Kũrĩ Aroma 1:1-32
1 Nĩ niĩ Paulo, ngombo ya Kristo Jesu, o niĩ ndetirũo nduĩke mũtũmwo na ngĩamũrũo hunjagie ũhoro ũrĩa mwega wa Ngai,+
2 ũhoro ũrĩa eeranĩire o mbere kũgerera anabii ake thĩinĩ wa Maandĩko marĩa matheru,
3 wĩgiĩ Mũrũ wake, ũrĩa woimanire na mbeũ ya* Daudi+ na njĩra ya kĩĩmwĩrĩ,
4 no kũgerera hinya akĩmenyithanio atĩ nĩ Mũrũ wa Ngai+ kũringana na roho wa ũtheru rĩrĩa aariũkirio kuuma kũrĩ arĩa akuũ.+ Ũcio nĩwe Jesu Kristo, Mwathani witũ.
5 Kũgerera harĩ we nĩ twaamũkĩrire ũtugi mũnene na tũgĩtuwo atũmwo+ nĩguo andũ a ndũrĩrĩ ciothe mamwathĩkĩre na monanie wĩtĩkio+ nĩgetha matĩage rĩĩtwa rĩake,
6 ndũrĩrĩ-inĩ iria o na inyuĩ mwĩtĩtwo mũtuĩke a Jesu Kristo—
7 kũrĩ inyuothe mũrĩ Roma mwendetwo nĩ Ngai, inyuĩ mwĩtĩtwo mũtuĩke aamũre:
Mũrogĩa na ũtugi mũnene na thayũ kuuma kũrĩ Ngai Ithe witũ, na Mwathani Jesu Kristo.
8 Wa mbere, ngwenda gũcokeria Ngai wakwa ngatho kũgerera harĩ Jesu Kristo nĩ ũndũ wanyu inyuothe, tondũ wĩtĩkio wanyu nĩ ũrario ũhoro waguo thĩinĩ wa thĩ yothe.
9 Nĩ gũkorũo Ngai ũrĩa ndutagĩra ũtungata mũtheru na roho wakwa na njĩra ya kũhunjia ũhoro ũrĩa mwega wa Mũrũ wake, nĩ mũira wakwa atĩ ndiagaga kũmũgweta mahoya-inĩ makwa hingo ciothe,+
10 ngĩthaithanaga atĩ angĩkorũo no kũhoteke, njũke kũrĩ inyuĩ rĩu nĩ ũndũ wa wendi wa Ngai.
11 Nĩ gũkorũo nĩ ndĩrerirĩria kũmuona, nĩguo ndĩmũgaĩre kĩheo gĩa kĩĩroho nĩgetha mũgĩe na hinya;
12 ũguo nĩ kuuga, twĩkĩrane ngoro+ kũgerera wĩtĩkio wa o mũndũ, wanyu na wakwa.
13 No rĩrĩ, ariũ a Ithe witũ, ndikwenda mwage kũmenya atĩ, nĩ mahinda maingĩ ndanenda gũka kũrĩ inyuĩ—no ngoretwo ngĩgirĩrĩrio nginyagia rĩu—nĩgetha ngĩe na maciaro nginya gatagatĩ-inĩ kanyu o ta ũrĩa ngĩĩte namo gatagatĩ-inĩ ka ndũrĩrĩ iria ingĩ.
14 Ndĩ na thiirĩ kũrĩ Angiriki na andũ a kũngĩ,* kũrĩ arĩa ogĩ na arĩa matarĩ athomu;
15 nĩ ũndũ ũcio nĩ ndĩrerirĩria mũno kũmũhunjĩria ũhoro ũrĩa mwega o na inyuĩ mũrĩ kũu Roma.+
16 Tondũ ndiconokagĩra ũhoro ũrĩa mwega;+ ũrĩa kũrĩ nĩ atĩ, ũcio nĩguo hinya wa Ngai wa kũhonokania harĩ mũndũ o wothe ũrĩ na wĩtĩkio,+ mbere kũrĩ Mũyahudi+ na ningĩ kũrĩ Mũngiriki.+
17 Nĩ gũkorũo thĩinĩ waguo ũthingu wa Ngai nĩ ũguũragio kũgerera wĩtĩkio na nĩ ũndũ wa wĩtĩkio,+ o ta ũrĩa kwandĩkĩtwo atĩrĩ: “Ĩndĩ mũndũ ũrĩa mũthingu agaatũũra nĩ ũndũ wa wĩtĩkio.”+
18 Tondũ mang’ũrĩ ma Ngai+ nĩ maraguũrio kuuma igũrũ makerekerio harĩ maũndũ mothe matarĩ ma ũngai na matarĩ ma ũthingu ma andũ arĩa magiragĩrĩria ũhoro ũrĩa wa ma+ na njĩra ĩtarĩ ya ũthingu,
19 nĩ gũkorũo maũndũ marĩa mangĩmenyeka megiĩ Ngai nĩ mamoĩ wega, tondũ Ngai nĩ amamenyithĩtie.+
20 Tondũ ngumo ciake iria itonekaga na maitho, nĩcio hinya wake wa tene na tene+ na Ũngai wake,+ nĩ cionekaga wega kuuma o hĩndĩ ĩrĩa thĩ yombirũo, nĩ gũkorũo nĩ cionekaga kũgerera indo iria ciũmbĩtwo,+ ũũ atĩ matingĩkorũo na kĩĩgwatio.
