Kũrĩ Aroma 3:1-31
3 Gũkĩrĩ ũguo-rĩ, Mũyahudi akĩrĩte andũ arĩa angĩ na kĩĩ, kana ũguni wa kũrua nĩ ũrĩkũ?
2 Ũguni nĩ mũnene na njĩra ciothe. Wa mbere, acio nĩo meehokeirũo ndũmĩrĩri theru cia Ngai.+
3 Hihi ũhoro ũgĩtariĩ atĩa? Korũo amwe ao matiarĩ na wĩtĩkio-rĩ, hihi gũkorũo matarĩ na wĩtĩkio no gũtũme Ngai akorũo atarĩ mwĩhokeku?
4 Aca o na hanini! Ĩndĩ Ngai nĩ oneke atĩ nĩ wa ma,+ o na angĩkorũo andũ othe mekuoneka atĩ nĩ a maheeni,+ o ta ũrĩa kwandĩkĩtwo atĩrĩ: “Nĩguo wonekage atĩ wĩ mũthingu kũgerera ciugo ciaku na ũkahootanaga rĩrĩa ũratuĩrũo.”+
5 No rĩrĩ, angĩkorũo kwaga ũthingu gwitũ gũtũmaga ũthingu wa Ngai woneke-rĩ, tũkiuge atĩa? Kaĩ Ngai akĩagaga kĩhooto rĩrĩa ekuonania mang’ũrĩ make? (Ndĩraria o ta ũrĩa andũ maragia.)
6 Gũtingĩhoteka! Angĩkorũo nĩ ũguo-rĩ, Ngai agaagĩtuĩra thĩ atĩa?+
7 No angĩkorũo kũgerera maheeni makwa ũhoro wa ma wa Ngai nĩ wonekete wega makĩria na akagĩa na riri-rĩ, ndĩragĩtuĩrũo atĩ o na niĩ ndĩ mwĩhia nĩkĩ?
8 Kaĩ tũtangĩkiuga o ũrĩa andũ amwe maheenanagia atĩ ithuĩ tuugaga, “Nĩ twĩkagei maũndũ moru nĩguo marĩa mega moke”? Ituĩro rĩrĩa andũ acio magaatuĩrũo nĩ rĩringaine na kĩhooto.+
9 Tũkiuge atĩa? Hihi ithuĩ tũrĩ egega? Aca o na hanini! Tondũ hau mbere nĩ tuonanĩtie atĩ Ayahudi o hamwe na Angiriki, othe marĩ rungu rwa mehia;+
10 o ta ũrĩa kwandĩkĩtwo atĩrĩ: “Gũtirĩ mũndũ mũthingu, gũtirĩ o na ũmwe;+
11 gũtirĩ mũndũ ũrĩ na ũtaũku o na mũnini; gũtirĩ mũndũ ũcaragia Ngai.
12 Andũ othe nĩ magarũrũkĩte na kũngĩ, othe matuĩkĩte a tũhũ; gũtirĩ mũndũ wonanagia ũtugi, gũtirĩ o na ũmwe.”+
13 “Mũmero wao nĩ mbĩrĩra ĩtarĩ hinge; nĩ maheenanĩtie na nĩmĩ ciao.”+ “Mĩromo yao ĩkoragwo na thumu wa nyoka.”+
14 “Na kanua kao kaiyũire irumi na marũrũ.”+
15 “Magũrũ mao mahiũhaga nĩguo magaite thakame.”+
16 “Njĩra ciao ikoragwo na mwanangĩko na kĩeha,
17 na matimenyete njĩra ya thayũ.”+
18 “Ũhoro wa gwĩtigĩra Ngai ndũrĩ maitho-inĩ mao.”+
19 Rĩu nĩ tũĩ atĩ maũndũ mothe marĩa Watho uugaga, ũkoragwo ũkĩra arĩa marĩ rungu rwa Watho, nĩguo kanua o gothe gakirio na thĩ yothe ĩtuĩke ya kũherithio nĩ Ngai.+
20 Nĩ ũndũ ũcio, gũtirĩ mũndũ* o na ũmwe ũgaatuwo mũthingu mbere yake nĩ ũndũ wa ciĩko cia watho,+ tondũ kũgerera watho nĩ tũgĩaga na ũmenyo wa ma wĩgiĩ mehia.+
21 No rĩu ũthingu wa Ngai nĩ ũguũrĩtio hatarĩ watho,+ kũringana na ũira ũrĩa ũrĩ thĩinĩ wa Watho na Anabii,+
22 ĩni, ũthingu wa Ngai kũgerera wĩtĩkio thĩinĩ wa Jesu Kristo, harĩ arĩa othe marĩ na wĩtĩkio. Tondũ gũtirĩ mũthutũkanio.+
23 Nĩ gũkorũo andũ othe nĩ mehĩtie na makanyihĩrũo nĩ riri wa Ngai,+
24 na nĩ kĩheo maheagwo o ũguo tũhũ+ gũkorũo atĩ nĩ matuagwo athingu nĩ ũndũ wa ũtugi wake mũnene+ na njĩra ya kũrekererio kũgerera ũkũũri ũrĩa warĩhirũo nĩ Kristo Jesu.+
25 Ngai aamũneanire arĩ igongona rĩa ũiguano*+ kũgerera wĩtĩkio harĩ thakame yake.+ Eekire ũguo nĩguo onanie ũthingu wake mwene, nĩ gũkorũo Ngai nĩ ũndũ wa ũkirĩrĩria wake, nĩ kuohera oohagĩra mehia marĩa meekirũo tene.
26 Eekire ũguo nĩguo onanie ũthingu wake mwene+ ihinda-inĩ rĩrĩ, nĩguo akorũo arĩ mũthingu nginya rĩrĩa aratua mũndũ ũrĩa wonanagia wĩtĩkio harĩ Jesu atĩ nĩ mũthingu.+
27 Kwĩraha gũkĩrĩ ha? Ti gwĩtĩkĩrie o na hanini. Nĩ ũndũ wa watho ũrĩkũ? Hihi nĩ ũrĩa wa ciĩko?+ Aca, no nĩ ũndũ wa watho ũrĩa wa wĩtĩkio.
28 Nĩ gũkorũo ithuĩ tũĩ atĩ mũndũ atuagwo mũthingu nĩ ũndũ wa wĩtĩkio hatarĩ ciĩko cia watho.+
29 Kana hihi we nĩ Ngai wa Ayahudi oiki?+ Githĩ ti Ngai nginya wa andũ a ndũrĩrĩ?+ Ĩĩ, nĩ Ngai wa andũ a ndũrĩrĩ o nao.+
30 Tondũ Ngai nĩ ũmwe-rĩ,+ agaatua arĩa aruu athingu+ nĩ ũndũ wa wĩtĩkio na arĩa matarĩ aruu amatue athingu+ kũgerera wĩtĩkio wao.
31 Gũkĩrĩ ũguo-rĩ, hihi nĩ kũniina tũraniina watho kũgerera wĩtĩkio witũ? Aca o na hanini! Handũ ha ũguo, nĩ watho tũrongerera hinya.+
