Kũguũrĩrio kwa Johana 9:1-21
9 Nake mũraika wa gatano akĩhuuha karumbeta gake.+ Na ngĩona njata yagũĩte thĩ kuuma igũrũ, na akĩnengerũo cabi cia irima rĩrĩa rĩtarĩ gĩturi.*+
2 Akĩhingũra irima rĩu rĩtarĩ gĩturi, na rĩkiuma ndogo yatariĩ ta ndogo ya riiko inene, narĩo riũa rĩkĩgĩa nduma,+ o hamwe na rĩera, nĩ ũndũ wa ndogo ya irima rĩu.
3 Na ngigĩ ikiuma ndogo-inĩ ĩyo igĩthiĩ thĩinĩ wa thĩ,+ na ikĩheo wathani, wathani ta ũrĩa tũng’aurũ twa thĩ tũkoragwo naguo.
4 Ikĩrũo itigathũkie nyeki ya gũkũ thĩ kana mũmera o wothe o na kana mũtĩ, o tiga andũ arĩa matarĩ na mũhũũri wa Ngai mathiithi-inĩ mao.+
5 Na ngigĩ icio igĩtĩkĩrio kũmaherithia mĩeri ĩtano no ti kũmoraga, na iherithia rĩacio rĩatariĩ ta iherithia rĩa kang’aurũ+ rĩrĩa gatheca mũndũ.
6 Matukũ-inĩ macio andũ nĩ magaacaria gĩkuũ no matigaakĩona o na atĩa, na nĩ makerirĩria gũkua, no gĩkuũ nĩ gĩkaamorĩra.
7 Na mũhianĩre wa ngigĩ icio watariĩ ta wa mbarathi ihaarĩirio nĩ ũndũ wa mbaara;+ igũrũ rĩa mĩtwe yacio ciarĩ na kĩndũ gĩatariĩ ta thũmbĩ cia thahabu, na mothiũ ma cio maatariĩ ta ma andũ,
8 no ciarĩ na njuĩrĩ ta ya atumia. Namo magego ma cio maatariĩ ta ma mĩrũthi,+
9 ningĩ ciarĩ na ngo cia kũgitĩra gĩthũri itariĩ ta ngo cia kũgitĩra gĩthũri cia kĩgera. Na mũgambo wa mathagu ma cio watariĩ ta mũgambo wa ngaari cia mbarathi iteng’erete cierekeire mbaara-inĩ.+
10 Ningĩ irĩ na mĩting’oe ĩrĩ na mboora ta tũng’aurũ, na wathani wacio wa gũtuurithia andũ ihinda rĩa mĩeri ĩtano+ ũrĩ mĩting’oe-inĩ yacio.
11 Na irĩ na mũthamaki ũraciatha, nĩwe mũraika wa irima rĩrĩa rĩtarĩ gĩturi.*+ Rĩĩtwa rĩake na Kĩhibirania nĩ Abadoni,* no na Kĩngiriki etagwo Apolioni.*
12 Haaro ĩmwe nĩ yahĩtũka. No rĩrĩ, harĩ na haaro ingĩ igĩrĩ+ iroka thutha wa maũndũ macio.
13 Nake mũraika wa gatandatũ+ akĩhuuha karumbeta gake.+ Na ngĩigua mũgambo ũmwe kuuma harĩ hĩa cia kĩgongona gĩa thahabu+ kĩrĩa kĩrĩ mbere ya Ngai
14 woiga ũũ kũrĩ mũraika ũcio wa gatandatũ warĩ na karumbeta: “Ohora araika arĩa ana mohetwo rũũĩ-inĩ rũrĩa rũnene rwa Farati.”+
15 Na araika acio ana arĩa mahaarĩirio nĩ ũndũ wa ithaa na mũthenya na mweri o na mwaka makĩohorũo nĩguo morage gĩcunjĩ gĩa ithatũ kĩa andũ.
16 Na mũigana wa mbũtũ iria ciahaicĩte mbarathi warĩ 20,000 maita 10,000;* nĩ ndaiguire mũigana wacio.
17 Na ũũ nĩguo mbarathi icio ndonire thĩinĩ wa kĩoneki ciatariĩ o hamwe na acio maacikarĩire: Maarĩ na ngo cia kũgitĩra gĩthũri cia rangi mũtune o ta mwaki, na wa mburuu ngwatu o na wa yerũ, na mĩtwe ya mbarathi icio yatariĩ ta mĩtwe ya mĩrũthi,+ na tũnua-inĩ twacio hooimaga mwaki na ndogo na ũbiriti.
18 Na gĩcunjĩ gĩa ithatũ kĩa andũ makĩũragwo nĩ mahũũra macio matatũ, mwaki na ndogo na ũbiriti iria cioimaga tũnua-inĩ twacio.
19 Nĩ gũkorũo wathani wa mbarathi icio ũrĩ tũnua-inĩ twacio o na mĩting’oe-inĩ yacio, tondũ mĩting’oe yacio ĩtariĩ ta nyoka na ĩrĩ na mĩtwe, na nĩ ituurithagia andũ nayo.
20 No andũ arĩa angĩ matooragirũo nĩ mahũũra macio matieririre mawĩra ma moko mao; matiatigire gũthathaiya ndaimono na mĩhianano ya thahabu na betha na gĩcango na mahiga na mbaũ, ĩrĩa ĩtangĩhota kuona kana kũigua kana gwĩtwara.+
21 O na matieririre ciĩko ciao cia ũũragani kana cia ũragũri kana cia ngomanio itagĩrĩire* o na kana cia ũici.
Tũũhoro twa magũrũ-inĩ
^ Kana “abiso.” Rora Ũthathaũri wa Ciugo.
^ Rĩĩtwa rĩu riugĩte “Mũniinani.”
^ Rĩĩtwa rĩu riugĩte “Mwanangĩko.”
^ Kana “abiso.” Rora Ũthathaũri wa Ciugo.
^ Ũguo nĩ kuuga, 200,000,000.
^ Kĩngiriki, por·neiʹa. Rora Ũthathaũri wa Ciugo.
