Kũrĩ Aroma 4:1-25
4 Gũkĩrĩ ũguo-rĩ, hihi tũngiuga Iburahimu ithe witũ wa tene kũringana na mwĩrĩ aagunĩkire atĩa?
2 Ta rĩu-rĩ, korũo Iburahimu aatuirũo mũthingu nĩ ũndũ wa ciĩko, nĩ angĩarĩ na gĩtũmi gĩa kwĩraha, no ti mbere ya Ngai.
3 Kaĩ rĩandĩko riugĩte atĩa? “Iburahimu aagĩire na wĩtĩkio harĩ Jehova,* na ũndũ ũcio ũgĩtarũo atĩ nĩ ũthingu harĩ we.”+
4 Mũndũ ũraruta wĩra-rĩ, mũcara wake nduonagwo ta arĩ ũtugi mũnene no nĩ thiirĩ akoragwo akĩrĩhwo.*
5 No rĩrĩ, mũndũ ũrĩa ũtarutaga wĩra no akagĩa na wĩtĩkio harĩ Ũrĩa ũtuaga mũndũ ũrĩa ũtetigĩrĩte Ngai atĩ nĩ mũthingu, wĩtĩkio wa mũndũ ũcio ũtuagwo atĩ nĩ ũthingu.+
6 O ta ũrĩa Daudi o nake aragia ũhoro wa gĩkeno kĩa mũndũ ũrĩa Ngai atuaga mũthingu hatarĩ ciĩko:
7 “Gũkena nĩ arĩa moheirũo ciĩko ciao cia uuni-watho na arĩa mehia mao mahumbĩrĩtwo;*
8 gũkena nĩ mũndũ ũrĩa Jehova* atakaaririkana mehia make o rĩ o rĩ.”+
9 Hakĩrĩ ũguo-rĩ, hihi no andũ arĩa aruu makoragwo na gĩkeno kĩu kana nĩ nginya arĩa matarĩ aruu?+ Tondũ tuugaga ũũ: “Wĩtĩkio wa Iburahimu nĩ watarirũo atĩ nĩ ũthingu harĩ we.”+
10 Gũkĩrĩ ũguo-rĩ, watarirũo atĩ nĩ ũthingu rĩ? Hihi nĩ rĩrĩa aaruĩte kana nĩ atanarua? Ti rĩrĩa aaruĩte no nĩ rĩrĩa ataaruĩte.
11 Na akĩheo kĩmenyithia+—nĩkĩo kũrua—kĩrĩ mũhũũri* wa ũthingu kũgerera wĩtĩkio ũrĩa aarĩ naguo rĩrĩa ataaruĩte, nĩgetha atuĩke ithe wa arĩa othe marĩ na wĩtĩkio+ o na matarĩ aruu, nĩguo matuwo athingu;
12 na nĩgetha atuĩke ithe wa rũciaro rũrĩa rũruĩte, to wa arĩa marũmagĩrĩra ũhoro wa kũrua no nĩ nginya wa arĩa mathiaga na mĩthiĩre ĩrĩa yagĩrĩire makinya-inĩ ma wĩtĩkio ũrĩa ithe witũ Iburahimu+ aarĩ naguo rĩrĩa ataaruĩte.
13 Nĩ gũkorũo Iburahimu o na kana mbeũ yake* matiaheirũo kĩĩranĩro kũgerera watho atĩ atuĩke mũgai wa thĩ,+ no nĩ kũgerera ũthingu nĩ ũndũ wa wĩtĩkio.+
14 Tondũ angĩkorũo arĩa marũmagĩrĩra watho nĩ agai, wĩtĩkio ũtuĩkaga wa tũhũ, nakĩo kĩĩranĩro nĩ kĩniine.
15 Ũrĩa kũrĩ nĩ atĩ, Watho ũrehaga mang’ũrĩ,+ no harĩa hatarĩ watho, hatikoragwo mehia.+
16 Nĩkĩo kĩĩranĩro kĩu kĩaheanirũo nĩ ũndũ wa wĩtĩkio, ningĩ nĩ ũndũ wa ũtugi mũnene,+ nĩgetha kĩĩranĩro kĩu gĩkorũo kĩrĩ kĩa ma harĩ mbeũ yake yothe,*+ to harĩ arĩa marũmagĩrĩra Watho ĩndĩ nĩ nginya harĩ arĩa marũmagĩrĩra wĩtĩkio wa Iburahimu, o ũcio ithe witũ ithuothe.+
17 (No ta ũrĩa kwandĩkĩtwo ũũ: “Nĩ ngwamũrĩte ũtuĩke ithe wa ndũrĩrĩ nyingĩ.”)+ Ũndũ ũcio wekĩkire maitho-inĩ ma Ngai, o ũcio aakoragwo na wĩtĩkio harĩ we, o we ũtũmaga arĩa akuũ matũũre muoyo na ageta maũndũ matarĩ kuo ta marĩ kuo.*
18 O na gũtuĩka hatiarĩ na kĩĩrĩgĩrĩro, we aarĩ na wĩtĩkio wehocetie harĩ kĩĩrĩgĩrĩro atĩ nĩ angĩgaatuĩka ithe wa ndũrĩrĩ nyingĩ kũringana na ũrĩa kwerĩtwo atĩrĩ: “Ũguo nĩguo mbeũ yaku ĩkaaigana.”*+
19 Na o na gũtuĩka wĩtĩkio wake ndwanyihire, oonaga ta mwĩrĩ wake wakuĩte, (tondũ aarĩ na mĩaka ta 100),+ na akamenya atĩ nda ya Sara ndĩarĩ na hinya wa gũciara.*+
20 No tondũ wa kĩĩranĩro kĩa Ngai, ndaathanganirie akĩaga wĩtĩkio; ĩndĩ aagĩire hinya nĩ ũndũ wa wĩtĩkio wake, akĩgoocithia Ngai
21 na aarĩ na ũũma biũ atĩ nĩ angĩahotire gwĩka ũrĩa eeranĩire.+
22 Na kwoguo “ũndũ ũcio ũgĩtarũo atĩ nĩ ũthingu harĩ we.”+
23 No rĩrĩ, ciugo ‘ũndũ ũcio ũgĩtarũo harĩ we’ itiandĩkirũo nĩ ũndũ wake wiki,+
24 no ciaandĩkirũo nginya nĩ ũndũ witũ, ithuĩ arĩa tũgaatarĩrũo ũndũ ũcio, tondũ nĩ twĩtĩkĩtie Ũrĩa wariũkirie Jesu Mwathani witũ kuuma kũrĩ arĩa akuũ.+
25 Jesu aaneanirũo nĩ ũndũ wa mehia maitũ+ na akĩriũkio nĩguo tũtuwo athingu.+
Tũũhoro twa magũrũ-inĩ
^ Rora Ũhoro Muongerere A5.
^ Kana “no nĩ kĩrĩa agĩrĩire kũheo.”
^ Kana “moheirũo.”
^ Rora Ũhoro Muongerere A5.
^ Kana “ũũma.”
^ Kana “rũciaro rwake.”
^ Kana “rũciaro rwake ruothe.”
^ Kana hihi, “na agatũma indo iria itarĩ kuo ikorũo kuo.”
^ Kana “rũciaro rwaku rũkaaigana.”
^ Kana “yarĩ thata.”
