Kũguũrĩrio kwa Johana 20:1-15
20 Na ngĩona mũraika agĩikũrũka kuuma igũrũ arĩ na cabi ya irima rĩrĩa rĩtarĩ gĩturi*+ na guoko-inĩ gwake anyitĩte mũnyororo mũnene.
2 Akĩnyita ndamathia ĩrĩa,+ na noyo nyoka ĩrĩa ya tene,+ o we wĩtagwo Mũcukani+ na Shaitani,+ akĩmuoha ihinda rĩa mĩaka 1,000.
3 Akĩmũikia irima rĩrĩa rĩtarĩ gĩturi,*+ akĩrĩhinga na akĩrĩĩkĩra mũhũũri, nĩguo ndagacoke kũhĩtithia ndũrĩrĩ rĩngĩ o nginya mĩaka ĩyo 1,000 ĩthire. Thutha ũcio no mũhaka ohorũo o kahinda kanini.+
4 Ningĩ ngĩona itĩ cia ũnene, na arĩa maacikarĩire makĩheo wathani wa gũtuanĩra ciira. Ngĩona mĩoyo* ya arĩa manoragwo* nĩ ũndũ wa ũira ũrĩa maarutire wĩgiĩ Jesu na nĩ ũndũ wa kwaria ũhoro wa Ngai, na arĩa mataathathaĩtie nyamũ ĩyo ya gĩthaka kana mũhianano wayo na mataamũkĩrĩte rũũri rwayo mathiithi-inĩ na guoko-inĩ kwao.+ Magĩcoka muoyo na magĩathana marĩ athamaki hamwe na Kristo+ ihinda rĩa mĩaka 1,000.
5 (Andũ acio angĩ akuũ+ matiacokire muoyo o nginya rĩrĩa mĩaka ĩyo 1,000 yathirire.) Ũcio nĩguo ũriũkio ũrĩa wa mbere.+
6 Gũkena na gũthera nĩ mũndũ o wothe ũkaanyitanĩra harĩ ũriũkio ũcio wa mbere;+ acio gĩkuũ kĩrĩa gĩa kerĩ+ gĩtirĩ na wathani igũrũ rĩao,+ no magaatuĩka athĩnjĩri-Ngai+ a gũtungatĩra Ngai na Kristo, na magaathana marĩ athamaki hamwe nake ihinda rĩa mĩaka ĩyo 1,000.+
7 Na rĩrĩ, mĩaka ĩyo 1,000 yathira o ro ũguo, Shaitani nĩ akoohorũo kuuma kĩoho-inĩ gĩake,
8 nake nĩ agaathiĩ kũhĩtithia ndũrĩrĩ icio irĩ kona-inĩ iria inya cia thĩ, Gogu na Magogu, nĩguo acicokanĩrĩrie hamwe nĩ ũndũ wa mbaara. Mũigana wao ũtariĩ ta mũthanga wa iria.
9 Nao magĩthiĩ kũndũ guothe thĩinĩ wa thĩ na magĩthiũrũrũkĩria kambĩ ya arĩa aamũre o na itũũra rĩrĩa rĩendetwo. No mwaki ũkiuma igũrũ ũkĩmaniina.+
10 Nake Mũcukani ũcio wamahĩtithagia agĩikio thĩinĩ wa iria rĩa mwaki na ũbiriti, kũrĩa nyamũ ĩrĩa ya gĩthaka+ hamwe na mũnabii ũrĩa wa maheeni maarĩ;+ na makaaherithio* mũthenya na ũtukũ tene na tene.
11 Na ngĩona gĩtĩ kĩnene mũno kĩa ũnene kĩa rangi mwerũ na Ũrĩa wagĩikarĩire.+ Nayo thĩ na igũrũ ikĩũra ikĩehera mbere yake,+ na itiacokire kuonerũo handũ rĩngĩ.
12 Na ngĩona akuũ, arĩa anene na anini, marũgamĩte mbere ya gĩtĩ kĩrĩa kĩa ũnene, na ikũnjo ikĩhingũrũo. No gĩkũnjo kĩngĩ gĩkĩhingũrũo; nĩkĩo gĩkũnjo kĩa muoyo.+ Arĩa akuũ magĩtuĩrũo kuumana na maũndũ marĩa maandĩkĩtwo ikũnjo-inĩ icio kũringana na ciĩko ciao.+
13 Narĩo iria rĩkĩruta akuũ arĩa maarĩ thĩinĩ warĩo, na gĩkuũ na Mbĩrĩra* ikĩruta akuũ arĩa maarĩ thĩinĩ wacio, na o mũndũ agĩtuĩrũo kũringana na ciĩko ciake.+
14 Na gĩkuũ na Mbĩrĩra* igĩikio thĩinĩ wa iria rĩu rĩa mwaki.+ Ũguo nĩ kuuga gĩkuũ kĩrĩa gĩa kerĩ,+ iria rĩa mwaki.+
15 Makĩria ma ũguo, mũndũ o wothe ũtaandĩkĩtwo thĩinĩ wa ibuku rĩa muoyo+ nĩ aaikirio iria-inĩ rĩu rĩa mwaki.+
Tũũhoro twa magũrũ-inĩ
^ Kana “abiso.” Rora Ũthathaũri wa Ciugo.
^ Kana “abiso.” Rora Ũthathaũri wa Ciugo.
^ Ũkk., “manoragwo na ithanwa.”
^ Kĩngiriki, psy·kheʹ. Rora Ũthathaũri wa Ciugo na Kũg 6:9 kohoro ka magũrũ-inĩ.
^ Kana “makaagirĩrĩrio; makoohwo.”
^ Kana “Hadesi,” ũguo nĩ kuuga, mbĩrĩra ya mũhaano kũrĩa akuũ makomete. Rora Ũthathaũri wa Ciugo.
^ Kana “Hadesi,” ũguo nĩ kuuga, mbĩrĩra ya mũhaano kũrĩa akuũ makomete. Rora Ũthathaũri wa Ciugo.
