Kĩambĩrĩria 27:1-46
27 Na rĩrĩa Isaaka aakũrire na maitho make makĩaga hinya wa kuona, agĩta Esau+ mũrũwe ũrĩa mũkũrũ akĩmwĩra atĩrĩ: “Mũrũ wakwa!” Nake agĩcokia ũũ: “Ĩ niĩ ũyũ haha!”
2 Agĩcoka akiuga atĩrĩ: “Rĩu niĩ ndĩ mũkũrũ. Na ndiũĩ rĩrĩa ngũkua.
3 Kwoguo ihinda-inĩ rĩrĩ, ndagũthaitha woe indo ciaku cia kũguĩma, thiaka waku na ũta waku, ũthiĩ werũ-inĩ ũũhĩtĩre nyamũ ya gĩthaka.+
4 Na ũthondeke irio irĩ na cama iria nyendete, ũndehere. Na niĩ ndĩcirĩe nĩguo ngũrathime itanakua.”
5 Na rĩrĩ, Rebeka nĩ aathikagĩrĩria hĩndĩ ĩyo Isaaka aaragia na Esau mũrũwe. Nake Esau agĩgĩthiĩ werũ-inĩ kũhĩta nyamũ ya gĩthaka nĩgetha amĩrehe.+
6 Nake Rebeka akĩra Jakubu mũrũwe ũũ:+ “Ndaigua thoguo akĩaria na Esau mũrũ wa nyũkwa akĩmwĩra atĩrĩ,
7 ‘Ndehera nyamũ ya gĩthaka na ũthondekere irio irĩ na cama. Na niĩ ndĩe nĩguo ngũrathime ndĩ mbere ya Jehova itanakua.’+
8 Rĩu mũrũ wakwa, thikĩrĩria na kinyi na wĩke ũrĩa ngũkwĩra.+
9 Ndagũthaitha ũthiĩ rũũru-inĩ woe tũbũri twĩrĩ nĩgetha ndĩtũthondeke tũtuĩke irio irĩ na cama nĩ ũndũ wa thoguo, o ta ũrĩa endete.
10 Ũcoke ũtwarĩre thoguo arĩe, nĩguo akũrathime atanakua.”
11 Jakubu akĩra nyina Rebeka ũũ: “No Esau mũrũ wa maitũ akoragwo aiyũire njuĩrĩ,+ na niĩ ngothi yakwa nĩ nyoroku.
12 Ĩ baba angĩĩhambata?+ Hatarĩ nganja ingĩoneka ta arĩ kũmũthaakĩra ndĩramũthaakĩra, na niĩ ndĩrehere kĩrumi handũ ha kĩrathimo.”
13 Nake nyina akĩmwĩra: “Mũrũ wakwa, kĩrumi kĩu ũngĩrumwo kĩronjokerera. Wee ĩka o ta ũrĩa ndakwĩra na ũthiĩ ũndehere tũbũri tũu.”+
14 Agĩgĩthiĩ agĩtuoya na agĩtwarĩra nyina, nake nyina agĩthondeka irio irĩ na cama, o ta ũrĩa ithe eendete.
15 Thutha ũcio Rebeka akĩoya nguo iria njega mũno cia Esau mũrũwe ũrĩa mũkũrũ, iria aarĩ nacio nyũmba, na agĩcihumba Jakubu mũrũwe ũcio mũnini.+
16 Ningĩ akĩmwĩkĩra maguoya ma tũbũri tũu moko-inĩ make na kũrĩa ataarĩ njuĩrĩ ngingo-inĩ yake.+
17 Agĩcoka akĩnengera Jakubu mũrũwe irio icio ciarĩ na cama o hamwe na mũgate.+
18 Kwoguo akĩingĩra kũrĩ ithe na akiuga: “Baba!” nake akiuga: “Ĩ niĩ ũyũ haha! Nĩ wee ũ mũrũ wakwa?”
19 Jakubu akĩra ithe atĩrĩ: “Nĩ niĩ Esau irigithathi rĩaku.+ Nĩ ndeka o ta ũrĩa ũnjĩrire. Ndagũthaitha ũikare thĩ, ũrĩe nyama cia nyamũ ĩrĩa ndahĩta, nĩgetha ũndathime.”+
20 Isaaka akĩũria mũrũwe ũũ: “Kaĩ wamĩona na ihenya atĩa, mũrũ wakwa?” Nake agĩcokia: “Nĩ tondũ Jehova Ngai waku nĩ amĩndeheire.”
21 Isaaka agĩcoka akĩra Jakubu atĩrĩ: “Ta kuhĩrĩria haha mũrũ wakwa-ĩ, nĩguo ngũhambate, menye kana kũna nĩ mũrũ wakwa Esau kana tiwe.”+
22 Jakubu agĩgĩkuhĩrĩria ithe Isaaka, nake akĩmũhambata, na agĩcoka akiuga: “Mũgambo nĩ mũgambo wa Jakubu, no moko, nĩ moko ma Esau.”+
23 Ndaigana kũmũmenya tondũ moko make maarĩ na njuĩrĩ o ta moko ma Esau mũrũ wa nyina. Nĩ ũndũ ũcio akĩmũrathima.+
24 Thutha ũcio akĩmũũria: “Ti itherũ nĩwe Esau mũrũ wakwa?” nake akĩmũcokeria: “Ĩ nĩ niĩ.”
25 Ningĩ akĩmwĩra: “Mũrũ wakwa, ndehera nyama cia nyamũ ĩrĩa wahĩta ndĩe, njoke ngũrathime.” Agĩkĩmũtwarĩra na akĩrĩa, na akĩmũhe ndibei akĩnyua.
26 Nake ithe Isaaka akĩmwĩra ũũ: “Mũrũ wakwa, ndagũthaitha ũkuhĩrĩrie haha, ũũmumunye.”+
27 Kwoguo agĩkuhĩrĩria na akĩmũmumunya, nake nĩ aaiguire mũnungo wa nguo ciake.+ Agĩkĩmũrathima na akiuga:
“Atĩrĩrĩ, mũnungo wa mũrũ wakwa nĩ ta mũnungo wa mũgũnda ũrĩa Jehova arathimĩte.
28 Ngai ũrĩa wa ma arokũhe ime rĩa igũrũ+ na tĩri ũrĩa mũnoru wa gũkũ thĩ+ o hamwe na irio* nyingĩ na ndibei njerũ.*+
29 Ikundi cia andũ nĩ igũtungatagĩre, nacio ndũrĩrĩ ikũinamagĩrĩre. Ũrĩkoragwo ũrĩ mwathi wa ariũ a thoguo, nao ariũ a nyũkwa magakũinamĩrĩra.+ Kũnyitwo nĩ kĩrumi nĩ mũndũ o wothe ũrĩa ũgaakũruma, na kũrathimwo nĩ mũndũ o wothe ũrĩa ũgaakũrathima.”+
30 Na rĩrĩ, o hĩndĩ ĩyo Isaaka aakoretwo arĩkia kũrathima Jakubu, na Jakubu akehera harĩ ithe Isaaka, Esau mũrũ wa nyina agĩũka kuuma kũguĩma.+
31 O nake akĩhaarĩria irio irĩ na cama na agĩtwarĩra ithe, na akĩra ithe ũũ: “Baba, ũkĩra ũrĩe nyama ciakwa cia kũguĩmwo, nĩgetha ũndathime.”
32 Nake ithe Isaaka akĩmũũria: “Nĩ wee ũ?” akĩmũcokeria: “Nĩ niĩ Esau, mũrũguo wa irigithathi.”+
33 Nake Isaaka akĩambĩrĩria kũinaina na hinya, na akiuga: “Nũũ ũcio ũgĩthiire ahĩta nyamũ na andehera? Nĩ ndĩmĩrĩire ũtanakinya, na ndamũrathima—na hatarĩ nganja nĩ ekũrathimwo!”
34 Esau aigua ciugo cia ithe, akĩambĩrĩria kũrĩra anĩrĩire na mũgambo mũnene mũno arĩ na marũrũ na akĩra ithe ũũ: “Ndathima, o na niĩ baba!”+
35 No we akiuga: “Mũrũ wa nyũkwa okire na wara nĩguo agĩe kĩrathimo gĩaku.”
36 Aigua ũguo akiuga: “Na githĩ ti kĩo etagwo Jakubu,* nĩgetha oe ithenya rĩakwa maita maya merĩ?+ Nĩ arĩkĩtie kuoya ũrigithathi wakwa,+ na rĩu nĩ oya kĩrathimo gĩakwa!”+ Agĩcoka akĩũria: “Ndũrĩ na kĩrathimo ũnjigĩire?”
37 No Isaaka agĩcokeria Esau ũũ: “Nĩ ndamũtua mwathi igũrũ rĩaku,+ na nĩ ndamũhe ariũ othe a nyina matuĩke ndungata ciake, na ndamũhe irio na ndibei njerũ* nĩguo imũteithagie.+ Nĩ ũndũ ũrĩkũ ũtigarĩte ingĩgwĩkĩra, mũrũ wakwa?”
38 Esau akĩra ithe ũũ: “Baba, kaĩ uuma na kĩrathimo o kĩmwe tu? Ndathima, o na niĩ baba!” Esau agĩkĩrĩra anĩrĩire agĩitaga maithori.+
39 Nĩ ũndũ ũcio ithe Isaaka akĩmũcokeria ũũ:
“Atĩrĩrĩ, gĩikaro gĩaku kĩrĩkoragwo kũraya na tĩri mũnoru wa gũkũ thĩ, na kũraya na ime rĩa igũrũ.+
40 Na ũgũtũũra ũhũthagĩra rũhiũ rwaku rwa njora,+ na nĩ ũrĩtungatagĩra mũrũ wa nyũkwa.+ No rĩrĩa ũkaaga gũkirĩrĩria, nĩ ũkoina icoki rĩake rĩehere ngingo-inĩ yaku.”+
41 No rĩrĩ, Esau akĩiga muku kwerekera Jakubu nĩ ũndũ wa kĩrathimo kĩrĩa ithe aamũheire,+ na Esau agĩikara akĩĩraga ũũ ngoro-inĩ: “Matukũ ma gũcakaĩra baba nĩ makuhĩrĩirie.+ Thutha ũcio no kũũraga ngooraga Jakubu mũrũ wa maitũ.”
42 Rĩrĩa ciugo cia Esau mũrũwe ũrĩa mũkũrũ ciamenyithirio Rebeka, agĩtũmanĩra Jakubu mũrũwe ũrĩa mũnini akĩmwĩra ũũ: “Atĩrĩrĩ, Esau mũrũ wa nyũkwa nĩ arabanga gũkũũraga nĩguo erĩhĩrie.*
43 Rĩu mũrũ wakwa, ĩka ũrĩa ngũkwĩra. Ũkĩra ũũrĩre Harani kwa Labani mũrũ wa maitũ.+
44 Ũikare nake kwa ihinda nginya marakara ma mũrũ wa nyũkwa mahoorere,
45 o nginya marakara marĩa mũrũ wa nyũkwa arĩ namo gũkwerekera mathire na ariganĩrũo nĩ ũrĩa ũmwĩkĩte. Na nĩ ngaacoka ngũtũmanĩre. Kaĩ ingĩkĩũrũo nĩ inyuerĩ mũthenya ũmwe nĩkĩ?”
46 Thutha ũcio Rebeka agĩikara akĩraga Isaaka ũũ: “Nĩ menete ũtũũro wakwa mũno nĩ ũndũ wa airĩtu a Hethi.+ Jakubu angĩkahikia mũtumia kuuma harĩ airĩtu a Hethi, o ta airĩtu aya marĩ gũkũ bũrũri-inĩ-rĩ, ũtũũro wakwa ũkĩrĩ na wega ũrĩkũ?”+
Tũũhoro twa magũrũ-inĩ
^ Kana “ndibei ya mũhihano.”
^ Ngano kana cairi.
^ Rĩĩtwa rĩu riugĩte “Ũrĩa Ũnyitĩte Ndiira; Ũrĩa Woete Ithenya rĩa Ũrĩa Ũngĩ.”
^ Kana “ndibei ya mũhihano.”
^ Kana “arehooreria na meciria ma gũkũũraga.”
