Kũguũrĩrio kwa Johana 21:1-27
21 Na ngĩona igũrũ rĩerũ o na thĩ njerũ;+ nĩ gũkorũo igũrũ rĩrĩa rĩa tene o na thĩ ĩrĩa ya tene nĩ ciathirĩte,+ na iria+ rĩtirĩ kuo rĩngĩ.
2 Ningĩ ngĩona itũũra rĩrĩa itheru, Jerusalemu Njerũ, rĩgĩikũrũka riumĩte igũrũ kũrĩ Ngai+ rĩhaarĩirio ta mũhiki agemeirio mũthuriwe.+
3 Ngĩcoka ngĩigua mũgambo mũnene kuuma gĩtĩ-inĩ kĩrĩa kĩa ũnene woiga: “Atĩrĩrĩ, hema ya Ngai ĩrĩ hamwe na andũ, nake nĩ egũikarania nao, nao matuĩke andũ ake. Nake Ngai we mwene arĩkoragwo hamwe nao.+
4 Na nĩ ekũmagiria maithori mothe mathire maitho-inĩ mao,+ na gĩkuũ gĩtigaacoka gũkorũo kuo rĩngĩ,+ o na gũcakaya kana kĩrĩro kana ruo.+ Maũndũ marĩa ma tene nĩ mathiru.”
5 Nake Ũrĩa waikarĩire gĩtĩ kĩrĩa kĩa ũnene+ akiuga: “Atĩrĩrĩ, nĩ kwerũhia ndĩrerũhia maũndũ mothe.”+ Ningĩ akiuga: “Andĩka, tondũ ciugo icio nĩ cia kwĩhokeka na nĩ cia ma.”
6 Na akĩnjĩra atĩrĩ: “Maũndũ macio nĩ mahingu! Nĩ niĩ Alifa na Omega,* kĩambĩrĩria na kĩrĩkĩrĩro.+ Mũndũ o wothe mũnyotu nĩ ngaamũhe maĩ ma itherũkĩro rĩa maĩ ma muoyo hatarĩ marĩhi.+
7 Mũndũ o wothe ũgũtooria nĩ akaagaya maũndũ macio, na nĩ ngaatuĩka Ngai wake nake atuĩke mũrũ wakwa.
8 No ha ũhoro wa iguoya na arĩa matarĩ wĩtĩkio+ na arĩa matarĩ atheru na marĩ magigi na oragani+ na arĩa meingĩragia thĩinĩ wa ngomanio itagĩrĩire*+ na arĩa mekaga maũndũ ma ũgo na ahoi mĩhianano na arĩa othe maragia maheeni,+ igai rĩao rĩgaakorũo thĩinĩ wa iria rĩrĩa rĩakanaga mwaki na ũbiriti.+ Ũguo nĩ kuuga gĩkuũ kĩrĩa gĩa kerĩ.”+
9 Nake mũraika ũmwe wa arĩa mũgwanja maarĩ na mbakũri iria mũgwanja ciaiyũire mahũũra mũgwanja ma mũico+ agĩũka akĩnjĩra atĩrĩ: “Ũka, na nĩ ngũkuonia mũhiki, mũtumia wa Gatũrũme.”+
10 Kwoguo akĩnguua na hinya wa roho o nginya kĩrĩma-inĩ kĩarĩ kĩnene na kĩraihu na igũrũ, na akĩnyonia Jerusalemu itũũra rĩrĩa itheru rĩgĩikũrũka riumĩte igũrũ kũrĩ Ngai+
11 na rĩarĩ na riri wa Ngai.+ Ũkengu warĩo watariĩ o ta ihiga rĩa goro mũno, ta ihiga rĩa njathibi rĩrahenia ta gĩcicio.+
12 Rĩarĩ na rũthingo rũnene na rũraihu na igũrũ na ihingo 12 na ihingo-nĩ icio kwarĩ na araika 12, ningĩ ihingo-inĩ icio haandĩkĩtwo marĩĩtwa ma mĩhĩrĩga ĩrĩa 12 ya ariũ a Isiraeli.
