Atiirĩrĩri Bũrũri 7:1-25
7 Nake Jerubaali, o we Gideoni,+ na andũ arĩa othe maarĩ hamwe nake magĩũkĩra rũcinĩ tene na makĩamba hema ciao Itherũkĩro-inĩ rĩa Harodi, na hĩndĩ ĩyo kambĩ ya Midiani yarĩ mwena wake wa rũgongo karĩma-inĩ ka More mũkuru-inĩ mwaraganu.*
2 Na rĩrĩ, Jehova akĩra Gideoni ũũ: “Andũ acio ũrĩ nao nĩ aingĩ mũno ndikũneana Midiani guoko-inĩ kwao.+ Isiraeli ahota kũnjĩtĩĩra oige atĩrĩ, ‘Guoko gwakwa nĩkuo kwahonokia.’+
3 Rĩu anĩrĩra harĩ andũ acio ũmeere ũũ: ‘Mũndũ wothe ũrĩ na guoya na ũrainaina nĩ acoke mũciĩ.’”+ Gideoni agĩkĩmageria. Nĩ ũndũ ũcio, andũ 22,000 magĩcoka mũciĩ, gũgĩtigara andũ 10,000.
4 O na kũrĩ ũguo, Jehova akĩra Gideoni atĩrĩ: “O na rĩu andũ acio nĩ aingĩ mũno. Maikũrũkie maĩ-inĩ nĩguo ndĩmagerie marĩ kũu. Rĩrĩa ndĩrĩkwĩra atĩrĩ, ‘Ũyũ nĩ egũthiĩ hamwe nawe,’ ũcio nĩwe ũgũthiĩ hamwe nawe, no rĩrĩa ndĩrĩkwĩra atĩrĩ, ‘Ũyũ ndegũthiĩ hamwe nawe,’ ũcio ndegũthiĩ hamwe nawe.”
5 Nĩ ũndũ ũcio akĩoya andũ acio akĩmaikũrũkia maĩ-inĩ.
Jehova agĩcoka akĩra Gideoni ũũ: “Mũndũ wothe ũkũnyua maĩ na rũrĩmĩ o ta ũrĩa ngui ĩnyuaga, mwamũranie na arĩa mekũnyua maturĩtie maru.”
6 Andũ arĩa maanyuire maĩ na rũrĩmĩ, makoya maĩ na rũhĩ magĩtwaraga kanua-inĩ, maarĩ arũme 300. Andũ acio angĩ maanyuire maĩ maturĩtie maru.
7 Jehova agĩcoka akĩra Gideoni atĩrĩ: “Ngũmũhonokia kũgerera arũme acio 300 manyua maĩ na rũrĩmĩ, na nĩ ngũneana Midiani guoko-inĩ gwaku.+ Reke andũ acio angĩ othe macoke mũciĩ.”
8 Thutha wa arũme acio kuoya irio o hamwe na coro kuuma harĩ andũ acio, Gideoni akĩra arũme acio angĩ othe a Isiraeli macoke mũciĩ, agĩtigwo na arũme acio 300 tu. Kambĩ ya Midiani yarĩ mũhuro wake mũkuru-inĩ mwaraganu.+
9 Ũtukũ ũcio Jehova akĩmwĩra atĩrĩ: “Ũkĩra ũtharĩkĩre kambĩ ĩyo, nĩ gũkorũo nĩ ndĩmĩneanĩte guoko-inĩ gwaku.+
10 No angĩkorũo nĩ ũretigĩra kũmĩtharĩkĩra-rĩ, ikũrũka kambĩ-inĩ ĩyo mũrĩ na Pura ndungata yaku.
11 Ũthikĩrĩrie ũrĩa maroiga, na thutha ũcio nĩ ũkũgĩa na ũmĩrĩru* wa gũtharĩkĩra kambĩ ĩyo.” Nĩ ũndũ ũcio Gideoni na Pura ndungata yake magĩikũrũka magĩthiĩ mũthia-inĩ wa harĩa mbũtũ ĩyo yaambĩte hema.
12 Na rĩrĩ, andũ a Midiani na a Amaleki na andũ othe a mwena wa irathĩro+ maaiyũire mũkuru-inĩ ũcio mwaraganu o ta gĩkundi kĩa ngigĩ, nacio ngamĩra ciao itiatarĩkaga,+ ciarĩ nyingĩ o ta mũthanga ũrĩa ũkoragwo hũgũrũrũ-inĩ cia iria.
13 Gideoni agĩgĩkinya ho, na haarĩ mũndũ wataaragĩria mũratawe kĩroto aarotete, akĩmwĩra ũũ: “Gĩkĩ nĩkĩo kĩroto kĩrĩa ndotire. Nyonire mũgate wa gĩthiũrũrĩ mũthondeke na cairi ũkĩgaragara kambĩ-inĩ ya Midiani. Wathiĩ nginya hema-inĩ ĩmwe wamĩgũtha na hinya mũno nginya yamomoka.+ Ũng’aũranirie hema ĩyo mwena wa na igũrũ warora na thĩ, hema ĩyo yagwa.”
14 Mũratawe aigua ũguo akĩmwĩra atĩrĩ: “No nginya akorũo rũu nĩ rũhiũ rwa njora rwa Gideoni+ mũrũ wa Joashu, mũndũ wa kuuma Isiraeli. Ngai nĩ aneanĩte Midiani na kambĩ yothe guoko-inĩ gwake.”+
15 Rĩrĩa Gideoni aaiguire mũndũ ũcio agĩtaarĩria kĩroto kĩu na akĩigua ũtaũri wakĩo,+ akĩinamĩrĩra agĩthathaiya Ngai. Thutha ũcio agĩcoka kambĩ-inĩ ya Isiraeli na akiuga ũũ: “Ũkĩrai, nĩ gũkorũo Jehova nĩ aneanĩte kambĩ ya Midiani guoko-inĩ kwanyu.”
16 Agĩcoka akĩgayania arũme acio 300 ikundi ithatũ, na othe akĩmanengera coro+ na ndigithũ nene ciarĩ ũtheri no thĩinĩ ciekĩrĩtwo imũrĩ.
17 Agĩcoka akĩmeera atĩrĩ: “Ndorai na mwĩke o ũrĩa ngwĩka. Hĩndĩ ĩrĩa ndĩrĩkinya mũthia-inĩ wa kambĩ ĩyo, mwagĩrĩirũo gwĩka ũrĩa niĩ ngwĩka.
18 Rĩrĩa ndĩrĩhuuha coro, niĩ hamwe na arĩa ngũkorũo nao, o na inyuĩ mwagĩrĩirũo kũhuuha coro mũthiũrũrũkĩirie kambĩ ĩyo na mwanĩrĩre muuge ũũ, ‘Mbaara ĩno nĩ ya Jehova na ya Gideoni!’”
19 Gideoni na arũme 100 arĩa maarĩ nake magĩkinya mũthia-inĩ wa kambĩ ĩyo kĩambĩrĩria-inĩ kĩa ituanĩra rĩa ũtukũ gatagatĩ,* o hĩndĩ arangĩri maigwo. Makĩhuuha coro+ na makĩũraga ndigithũ icio nene cia maĩ iria maakuuĩte na moko.+
20 Kwoguo ikundi icio ithatũ ikĩhuuha coro na ikĩũraga ndigithũ icio nene. Makĩnyita imũrĩ na moko mao ma ũmotho na makĩhuuha coro macinyitĩte na moko mao ma ũrĩo makĩanĩrĩra makiuga ũũ: “Rũhiũ rwa njora rwa Jehova na rwa Gideoni!”
21 Hĩndĩ ĩyo yothe o mũndũ aarũgamĩte handũ hake mathiũrũrũkĩirie kambĩ ĩyo, nayo mbũtũ ĩyo yothe ĩkĩũra, makĩũra magĩkayaga.+
22 Arũme acio 300 magĩthiĩ o na mbere kũhuuha coro, nake Jehova agĩtũma o mũndũ okĩrĩre ũrĩa ũngĩ na rũhiũ rwa njora kũu guothe kambĩ-inĩ ĩyo;+ na mbũtũ ĩyo ĩkĩũra o nginya Bethi-shita, ĩgĩthiĩ nginya Zerera, o nginya mũhaka-inĩ wa Abeli-mehola+ hakuhĩ na Tabathu.
23 Nao arũme a Isiraeli magĩtwo kuuma Nafitali, Asheri, na Manase+ guothe makĩũngana hamwe, na makĩingatithia andũ a Midiani.
24 Gideoni agĩtũma atũmwo gĩcigo-inĩ gĩothe kĩrĩa kĩrĩ irĩma kĩa Efiraimu akĩmeera ũũ: “Ikũrũkai mũgatharĩkĩre Midiani, na mũtunyane harĩa hatahagwo maĩ o nginya Bethi-bara na Jorodani.” Nĩ ũndũ ũcio arũme othe a Efiraimu makĩũngana hamwe, na magĩtunyana maĩ macio o nginya Bethi-bara na Jorodani.
25 O na ningĩ makĩnyita anene erĩ a Midiani, nĩo Orebu na Zeebu; makĩũragĩra Orebu rwaro-inĩ rwa ihiga rwa Orebu,+ nake Zeebu makĩmũragĩra kĩhihĩro-inĩ kĩa ndibei kĩa Zeebu. Magĩthiĩ o na mbere kũingatithia andũ a Midiani,+ na magĩtwara mĩtwe ya Orebu na Zeebu kũrĩ Gideoni gĩcigo-inĩ kĩa Jorodani.
Tũũhoro twa magũrũ-inĩ
^ Kana “kĩanda-inĩ.”
^ Ũkk., “moko maku nĩ mekũgĩa hinya.”
^ Kuuma kĩndũ ta thaa inya cia ũtukũ nginya kĩndũ ta thaa inyanya cia ũtukũ.
