Kũrĩ Aroma 14:1-23
14 Amũkagĩrai mũndũ ũrĩa ũtarĩ na hinya wĩtĩkio-inĩ wake,+ na mũtigatuagĩre mũndũ nĩ ũndũ wa gũkorũo na mawoni ngũrani.*
2 Kũrĩ mũndũ wĩtĩkio wake ũmwĩtĩkagĩria kũrĩa indo ciothe, no mũndũ ũtarĩ na hinya arĩaga o nyeni.
3 Mũndũ ũrĩa ũrĩaga ndakanyarare ũrĩa ũtarĩaga, nake ũrĩa ũtarĩaga ndagatuĩre ũrĩa ũrĩaga,+ nĩ gũkorũo Ngai nĩ amwamũkĩrĩte.
4 Wee ũrĩ ũ nĩguo ũtuĩre ndungata ya mũndũ ũngĩ?+ Mwathi wayo nĩwe ũmenyaga rĩrĩa ĩrũgamĩte kana rĩrĩa ĩgwĩte.+ Hatarĩ nganja nĩ ĩkaarũgama nĩ gũkorũo Jehova* no ahote gũtũma ĩrũgame.
5 Mũndũ ũmwe atuaga mũthenya ũmwe ũrĩ wa bata gũkĩra ĩrĩa ĩngĩ;+ nake ũngĩ atuaga mũthenya ũmwe ũrĩ ũndũ ũmwe na ĩyo ĩngĩ yothe;+ rekei o mũndũ akoragwo na ũũma biũ meciria-inĩ make.
6 Mũndũ ũrĩa wonaga mũthenya mũna ũrĩ wa bata awonaga ũguo nĩ ũndũ wa Jehova.* Ningĩ, ũrĩa ũrĩaga, arĩaga nĩ ũndũ wa Jehova,* tondũ nĩ acokagĩria Ngai ngatho;+ nake ũrĩa ũtarĩaga, agaga kũrĩa nĩ ũndũ wa Jehova,* na no acokagĩria Ngai ngatho.+
7 Gũtirĩ mũndũ o na ũmwe witũ ũtũũraga no ũndũ wake mwene,+ na gũtirĩ mũndũ ũkuaga no ũndũ wake mwene.
8 Nĩ gũkorũo twatũũra, tũtũũraga nĩ ũndũ wa Jehova,*+ na twakua, tũkuaga nĩ ũndũ wa Jehova.* Kwoguo-rĩ, o na twatũũra kana tũkue, tũrĩ a Jehova.*+
9 Na nĩkĩo gĩatũmire Kristo akue na acoke muoyo rĩngĩ, nĩguo atuĩke Mwathani wa arĩa makuĩte na arĩa marĩ muoyo.+
10 No nĩ kĩĩ gĩtũmaga ũtuĩre mũrũ wa Ithe wanyu?+ Kana nĩ kĩĩ gĩtũmaga ningĩ ũnyarare mũrũ wa Ithe wanyu? Nĩ gũkorũo ithuothe nĩ tũkaarũgama mbere ya gĩtĩ gĩa ciira kĩa Ngai.+
11 Tondũ nĩ kwandĩke atĩrĩ: “Jehova* oigĩte ũũ: ‘O ta ũrĩa niĩ ndũũraga muoyo,+ maru mothe nĩ magaaturio mbere yakwa, na nĩmĩ ciothe nĩ ikoimbũra Ngai mbere ya andũ.’”+
12 Kwoguo-rĩ, o ũmwe witũ nĩ akaarũgama mbere ya Ngai atuĩrũo kũringana na ciĩko ciake.+
13 Nĩ ũndũ ũcio-rĩ, tũtigacoke gũtuanĩra,+ no handũ ha ũguo, nĩ twĩrutanĩrie kwaga kũigĩra mũrũ wa Ithe witũ mũhĩnga kana ũndũ ũngĩtũma agwe.+
14 Niĩ nĩ njũĩ na ndĩ na ũũma thĩinĩ wa Mwathani Jesu atĩ gũtirĩ kĩndũ gĩtarĩ gĩtheru kĩo kĩene;+ no hĩndĩ ĩrĩa mũndũ atua atĩ kĩndũ ti gĩtheru, harĩ we ti gĩtheru.
15 Nĩ ũndũ angĩkorũo mũrũ wa Ithe wanyu nĩ araigua ũũru tondũ wa irio iria ũrarĩa-rĩ, wee nĩ ũtigĩte gũthiĩ na njĩra ya wendo.+ Ndũkanange* mũndũ ũcio wakuĩrĩirũo nĩ Kristo nĩ ũndũ wa irio iria ũrarĩa.+
16 Nĩ ũndũ ũcio-rĩ, mũtigatũme maũndũ mega marĩa mwĩkaga maragio na njĩra njũru.
17 Nĩ gũkorũo Ũthamaki wa Ngai ndũkoniĩ kũrĩa na kũnyua,+ no ũkoniĩ ũthingu na thayũ na gĩkeno tũrĩ na roho mũtheru.
18 Tondũ mũndũ o wothe ũkoragwo arĩ ngombo ya Kristo na njĩra ĩyo nĩ etĩkagĩrũo nĩ Ngai na agatĩo nĩ andũ.
19 Nĩ ũndũ ũcio-rĩ, nĩ tũthingatagei maũndũ marĩa mangĩrehe thayũ+ na maũndũ ma gwaka arĩa angĩ.+
20 Tigai gũtharũria wĩra wa Ngai no ũndũ tu wa irio.+ Nĩ ma, indo ciothe nĩ theru, no nĩ ũũru mũndũ kũrĩa kĩndũ gĩkũhĩngithia mũndũ ũrĩa ũngĩ.+
21 Nĩ kaba kwaga kũrĩa nyama kana kũnyua ndibei kana gwĩka ũndũ ũngĩ o wothe ũrĩa ũngĩhĩngithia mũrũ wa Ithe wanyu.+
22 Wĩtĩkio ũrĩa ũrĩ naguo, wĩikaragĩre naguo mbere ya Ngai. Gũkena-rĩ, nĩ mũndũ ũrĩa ũtetuagĩra kuumana na ũrĩa onaga kwagĩrĩire.
23 No angĩkorũo na nganja acoke arĩe nĩ arĩkĩtie gũtuĩrũo, tondũ kũrĩa gwake gũtiumanĩte na wĩtĩkio. Ti itherũ, ũndũ o wothe ũtoimanĩte na wĩtĩkio nĩ mehia.
Tũũhoro twa magũrũ-inĩ
^ Kana hihi, “ciũria cia na thĩinĩ.”
^ Rora Ũhoro Muongerere A5.
^ Rora Ũhoro Muongerere A5.
^ Rora Ũhoro Muongerere A5.
^ Rora Ũhoro Muongerere A5.
^ Rora Ũhoro Muongerere A5.
^ Rora Ũhoro Muongerere A5.
^ Rora Ũhoro Muongerere A5.
^ Rora Ũhoro Muongerere A5.
^ Kana “Ndũgathũkie.”