21 Tondũ o na gũtuĩka nĩ maamenyete Ngai, matiamũgoocire arĩ we Ngai o na kana makĩmũcokeria ngatho, ĩndĩ mĩĩcirĩrie yao yatuĩkire ya tũhũ, nacio ngoro ciao itarĩ na wĩcirio ikĩgĩa nduma.+
22 O na gũtuĩka mooigaga atĩ nĩ ogĩ, maatuĩkire irimũ
23 naguo riri wa Ngai o we ũtangĩkua makĩwerekeria kũrĩ kĩndũ gĩtariĩ ta mũhianano wa mũndũ wa kũbutha na nyoni na nyamũ cia magũrũ mana na ciũmbe iria itambaga thĩ.+
24 Kwoguo nĩ ũndũ wao kwenda kũrũmĩrĩra merirĩria ma ngoro ciao, Ngai akĩmatiganĩria harĩ maũndũ matarĩ matheru, nĩguo mĩĩrĩ yao yagĩrũo gĩtĩo gatagatĩ-inĩ kao.
25 Magĩkũũrania ũhoro wa ma wa Ngai na maheeni ningĩ magĩthathaiya indo iria ciũmbĩtwo na magĩcirutĩra ũtungata mũtheru handũ ha Mũũmbi, ũrĩa ũgoocagwo tene na tene. Ameni.
26 Nĩkĩo Ngai aamarekereirie marũmagĩrĩre merirĩria ma maũndũ ma thoni ma ngomanio,+ nĩ gũkorũo atumia arĩa maarĩ gatagatĩ-inĩ kao nĩ maagarũrire mũtugo wao wa ndũire makĩambĩrĩria gwĩka maũndũ matarĩ ma ndũire;+
27 o nao arũme nĩ maatiganire na mũtugo wao wa ndũire* na atumia na makĩhĩahĩa nĩ thuti nene kwerekera arũme arĩa angĩ, arũme kwa arũme,+ magĩkaga maũndũ ma ũũra-thoni na thĩinĩ wao makĩamũkĩra marĩhi mao mothe, marĩa maagĩrĩire mehia mao.+
28 O ta ũrĩa matoonire harĩ bata gwĩtĩkĩra Ngai,* Ngai akĩmarekereria mathiĩ na mbere na mwĩcirĩrie ũrĩa aregete, mekage maũndũ matagĩrĩire.+
29 Nao makĩiyũrũo nĩ maũndũ mothe matarĩ ma ũthingu,+ waganu, ũkoroku,*+ na ũũru, makĩiyũrũo nĩ ũiru,+ ũũragani,+ ngũĩ, maheeni,+ na kwenda gwĩka arĩa angĩ ũũru,+ andũ a njukũ,*
30 acambania,+ andũ mathũire Ngai, matarĩ gĩtĩo, etĩi, egaathi, arĩa mathugundaga maũndũ moru, matathĩkagĩra aciari,+
31 matarĩ ũtaũku,+ matahingagia irĩko, matarĩ wendo wa ndũire, na matarĩ tha.
32 O na gũtuĩka nĩ moĩ wega biũ watho ũrĩa mũthingu wa Ngai—atĩ arĩa mekaga maũndũ ta macio magĩrĩire gũkua+—mathiaga na mbere kũmeka o na magetĩkania na arĩa mekaga maũndũ macio.
Tũũhoro twa magũrũ-inĩ
^ Kana “rũciaro rwa.”
^ Kana “arĩa matarĩ Angiriki.” Ũkk., “abaribari.”
^ Kana “ngomanio cia ndũire.”
^ Kana “matoonire arĩ wega kũgĩa na ũmenyo wa ma wĩgiĩ Ngai.”
^ Kana “mũcene.”
^ Kana “gũcumĩkĩra.”
