ya Kanaani+
2 (aarekire gũthiĩ ũguo nĩgetha njiarũa iria ingĩgooka thutha-inĩ cia Aisiraeli imenye mbaara, iria itoonete maũndũ ta macio mbere ĩyo):
3 athani arĩa atano a Afilisti,+ na Akanaani othe, Asidoni,+ na Ahivi+ arĩa maaikaraga Kĩrĩma-inĩ kĩa Lebanoni+ kuuma Kĩrĩma-inĩ kĩa Baali-herimoni gũthiĩ nginya Lebo-hamathu.*+
4 Ndũrĩrĩ icio ciarĩ cia kũgeria andũ a Isiraeli nĩguo kũmenyeke kana andũ a Isiraeli nĩ mangĩaathĩkĩire maathani ma Jehova marĩa aaheete maithe mao kũgerera Musa.+
5 Kwoguo Aisiraeli magĩtũũra gatagatĩ-inĩ ka Akanaani,+ Ahiti, Aamori, Aperizi, Ahivi, na Ajebusi.
6 Mooyaga airĩtu ao makamahikia magatuĩka atumia ao, nao airĩtu ao ene makamaneana kũrĩ ariũ ao, na makĩambĩrĩria gũtungatĩra ngai ciao.+
7 Nĩ ũndũ ũcio Aisiraeli magĩka maũndũ moru maitho-inĩ ma Jehova, na makĩriganĩrũo nĩ Jehova Ngai wao na maatungatagĩra ngai cia Baali+ na mĩtĩ ya kũhoywo.*+
8 Nĩ ũndũ ũcio marakara ma Jehova makĩrĩrĩmbũkĩra Isiraeli, na akĩmendia guoko-inĩ gwa Kushani-rishathaimu mũthamaki wa Mesopotamia.* Aisiraeli magĩtungatĩra Kushani-rishathaimu mĩaka ĩnana.
9 Rĩrĩa Aisiraeli maakaĩire Jehova amateithie,+ Jehova akĩarahũra mũhonokia wa kũhonokia Aisiraeli,+ nĩwe Othinieli+ mũrũ wa Kenazu, mũrũ wa nyina na Kalebu ũrĩa mũnyinyi.
10 Roho wa Jehova ũgĩũka igũrũ rĩake,+ na agĩtuĩka mũtiirĩrĩri bũrũri wa Isiraeli. Rĩrĩa aathiire mbaara-inĩ, Jehova akĩneana Kushani-rishathaimu mũthamaki wa Mesopotamia* guoko-inĩ gwake na agĩtooria Kushani-rishathaimu.
11 Thutha ũcio bũrũri ũcio ũkĩgĩa na ũhurũko* mĩaka 40. Nake Othinieli mũrũ wa Kenazu agĩkua.
12 Na o rĩngĩ Aisiraeli makĩambĩrĩria gwĩka maũndũ moru maitho-inĩ ma Jehova.+ Nĩ ũndũ ũcio Jehova akĩreka Egiloni mũthamaki wa Moabi+ atoorie Isiraeli, nĩ gũkorũo nĩ meekaga maũndũ moru maitho-inĩ ma Jehova.
13 Ningĩ akĩmarehera Aamoni+ na Aamaleki+ mamokĩrĩre. Magĩtharĩkĩra Isiraeli na magĩtunyana itũũra rĩa mĩtĩ ya mĩkĩndũ.+
14 Aisiraeli magĩtungatĩra Egiloni mũthamaki wa Moabi mĩaka 18.+
15 Aisiraeli magĩkaĩra Jehova amateithie,+ nĩ ũndũ ũcio Jehova akĩmarahũrĩra mũhonokia,+ nĩwe Ehudi+ mũrũ wa Gera, Mũbenjamini+ wahũthagĩra guoko kwa ũmotho.+ Thutha wa ihinda Aisiraeli magĩtũma irĩhi rĩa igooti kũrĩ Egiloni mũthamaki wa Moabi kũgerera Ehudi.
16 Ehudi agĩĩthondekera rũhiũ rwa njora rũnooretwo mĩena yerĩ, rwa ũraihu wa mũkono* ũmwe, na akĩruoherera thĩinĩ wa nguo yake kĩero-inĩ gĩake kĩa ũrĩo.
