Gũcokerithia Maathani 34:1-12
34 Musa agĩcoka akiuma kũu werũ-inĩ mwaraganu wa Moabi akĩambata Kĩrĩma-inĩ kĩa Nebo,+ o nginya gacũmbĩrĩ ka Pisiga,+ ĩrĩa ĩng’etheire Jeriko.+ Na Jehova akĩmuonia bũrũri wothe, kuuma Gileadi nginya Dani,+
2 na Nafitali guothe na bũrũri wa Efiraimu na Manase, na bũrũri wothe wa Juda o nginya iria rĩa mwena wa ithũĩro,*+
3 na Negebu+ na Gĩcigo kĩa Jorodani,+ mũkuru mwaraganu wa Jeriko, itũũra rĩa mĩtĩ ya mĩkĩndũ, o nginya Zoaru.+
4 Nake Jehova akĩmwĩra ũũ: “Ũyũ nĩguo bũrũri ũrĩa ndehĩtire kũrĩ Iburahimu, Isaaka, na Jakubu, ngiuga atĩrĩ, ‘Nĩ ngaaũheana kũrĩ mbeũ yaku.’*+ Nĩ ndareka ũwone na maitho maku, no ndũkũringa kuo.”+
5 Thutha ũcio Musa ndungata ya Jehova agĩkuĩra kũu bũrũri-inĩ wa Moabi o ta ũrĩa Jehova ooigĩte.+
6 Akĩmũthika mũkuru-inĩ bũrũri-inĩ wa Moabi, kũng’ethera Bethi-peori, na gũtirĩ mũndũ ũĩ harĩa mbĩrĩra yake ĩrĩ nginyagia ũmũthĩ.+
7 Musa aarĩ na mĩaka 120 rĩrĩa aakuire.+ Maitho make matiathirĩte hinya wa kuona, na ndaathirĩtwo nĩ hinya.
8 Andũ a Isiraeli makĩrĩrĩra Musa marĩ kũu werũ-inĩ mwaraganu wa Moabi kwa ihinda rĩa thikũ 30.+ Na matukũ macio ma kũrĩrĩra na gũcakaĩra Musa magĩgĩthira.
9 Na rĩrĩ, Joshua mũrũ wa Nuni nĩ aaiyũrĩtwo nĩ roho wa ũũgĩ, nĩ gũkorũo Musa nĩ aamũigĩrĩire guoko;+ nao Aisiraeli makĩambĩrĩria kũmũthikĩrĩria, na magĩka o ta ũrĩa Jehova aathĩte Musa.+
10 No gũtirĩ hĩndĩ ĩngĩ kũrĩ kwoimĩra mũnabii thĩinĩ wa Isiraeli ũhaana ta Musa,+ ũrĩa Jehova aamenyanĩte nake ũthiũ kwa ũthiũ.+
11 Oonanirie imenyithia ciothe na akĩringa ciama iria ciothe Jehova aamũtũmĩte akaringe bũrũri-inĩ wa Misiri kũrĩ Firauni na ndungata ciake ciothe na bũrũri wake wothe,+
12 hamwe na guoko kũrĩ hinya na ciĩko cia kũgegania iria Musa oonanirie andũ othe a Isiraeli makĩĩyonagĩra na maitho mao.+