13 Mwena wa irathĩro warĩ na ihingo ithatũ, mwena wa rũgongo ihingo ithatũ, mwena wa mũhuro ihingo ithatũ, na mwena wa ithũĩro ihingo ithatũ.+
14 Rũthingo rwa itũũra rĩu ningĩ rwarĩ na mahiga 12 ma mũthingi, na igũrũ rĩamo haarĩ na marĩĩtwa 12 ma atũmwo arĩa 12+ a Gatũrũme.
15 Na rĩrĩ, ũcio waaragia na niĩ aanyitĩte ithanjĩ rĩa thahabu rĩa gũthima nĩguo athime itũũra rĩu na ihingo ciarĩo o na rũthingo rwarĩo.+
16 Itũũra rĩu nĩ rĩiganaine mĩena yothe, na ũraihu warĩo nĩ mũnene o ta wariĩ warĩo. Nake agĩthima itũũra rĩu akĩhũthĩra ithanjĩ rĩu, na rĩarĩ rĩa stadia 12,000;* ũraihu warĩo na wariĩ o na ũraihu wa na igũrũ nĩ ciganaine.
17 Ningĩ agĩthima rũthingo rwarĩo, na rwarĩ rwa mĩkono* 144 kũringana na gĩthimi kĩa mũndũ, na ihinda-inĩ o rĩu gĩthimi kĩa mũraika.
18 Rĩu-rĩ, rũthingo rũu rwathondeketwo na njathibi,+ narĩo itũũra rĩu rĩarĩ rĩa thahabu theru o ta gĩcicio gĩtheru biũ.
19 Mĩthingi ya rũthingo rwa itũũra rĩu yagemetio na mĩthemba yothe ya mahiga ma goro: mũthingi wa mbere warĩ wa njathibi, wa kerĩ safia, wa gatatũ kalikedoni, wa kana emeradi,
20 wa gatano sadonikisi, wa gatandatũ saridisi, wa mũgwanja krisolito, wa kanana beroli, wa kenda topazi, wa ikũmi krisoprasi, wa ikũmi na ĩmwe hayacinithi, na wa ikũmi na igĩrĩ amethuthito.
21 Ningĩ ihingo icio 12 ciarĩ ruru 12; o kĩhingo gĩathondeketwo na ruru ĩmwe. Nayo njĩra ĩrĩa nene ya itũũra rĩu yarĩ ya thahabu theru, o ta gĩcicio gĩtheru biũ.
22 Na ndionire hekarũ thĩinĩ warĩo, tondũ Jehova* Ngai Mwene-Hinya-Wothe+ nĩwe hekarũ yarĩo, o nake Gatũrũme no hekarũ yarĩo.
23 Ningĩ itũũra rĩu rĩtibataraga ũtheri wa riũa o na kana wa mweri, nĩ gũkorũo riri wa Ngai nĩguo ũrĩmũrĩkagĩra,+ na tawa warĩo nĩ Gatũrũme.+
24 Nacio ndũrĩrĩ nĩ igaathiaga na ũtheri warĩo,+ nao athamaki a thĩ nĩ makaarehe riri wao thĩinĩ warĩo.
25 Ihingo ciarĩo itikaahingwo mũthenya o na rĩ, nĩ gũkorũo kũu gũtigaakoragwo na ũtukũ.+
26 Na nĩ makaarehe riri na gĩtĩo kĩa ndũrĩrĩ thĩinĩ warĩo.+
27 No kĩndũ o gĩothe kĩrĩ thahu na mũndũ o wothe wĩkaga maũndũ marĩ magigi na mũheenania ndakaarĩtonya o na atĩa;+ arĩa mandĩkĩtwo gĩkũnjo-inĩ kĩa muoyo gĩa Gatũrũme no o magaatonya.+
Tũũhoro twa magũrũ-inĩ
^ Kana “Nĩ niĩ A na nĩ niĩ Z.” Alifa na Omega nĩ ndemwa ya mbere na ya mũico harĩ ndemwa cia Kĩngiriki.
^ Rora Ũthathaũri wa Ciugo.
^ Kilomita ta 2,220 (mairo 1,379). Stadia ĩmwe yaiganaine na mita 185 (fiti 606.95). Rora Ũhoro Muongerere B14.
^ Mita ta 64 (fiti 210). Rora Ũhoro Muongerere B14.
^ Rora Ũhoro Muongerere A5.