17 Agĩkĩneana irĩhi rĩu rĩa igooti kũrĩ Egiloni mũthamaki wa Moabi. Na rĩrĩ, Egiloni aarĩ mũndũ mũtungu mũno.
18 Rĩrĩa Ehudi aarĩkirie kũneana irĩhi rĩu rĩa igooti, akiumagaria andũ acio maakuuĩte irĩhi rĩu.
19 No rĩrĩa maakinyire harĩ mĩhianano ya gwacũhio* Giligali,+ we mwene akĩhũndũka agĩthiĩ akĩra mũthamaki ũũ: “Atĩrĩrĩ, wee mũthamaki, ndĩ na ndũmĩrĩri yaku ya hitho.” Nake mũthamaki akiuga: “Kirai!” Nĩ ũndũ ũcio ndungata ciake ciothe ikĩmweherera.
20 Kwoguo Ehudi agĩthiĩ harĩ we harĩa aaikarĩte arĩ wiki kanyũmba-inĩ kahooreru ka igũrũ. Ehudi agĩcoka akĩmwĩra: “Ndĩ na ndũmĩrĩri yaku kuuma kũrĩ Ngai.” Nĩ ũndũ ũcio mũthamaki agĩũkĩra kuuma gĩtĩ-inĩ gĩake kĩa ũnene.
21 Ehudi agĩcoka agĩcomora rũhiũ rwa njora kĩero-inĩ gĩake kĩa ũrĩo na guoko gwake kwa ũmotho na akĩmũtheca nda naruo.
22 Rũhiũ rũu rũgĩthiĩ rũtonyete thĩinĩ hamwe na mũtĩ waruo, namo maguta makĩrũhumbĩra, tondũ ndaacomorire rũhiũ rũu rwa njora ruume nda-inĩ ya mũthamaki ũcio, namo mai makiuma.
23 Ehudi akĩgerera gĩthaku-inĩ,* thutha wa gũcokia mĩrango ya kanyũmba kau ka igũrũ na kũmĩhinga biũ.
24 Rĩrĩa aathiire, ndungata cia mũthamaki igĩcoka na igĩkora mĩrango ya kanyũmba kau ka igũrũ ĩrĩ mĩhinge. Nĩ ũndũ ũcio cikiuga ũũ: “No nginya akorũo nĩ gwĩteithia areteithia* rumu-inĩ hooreru ya thĩinĩ.”
25 Magĩikara o metereire nginya magĩconoka, no rĩrĩa moonire atĩ ndarahingũra mĩrango ya kanyũmba kau ka igũrũ, makĩoya cabi makĩmĩhingũra na makĩona mwathi wao agwĩte thĩ arĩ mũkuũ!
26 Ehudi oorire hĩndĩ ĩyo maahindahindaga, na akĩhĩtũkĩra mĩhianano-inĩ ya gwacũhio*+ na agĩkinya Seira o wega.
27 Rĩrĩa aakinyire, akĩhuuha coro+ arĩ gĩcigo-inĩ kĩrĩa kĩrĩ irĩma kĩa Efiraimu;+ nao Aisiraeli magĩikũrũka kuuma gĩcigo-inĩ kĩrĩa kĩrĩ irĩma, amatongoretie.
28 Agĩcoka akĩmeera: “Nũmĩrĩrai, nĩ gũkorũo Jehova nĩ aneanĩte thũ cianyu, Amoabi, guoko-inĩ kwanyu.” Nĩ ũndũ ũcio makĩmũrũmĩrĩra na magĩtunyana iringĩro cia Jorodani makĩhingĩrĩria Amoabi, na matietĩkagĩria mũndũ o na ũmwe kũringa.
29 Hĩndĩ ĩyo makĩũraga Amoabi 10,000,+ arũme othe njamba arĩa maarĩ na hinya; gũtirĩ o na ũmwe wetharire.+
30 Kwoguo mũthenya ũcio Moabi ĩgĩtoorio nĩ guoko kwa Isiraeli; naguo bũrũri ũcio ũkĩgĩa na ũhurũko* mĩaka 80.+
31 Thutha wake gũkiumĩra Shamigari+ mũrũ wa Anathu, ũrĩa woragire arũme 600 Afilisti+ na mũcengi wa ng’ombe;+ o nake nĩ aahonokirie Isiraeli.
Tũũhoro twa magũrũ-inĩ
^ Kana “itonyero rĩa Hamathu.”
^ Rora Ũthathaũri wa Ciugo.
^ Ũkk., “Aramu-naharaimu.”
^ Ũkk., “Aramu.”
^ Kana “thayũ.”
^ No kũhoteke nĩ mũkono mũkuhĩ wa kĩndũ centimita 38 (inji 15). Rora Ũhoro Muongerere B14.
^ Kana hihi, “kware cia mahiga.”
^ Kana hihi, “mwanya wa rĩera.”
^ Ũkk., “nĩ kũhumbĩra ahumbĩrĩte magũrũ make.”
^ Kana hihi, “kware cia mahiga.”
^ Kana “thayũ.”
