Kũguũrĩrio kwa Johana 7:1-17
7 Thutha ũcio ngĩona araika ana marũgamĩte kona-inĩ iria inya cia thĩ, manyitĩte na makarũmia huho iria inya cia thĩ, nĩguo gũtikagĩe rũhuho rũkũhurutana thĩinĩ wa thĩ, kana iria-inĩ kana igũrũ rĩa mũtĩ o na ũmwe.
2 Ngĩcoka ngĩona mũraika ũngĩ akĩambata oimĩte mwena wa irathĩro, arĩ na mũhũũri wa Ngai ũrĩa ũtũũraga muoyo; na akĩanĩrĩra kũrĩ araika ana arĩa meetĩkĩrĩtio gũthũkia thĩ na iria,
3 akiuga atĩrĩ: “Mũtigathũkie thĩ kana iria o na kana mĩtĩ, nginya twambe tũrĩkie gwĩkĩra ngombo cia Ngai witũ mũhũũri+ mathiithi-inĩ ma cio.”+
4 Na ngĩigua mũigana wa andũ arĩa meekĩrirũo mũhũũri, 144,000,+ arĩa meekĩrirũo mũhũũri kuuma mĩhĩrĩga-inĩ yothe ya ariũ a Isiraeli:+
5 Kuuma mũhĩrĩga wa Juda 12,000 magĩĩkĩrũo mũhũũri;kuuma mũhĩrĩga wa Rubeni 12,000;kuuma mũhĩrĩga wa Gadi 12,000;
6 kuuma mũhĩrĩga wa Asheri 12,000;kuuma mũhĩrĩga wa Nafitali 12,000;kuuma mũhĩrĩga wa Manase+ 12,000;
7 kuuma mũhĩrĩga wa Simeoni 12,000;kuuma mũhĩrĩga wa Lawii 12,000;kuuma mũhĩrĩga wa Isakaru 12,000;
8 kuuma mũhĩrĩga wa Zebuluni 12,000;kuuma mũhĩrĩga wa Jusufu 12,000;kuuma mũhĩrĩga wa Benjamini 12,000 magĩĩkĩrũo mũhũũri.
9 Na rĩrĩ, thutha ũcio ngĩona andũ kĩrĩndĩ kĩnene, arĩa gũtarĩ mũndũ ũngĩahotire gũtara, kuuma ndũrĩrĩ-inĩ ciothe, na mĩhĩrĩga, na ikundi cia andũ, na thiomi,+ marũgamĩte mbere ya gĩtĩ kĩrĩa kĩa ũnene na mbere ya Gatũrũme, mehumbĩte kanjũ cia rangi mwerũ;+ na maanyitĩte makĩndũ na moko.+
10 Na maanagĩrĩra na mũgambo mũnene makoiga: “Ũhonokio uumaga kũrĩ Ngai witũ, o ũcio ũikarĩire gĩtĩ kĩa ũnene,+ na kũrĩ Gatũrũme.”+
11 Nao araika othe maarũgamĩte mathiũrũrũkĩirie gĩtĩ kĩu kĩa ũnene o hamwe na athuri acio,+ na ciũmbe iria inya, na makĩĩgũithia magĩturumithia mothiũ mao thĩ mbere ya gĩtĩ kĩu kĩa ũnene magĩthathaiya Ngai,
12 makiugaga ũũ: “Ameni! Rũgooco na riri na ũũgĩ na ngatho na gĩtĩo na hinya na ũhoti irotuĩka cia Ngai witũ tene na tene.+ Ameni.”
13 Na ũmwe wa athuri acio akĩnjũria atĩrĩ: “Andũ aya mehumbĩte kanjũ cia rangi mwerũ+ nĩa, na moimĩte kũ?”
14 Na niĩ ngĩmwĩra o hĩndĩ ĩyo atĩrĩ: “Mwathi wakwa, wee nĩwe ũĩ.” Nake akĩnjĩra ũũ: “Aya nĩ arĩa moimĩte thĩna-inĩ ũrĩa mũnene,+ na nĩ mathambĩtie kanjũ ciao na thakame ya Gatũrũme+ igatuĩka cia rangi mwerũ.
15 Nĩkĩo marĩ mbere ya gĩtĩ kĩa ũnene kĩa Ngai, na mamũrutagĩra ũtungata mũtheru mũthenya na ũtukũ thĩinĩ wa hekarũ yake; nake Ũcio ũikarĩire gĩtĩ kĩa ũnene+ nĩ agaatambũrũkia hema yake igũrũ rĩao.+
16 Nao matikaahũta kana manyote rĩngĩ, o na matigaacinwo nĩ riũa kana ũrugarĩ o na ũrĩkũ mũnene,+
17 tondũ Gatũrũme,+ o ũcio ũrĩ gatagatĩ-inĩ ga gĩtĩ kĩrĩa kĩa ũnene, nĩ akaamarĩithagia+ na akamatongoria akamatwara matherũkĩro-inĩ ma maĩ ma muoyo.+ Nake Ngai nĩ akaagiria maithori mothe kuuma maitho-inĩ mao.”+
