Kũguũrĩrio kwa Johana 19:1-21
19 Thutha ũcio ngĩigua kĩndũ gĩatariĩ ta mũgambo mũnene wa kĩrĩndĩ kĩnene kũu igũrũ. Makiuga: “Goocai Ja!*+ Ũhonokio na riri na hinya nĩ cia Ngai witũ,
2 nĩ gũkorũo matuĩro make nĩ ma ma na nĩ ma ũthingu.+ Tondũ nĩ ahingĩtie ituĩro harĩ mũmaraya ũrĩa mũnene ũthũkĩtie thĩ na ngomanio ciake itagĩrĩire,* na nĩ arĩhĩirie thakame ya ngombo ciake ĩrĩa ĩrĩ moko-inĩ ma mũmaraya ũcio.”*+
3 O hĩndĩ ĩyo riita rĩa kerĩ makiuga: “Goocai Ja!*+ Na ndogo ya mũmaraya ũcio ĩtũũraga yambataga tene na tene.”+
4 Na athuri arĩa 24+ na ciũmbe iria inya irĩ muoyo+ makĩĩgũithia thĩ na magĩthathaiya Ngai o we ũikaragĩra gĩtĩ kĩa ũnene makiuga: “Ameni! Goocai Ja!”*+
5 Ningĩ mũgambo ũkiuma gĩtĩ-inĩ kĩu kĩa ũnene ũkiuga: “Goocagai Ngai witũ, inyuĩ ngombo ciake ciothe,+ o inyuĩ mũmwĩtigĩrĩte, arĩa anini o na arĩa anene.”+
6 Na ngĩigua kĩndũ gĩatariĩ ta mũgambo wa kĩrĩndĩ kĩnene na ta mũgambo wa maĩ maingĩ na ta mũgambo wa marurumĩ manene. Makiuga: “Goocai Ja,*+ nĩ gũkorũo Jehova* Ngai witũ, o we Mwene-Hinya-Wothe,+ nĩ ambĩrĩirie gwathana arĩ mũthamaki!+
7 Nĩ tũkenei na tũcanjamũke mũno na tũmũgooce, tondũ ũhiki wa Gatũrũme nĩ mũkinyu nake mũtumia wake nĩ ehaarĩirie.
8 Mũhiki ũcio nĩ etĩkĩrĩtio kwĩhumba nguo irahenia, theru, njega cia gatani—nĩ gũkorũo gatani ĩyo njega ĩrũgamĩrĩire ciĩko cia ũthingu cia arĩa aamũre.”+
9 Na akĩnjĩra atĩrĩ, “Andĩka ũũ: Gũkena nĩ arĩa manyitĩtwo ũgeni iruga-inĩ rĩa hwaĩ-inĩ rĩa ũhiki wa Gatũrũme.”+ Ningĩ, akĩnjĩra: “Icio nĩcio ciugo cia ma cia Ngai.”
10 Ndaigua ũguo ngĩĩgũithia thĩ magũrũ-inĩ make nĩguo ndĩmũthathaiye. No we akĩnjĩra: “Wĩmenyerere! Ndũgeke ũguo!+ Niĩ ndĩ ngombo o tawe o hamwe na ariũ a thoguo arĩa maheetwo wĩra wa kũruta ũira wĩgiĩ Jesu.+ Thathaiya Ngai!+ Nĩ ũndũ kũruta ũira wĩgiĩ Jesu nĩguo muoroto wa ũrathi.”+
11 Ngĩona igũrũ rĩhingũkĩte, na rĩrĩ, haarĩ mbarathi ya rangi mwerũ.+ Nake ũrĩa wamĩikarĩire etagwo Mwĩhokeku+ na wa Ma,+ na atuanagĩra na akarũa mbaara na ũthingu.+
12 Maitho make nĩ rũrĩrĩmbĩ rwa mwaki,+ na mũtwe-inĩ wake arĩ na thũmbĩ nyingĩ ng’emie. Arĩ na rĩĩtwa rĩandĩkĩtwo gũtarĩ mũndũ o na ũrĩkũ ũrĩũĩ tiga we mwene,
13 ehumbĩte nguo ya igũrũ ĩrĩ na tũmeni twa* thakame, na etagwo Kiugo+ kĩa Ngai.
14 Ningĩ, mbũtũ cia igũrũ ciamũrũmĩrĩire cikarĩire mbarathi cia rangi mwerũ, na ciehumbĩte nguo cia rangi mwerũ, theru cia gatani njega.
15 Na kanua-inĩ gake hagacomoka rũhiũ rwa njora rũraihu na rũũgĩ,+ rwa kũhũũra ndũrĩrĩ, na nĩ agaacirĩithia na rũthanju rwa kĩgera.+ Makĩria ma ũguo-rĩ, nĩ akaaranga kĩhihĩro kĩa ndibei kĩa marakara ma mang’ũrĩ ma Ngai Mwene-Hinya-Wothe.+
16 Nguo-inĩ yake ya igũrũ, kĩero-inĩ gĩake, arĩ na rĩĩtwa rĩandĩke, Mũthamaki wa athamaki na Mwathani wa athani.+
17 Ningĩ ngĩona mũraika arũgamĩte riũa-inĩ, na akĩanĩrĩra na mũgambo mũnene akĩra nyoni ciothe iria ciũmbũkagĩra igũrũ gatagatĩ* ũũ: “Ũkai haha, ũnganai hamwe iruga-inĩ rĩrĩa inene rĩa hwaĩ-inĩ rĩa Ngai,+
18 nĩgetha mũrĩe nyama cia athamaki na nyama cia atongoria a mbũtũ na nyama cia andũ marĩ hinya+ na nyama cia mbarathi na nyama cia arĩa macihaicĩte,+ na nyama cia andũ othe, cia arĩa marĩ na wĩyathi na cia ngombo na cia arĩa anini o hamwe na arĩa anene.”
19 Na ngĩona nyamũ ĩrĩa ya gĩthaka na athamaki a thĩ na mbũtũ ciao monganĩte hamwe nĩguo marũe na ũrĩa ũikarĩire mbarathi ĩyo na marũe na mbũtũ yake.+
20 Nayo nyamũ ĩyo ya gĩthaka ĩkĩnyitwo o hamwe na mũnabii wa maheeni+ ũrĩa woonanagia imenyithia mbere yayo cia kũhĩtithia arĩa maamũkĩrĩte rũũri rwa nyamũ ĩyo ya gĩthaka+ na arĩa mathathayagia mũhianano wayo.+ Nake mũnabii ũcio arĩ o muoyo, hamwe na nyamũ ĩyo, magĩikio thĩinĩ wa iria rĩa mwaki wa ũbiriti.+
21 No acio angĩ makĩũragwo na rũhiũ rũraihu rwa njora rũrĩa rwacomokete kanua-inĩ ka ũrĩa waikarĩire mbarathi ĩyo.+ Nacio nyoni ciothe ikĩhũnio nĩ nyama ciao.+
Tũũhoro twa magũrũ-inĩ
^ Kana “Haleluya!” “Ja” nĩ rĩĩtwa Jehova rĩkuhĩhĩtio.
^ Kĩngiriki, por·neiʹa. Rora Ũthathaũri wa Ciugo.
^ Ũkk., “kuuma guoko-inĩ kwa mũmaraya ũcio.”
^ Kana “Haleluya!” “Ja” nĩ rĩĩtwa Jehova rĩkuhĩhĩtio.
^ Kana “Haleluya!” “Ja” nĩ rĩĩtwa Jehova rĩkuhĩhĩtio.
^ Kana “Haleluya!” “Ja” nĩ rĩĩtwa Jehova rĩkuhĩhĩtio.
^ Rora Ũhoro Muongerere A5.
^ Kana hihi, “ĩminjũkĩirũo nĩ.”
^ Kana “rĩera-inĩ gatagatĩ.”
