Marũa Kũrĩ Afilipi 4:1-23
4 Nĩ ũndũ ũcio-rĩ, inyuĩ ariũ a Ithe witũ nyendete mũno na ndĩrerirĩria kuona, o inyuĩ gĩkeno gĩakwa na thũmbĩ yakwa,+ rũgamai mwĩhandĩte+ na njĩra ĩyo thĩinĩ wa Mwathani, inyuĩ endwa akwa.
2 Ndĩrathaitha Yudia na ngathaitha Sintike makoragwo na mwĩcirĩrie ũmwe thĩinĩ wa Mwathani.+
3 Ĩni, o nawe ndagũthaitha, tondũ ũrĩ mũrutithania wĩra hamwe na niĩ kũna,* ũthiĩ na mbere gũteithia atumia acio merutanĩirie mũno* hamwe na niĩ nĩ ũndũ wa ũhoro ũrĩa mwega, o hamwe na Klementi na acio angĩ tũrutithanagia wĩra nao, arĩa marĩĩtwa mao marĩ ibuku-inĩ rĩa muoyo.+
4 Hingo ciothe kenagai thĩinĩ wa Mwathani. O rĩngĩ nguuga, Kenagai!+
5 Rekei ũigananĩru wanyu+ ũmenyekage nĩ andũ othe. Mwathani arĩ hakuhĩ.
6 Mũtigatangĩkage nĩ ũndũ o na ũrĩkũ,+ no maũndũ-inĩ mothe menyithagiai Ngai maũndũ marĩa mũbataraga kũgerera mahoya na mathaithana o hamwe na gũcokia ngatho;+
7 naguo thayũ+ wa Ngai ũrĩa ũkĩrĩte ũtaũku wothe nĩ ũrĩgitagĩra ngoro cianyu+ na ũhoti wanyu wa gwĩciria* kũgerera Kristo Jesu.
8 Ngĩrĩkĩrĩria ariũ a Ithe witũ-rĩ, maũndũ o mothe ma ma, maũndũ o mothe ma bata, maũndũ o mothe ma ũthingu, maũndũ o mothe matheru, maũndũ o mothe ma kwendeka, maũndũ o mothe matĩĩku, maũndũ o mothe mega, na maũndũ o mothe ma kũgaathĩrĩrio, thiĩi na mbere gwĩciragia* maũndũ macio.+
9 Maũndũ marĩa mwerutire na mũgĩĩtĩkĩra na mũkĩigua na mũkĩona ũhoro-inĩ wakwa, mekagei,+ nake Ngai wa thayũ nĩ arĩkoragwo hamwe na inyuĩ.
10 Nĩ ndĩrakena mũno thĩinĩ wa Mwathani kuona atĩ rĩu nĩ mũrurumũkĩtie ũhoro wa kũnũmbũiya.+ O na gũtuĩka nĩ mwanũmbũyagia, mũtiarĩ na mweke wa gwĩka ũguo.
11 Ndiroiga ũguo tondũ atĩ ndĩ na bata, nĩ gũkorũo nĩ ndĩrutĩte kũiganĩra gũtekũmakania ũrĩa maũndũ makwa matariĩ.+
12 Nĩ njũĩ gũikara itarĩ na indo nyingĩ+ na gũikara ndĩ na indo nyingĩ. Maũndũ-inĩ mothe na ũrĩa wothe kũngĩkorũo gũtariĩ nĩ ndĩrutĩte hitho ya gũikara hũniĩ na gũikara hũtiĩ, gũkorũo na indo nyingĩ na gũkorũo itarĩ.
13 Maũndũ-inĩ mothe nĩ ngoragwo na hinya kũgerera ũrĩa ũũheaga hinya.+
14 No rĩrĩ, nĩ mwekire wega nĩ kũnyitanĩra na niĩ thĩna-inĩ wakwa.
15 Na rĩrĩ, inyuĩ Afilipi ningĩ nĩ mũĩ atĩ rĩrĩa mwerutire ũhoro ũrĩa mwega riita rĩa mbere, ndoima Makedonia, gũtirĩ kĩũngano kĩngĩ kĩanyitanĩire na niĩ ũhoro-inĩ wĩgiĩ kũheana na kwamũkĩra, tiga o inyuĩ;+
16 tondũ rĩrĩa ndarĩ Thesalonike, nĩ mwandũmĩire kĩndũ nĩ ũndũ wa mabataro makwa, na to riita rĩmwe, ĩndĩ nĩ maita merĩ.
17 Ti atĩ nĩ kĩheo ndĩracaria, no ndĩrenda maciaro marĩa mekuongerera uumithio mũthithũ-inĩ wanyu.
18 No rĩrĩ, ndĩ na kĩrĩa gĩothe ndĩrabatara, o na makĩria. Ndĩ na indo ciothe, tondũ nĩ nyamũkĩrĩte kuuma kũrĩ Epafrodito+ kĩrĩa mũrandũmĩire, mũtararĩko mwega,+ igongona rĩretĩkĩrĩka, na rĩrakenia Ngai.
19 Nake Ngai wakwa nĩ arĩmũheaga biũ mabataro manyu mothe+ kũringana na ũtonga wake ũrĩ riri kũgerera Kristo Jesu.
20 Rĩu-rĩ, Ngai o we Ithe witũ arogoocwo tene na tene. Ameni.
21 Ngeithĩriai mũndũ o wothe mwamũre ũrĩ na ũiguano na Kristo Jesu. Ariũ a Ithe witũ arĩa tũrĩ nao nĩ mamũgeithia.
22 Arĩa othe aamũre, na makĩria arĩa a nyũmba ya Kaisari,+ nĩ mamũgeithia.
23 Ũtugi mũnene wa Mwathani Jesu Kristo ũroikara na roho ũrĩa muonanagia.
Tũũhoro twa magũrũ-inĩ
^ Ũkk., “mũrutithania wĩra hamwe na niĩ kũna icoki-inĩ rĩmwe.”
^ Kana “acio mathĩnĩkĩte mũno.”
^ Kana “meciria manyu.”
^ Kana “gwĩcũranagia.”
