Kũrĩ Aroma 5:1-21
5 Nĩ ũndũ ũcio, tondũ rĩu nĩ tũtuĩtwo athingu nĩ ũndũ wa wĩtĩkio,+ nĩ tũkenagĩrei thayũ* hamwe na Ngai kũgerera Mwathani witũ Jesu Kristo,+
2 o ũcio kũgerera we ningĩ tũgĩĩte na mweke wa kũingĩra thĩinĩ wa ũtugi ũyũ mũnene harĩa tũrũgamĩte rĩu nĩ ũndũ wa wĩtĩkio;+ ningĩ nĩ tũkenagei* nĩ ũndũ wa kĩĩrĩgĩrĩro kĩa riri wa Ngai.
3 Na to ũguo tu, no nĩ tũkenagei* rĩrĩa tũrĩ na mathĩna,+ tondũ nĩ tũĩ atĩ kuona thĩna nĩ gũtũmaga tũgĩe na ũkirĩrĩria;+
4 ũkirĩrĩria naguo ũgatũma twĩtĩkĩrĩke,+ nakuo gwĩtĩkĩrĩka gũgatũma tũgĩe na kĩĩrĩgĩrĩro,+
5 nakĩo kĩĩrĩgĩrĩro kĩu gĩtingĩtũma tũkue ngoro;+ nĩ gũkorũo wendo wa Ngai nĩ ũitĩrĩirũo ngoro-inĩ citũ kũgerera roho mũtheru ũrĩa twaheirũo.+
6 Tondũ rĩrĩ, hĩndĩ ĩrĩa tũtaarĩ na hinya,+ Kristo nĩ aakuire nĩ ũndũ wa andũ arĩa matetigĩrĩte Ngai o ihinda rĩrĩa rĩatuĩtwo.
7 Nĩ gũkorũo nĩ hinya mũndũ akue nĩ ũndũ wa mũndũ mũthingu; o na gũtuĩka no kũhoteke mũndũ erutĩre gũkua nĩ ũndũ wa mũndũ mwega.
8 No Ngai onanagia wendo wake harĩ ithuĩ na njĩra ya atĩ hĩndĩ ĩrĩa twarĩ ehia, Kristo nĩ aakuire nĩ ũndũ witũ.+
9 Tondũ rĩu nĩ tũtuĩtwo athingu nĩ ũndũ wa thakame yake-rĩ,+ githĩ tũtikaahonokio o na makĩria kuuma harĩ mang’ũrĩ kũgerera harĩ we!+
10 Tondũ rĩrĩ, angĩkorũo rĩrĩa twarĩ thũ nĩ twaiguithanirio na Ngai kũgerera gĩkuũ kĩa Mũrũ wake-rĩ,+ githĩ tũtikaahonokio o na makĩria kũgerera muoyo wake rĩu tũiguithanĩtio nake!
11 Na to ũguo tu, no ningĩ nĩ tũrakenera Ngai kũgerera Mwathani witũ Jesu Kristo, ũrĩa ũtũmĩte twamũkĩre ũiguithanio ũcio.+
12 Nĩkĩo o ta ũrĩa kũgerera harĩ mũndũ ũmwe mehia maatonyire thĩinĩ wa thĩ na gĩkuũ gĩgĩtonya nĩ ũndũ wa mehia,+ na kwoguo gĩkuũ gĩgĩtherema kũrĩ andũ othe tondũ nĩ meehĩtie othe+—.
13 Nĩ gũkorũo mehia maarĩ thĩinĩ wa thĩ mbere ya Watho, no gũtirĩ mũndũ ũtuagwo mwĩhia gũtarĩ na watho.+
14 O na kũrĩ ũguo, gĩkuũ gĩaathanaga ta mũthamaki kuuma harĩ Adamu nginya Musa, nginya harĩ arĩa mataahĩtĩtie ta ũrĩa Adamu aahĩtirie, o ũcio ũrĩ na mũhianĩre ta wa ũrĩa warĩ oke.+
15 No kĩheo kĩu gĩtihaana ta mehia macio. Tondũ angĩkorũo andũ aingĩ maakuire nĩ ũndũ wa mehia ma mũndũ ũmwe-rĩ, githĩ ũtugi mũnene wa Ngai na kĩheo gĩake kĩrĩa aaheanire o ũguo tũhũ kũgerera ũtugi mũnene wa mũndũ ũmwe,+ Jesu Kristo, itiakĩingĩhĩire* andũ aingĩ makĩria!+
16 Ningĩ kĩheo kĩu kĩaheanirũo o ũguo tũhũ gĩtihaana ta ũrĩa maũndũ maathiire kũgerera mehia ma mũndũ ũcio ũmwe wehirie.+ Nĩ gũkorũo thutha wa rĩhia rĩmwe ituĩro rĩarĩ gũtuwo ehia,+ no thutha wa mehia maingĩ kĩheo kĩarĩ gũtuwo athingu.+
17 Tondũ rĩrĩ, angĩkorũo nĩ ũndũ wa rĩhia rĩa mũndũ ũmwe gĩkuũ gĩaathanire ta mũthamaki kũgerera harĩ ũcio-rĩ,+ githĩ arĩa mamũkagĩra kwa ũingĩ ũtugi ũcio mũnene na kĩheo kĩu kĩa ũthingu kĩaheanirũo o ũguo tũhũ+ matigaatũũra muoyo na maathane o na makĩria marĩ athamaki+ nĩ ũndũ wa mũndũ ũcio ũmwe, Jesu Kristo!+
18 Kwoguo-rĩ, o ta ũrĩa rĩhia rĩmwe rĩatũmire andũ a mĩthemba yothe matuwo ehia,+ no taguo gĩĩko kĩmwe kĩa ũthingu gĩatũmire andũ a mĩthemba yothe+ matuwo athingu nĩguo makaaheo muoyo.+
19 Nĩ gũkorũo o ta ũrĩa kwaga gwathĩka kwa mũndũ ũcio ũmwe gwatũmire andũ aingĩ matuwo ehia,+ no taguo gwathĩka kwa mũndũ ũcio ũmwe gũgaatũma andũ aingĩ matuwo athingu.+
20 Watho wokire nĩguo kwĩhia kuongerereke.+ No harĩa mehia maaingĩhire, ũtugi mũnene waingĩhire o na makĩria.
21 Nĩkĩ? Nĩguo o ta ũrĩa mehia maathanire ta mũthamaki hamwe na gĩkuũ,+ o naguo ũtugi mũnene wathane ta mũthamaki kũgerera ũthingu, nĩguo andũ makaagĩa muoyo wa tene na tene kũgerera Jesu Kristo Mwathani witũ.+
Tũũhoro twa magũrũ-inĩ
^ Kana hihi, “tũrĩ na thayũ.”
^ Kana hihi, “nĩ tũkenaga.”
^ Kana hihi, “nĩ tũkenaga.”
^ Kana “itiakĩiyũrĩrĩire.”
