Gũcokerithia Maathani 33:1-29
33 Na rĩrĩ, gĩkĩ nĩkĩo kĩrathimo kĩrĩa Musa mũndũ wa Ngai ũrĩa wa ma aarathimire Aisiraeli nakĩo atanakua.+
2 Ooigire ũũ:
“Jehova—nĩ ookire oimĩte Sinai,+Na akĩmaarĩra kuuma Seiru.
Aarire arĩ na riri kuuma gĩcigo kĩrĩa kĩrĩ irĩma gĩa Parani,+Arĩ hamwe na ngiri makũmi maingĩ ma arĩa aamũre,+Njamba ciake cia ita irĩ guoko-inĩ gwake kwa ũrĩo.+
3 Nĩ eendete andũ ake;+Andũ ao othe arĩa aamũre marĩ guoko-inĩ gwaku.+Maaikarĩte thĩ magũrũ-inĩ maku;+Makĩambĩrĩria gũthikĩrĩria ciugo ciaku.+
4 (Musa aatũheire rĩathani, agĩtũhe watho,+Ũrĩ igai rĩa kĩũngano kĩa Jakubu.)+
5 Na agĩtuĩka mũthamaki thĩinĩ wa Jeshuruni,*+Rĩrĩa atongoria a andũ maacokanĩrĩire hamwe,+O hamwe na mĩhĩrĩga yothe ya Isiraeli.+
6 Rubeni arotũũra muoyo age gũkua,+Na andũ ake maroaga kũnyiha.”+
7 Na akĩrathima Juda na kĩrathimo gĩkĩ:+“Wee Jehova, thikĩrĩria mũgambo wa Juda,+Na ũmũcokie kũrĩ andũ ake.
Moko make nĩ magitĩrĩte* kĩrĩa gĩ gĩake,
Na ũmũteithie gũtooria thũ ciake.”+
8 Ũhoro-inĩ wĩgiĩ Lawii akiuga ũũ:+“Thumimu yaku* o na Urimu+ yaku nĩ cia mũndũ ũrĩa mwĩhokeku harĩ wee,+Ũrĩa wageririe rĩrĩa aarĩ Masa.+Ũkĩambĩrĩria gũtetania nake maĩ-inĩ ma Meriba,+
9 Mũndũ ũrĩa werire ithe na nyina atĩrĩ, ‘Ndireciria ũhoro wao.’
O na ariũ a ithe ndaatindanagĩrĩra nao,+Na akĩaga kũrũmbũyania na ariũ ake mwene.
Nĩ gũkorũo nĩ maarũmĩrĩire kiugo gĩaku,
Na makĩrũmia kĩrĩkanĩro gĩaku.+
10 Nĩ marutage Jakubu ũhoro wĩgiĩ matuĩro maku ma ciira+Na mamenyithagie Isiraeli Watho waku.+Nĩ marutage ũbumba ũrĩ mũtararĩko mwega harĩ wee*+Na marutage igongona igima kĩgongona-inĩ gĩaku.+
11 Wee Jehova, rathima hinya wake,
Na ũkenio nĩ wĩra wa moko make.
Hehenja magũrũ ma* arĩa mamũũkagĩrĩra,
Nĩgetha arĩa mamũthũire matikanamũũkĩrĩre rĩngĩ.”
12 Ũhoro-inĩ wĩgiĩ Benjamini akiuga ũũ:+“Ũrĩa mwende nĩ Jehova arotũũra arĩ na ũgitĩri harĩ we;
Na akamũhe ũgitĩri mũthenya wothe,
Arĩikaraga gatagatĩ-inĩ ga ciande ciake.”
13 Ũhoro-inĩ wĩgiĩ Jusufu akiuga ũũ:+“Jehova arorathima bũrũri wake+Na indo iria njega kuuma igũrũ,
Na ime na maĩ kuuma matherũkĩro-inĩ ma na thĩ,+
14 Na indo iria njega ikũragio nĩ riũa
Na maciaro marĩa mega o mweri,+
15 Na indo iria njega biũ kuuma irĩma-inĩ cia tene*+Na indo iria njega cia tũrĩma tũrĩa tũtũũraga,
16 Na indo iria njega cia thĩ na iria ciiyũrĩte kuo,+O hamwe na gwĩtĩkĩrĩka nĩ Ũrĩa ũikaraga kĩhinga-inĩ kĩa mĩigua.+Irokinya o mũtwe-inĩ wa Jusufu,
Ruototia-inĩ rwa mũtwe wa ũcio wamũrĩtwo kuuma harĩ ariũ a ithe.+
17 Riri wake ũtariĩ ta wa ndegwa ya irigithathi,
Nacio hĩa ciake nĩ hĩa cia ndegwa ya gĩthaka.
Agaatindĩkaga* ikundi cia andũ nacio
Ciothe irĩ hamwe o nginya ituri-inĩ cia thĩ.
Nacio nĩ ngiri makũmi maingĩ ma Efiraimu,+Na makiri maingĩ ma Manase.”
18 Ũhoro-inĩ wĩgiĩ Zebuluni akiuga ũũ:+“Kena wee Zebuluni, ũkiumagara,
Nawe Isakaru, kena ũrĩ thĩinĩ wa hema ciaku.+
19 Nĩ mageeta ikundi cia andũ ithiĩ kĩrĩma-inĩ.
Marĩ kũu nĩ makaaruta magongona ma ũthingu.
Nĩ gũkorũo makeeguna na ũtonga mũingĩ wa* iria-inĩ
Na kuuma mĩthithũ ĩrĩa mĩhithe ya mũthanga-inĩ.”
20 Ũhoro-inĩ wĩgiĩ Gadi akiuga ũũ:+“Kũrathimwo nĩ mũndũ ũrĩa wararamagia mĩhaka ya Gadi.+Aikaraga akomete o ta mũrũthi,
Wĩhaarĩirie gũtambura guoko, ĩni, ũtambure ruototia rwa mũtwe wake.
21 Ageethuurĩra igai rĩa mbere rĩtuĩke rĩake,+Nĩ gũkorũo kũu nĩkuo mũheani watho aigĩirũo igai rĩake.+Atongoria a andũ nĩ magaacokanĩrĩra hamwe.
Nĩ akaarehe ũthingu wa Jehova,
O na matuĩro make ma ciira harĩ Isiraeli.”
22 Ũhoro-inĩ wĩgiĩ Dani akiuga ũũ:+“Dani nĩ kaana ka mũrũthi.+Nĩ akaarũga kuuma Bashani.”+
23 Ũhoro-inĩ wĩgiĩ Nafitali akiuga ũũ:+“Nafitali nĩ aiganĩire nĩ gũkorũo arĩ mwĩtĩkĩrĩku
Na akaiyũrũo nĩ kĩrathimo kĩa Jehova.
Wĩgwatĩre mwena wa ithũĩro na mwena wa mũhuro.”
24 Ũhoro-inĩ wĩgiĩ Asheri akiuga ũũ:+“Asheri nĩ mũrathime na ariũ.
Aroetĩkĩrĩka nĩ ariũ a ithe,
Na arorikia* magũrũ make maguta-inĩ.
25 Kĩgera na gĩcango nĩcio icũhĩ cia ihingo ciaku,+Na ũrĩkoragwo ũrĩ na ũgitĩri matukũ-inĩ maku mothe.*
26 Gũtirĩ ũngĩ ũtariĩ ta Ngai ũrĩa wa ma+ wa Jeshuruni,+O we ũrĩa ũgeragĩra igũrũ nĩguo agũteithie
Ũrĩa ũikaragĩra matu arĩ na riri wake.+
27 Ngai nĩ rĩũrĩro kuuma o mahinda ma tene,+Moko make ma tene na tene marĩ rungu rwaku.+Na nĩ akaaingata thũ yehere mbere yaku,+Na oige atĩrĩ, ‘Maniine!’+
28 Isiraeli arĩikaraga na ũgitĩri,
O narĩo itherũkĩro rĩa Jakubu rĩikarage rĩtarĩ ũgwati-inĩ
Bũrũri-inĩ wa ngano* na ndibei njerũ,*+Na igũrũ rĩaguo gũtaatage ime.+
29 Gũkena nĩwe, wee Isiraeli!+Nũũ ũhaana tawe,+Andũ makenagĩra ũhonokio kuuma kũrĩ Jehova,+Ngo yaku ya gũkũgitĩra+Na rũhiũ rwaku rũnene rwa njora?
Thũ ciaku nĩ ikaainaina irĩ mbere yaku,+Nawe ũcikinyangĩrĩrie mĩgongo.”*
Tũũhoro twa magũrũ-inĩ
^ Rĩĩtwa rĩu riugĩte “Ũrĩa Mũrũngĩrĩru,” na nĩ rĩĩtwa rĩa gĩtĩo rĩa Isiraeli.
^ Kana “nĩ marũĩrĩire.”
^ Ciugo “yaku” na “wee” mũhari-inĩ ũyũ iraria ũhoro wa Ngai.
^ Ũkk., “iniũrũ-inĩ rĩaku.”
^ Kana “njohero cia.”
^ Kana hihi, “irĩma cia mwena wa irathĩro.”
^ Kana “Agaathecaga.”
^ Ũkk., “nĩ makoonga ũtonga mũingĩ wa.”
^ Kana “aroethamba.”
^ Ũkk., “Na hinya waku ũrĩkoragwo ũtariĩ o ta matukũ maku.”
^ Kana “ndibei ya mũhihano.”
^ Kana “cairi.”
^ Kana hihi, “kũndũ gũtũũgĩru.”
