Ayubu 21:1-34
21 Nake Ayubu agĩcokia akiuga atĩrĩ:
2 “Thikĩrĩriai na kinyi ũrĩa nguuga;Mũreke ũndũ ũcio ũtuĩke nĩguo mũkũnyũmĩrĩria naguo.
3 Ngirĩrĩriai njarie;Ndarĩkia kwaria, hĩndĩ ĩyo no mũnyũrũrie.+
4 Kaĩ mateta makwa merekeirio harĩ mũndũ?
Kũngĩrĩ ũguo-rĩ, githĩ niĩ ndingĩnogete* nĩ gweterera?
5 Ndorai na mũrorie maitho manyu harĩ niĩ mũgegete;Humbĩrai tũnua twanyu na guoko.
6 Rĩrĩa ndeciria ũndũ ũcio, njiguaga ngĩtangĩka,Na mwĩrĩ wakwa wothe ũkainaina.
7 Nĩ kĩĩ gĩtũmaga andũ aganu mathiĩ na mbere gũtũũra,+Makũre, na magĩe na ũtonga?*+
8 Makoragwo hamwe na ciana ciao hĩndĩ ciothe,Na makona njiarũa ciao.
9 Mĩciĩ yao ĩkoragwo na thayũ na matikoragwo na guoya,+Ningĩ Ngai ndamaherithagia na rũthanju rwake.
10 Ndegwa ciao itiagaga kũgwatithia;Ng’ombe ciao iciaraga na itihunaga.
11 Tũmwana twao tũteng’eraga nja o ta rũũru,Na ciana ciao ikarũgarũga.
12 Mainaga makĩinagia manyanga na makahũũra kĩnanda kĩa mũgeetoNa magakena maigua mũgambo wa mũtũrirũ.+
13 Makoragwo maiganĩire ũtũũro-inĩ waoNa magaikũrũka thĩinĩ wa Mbĩrĩra* marĩ na thayũ.*
14 No meraga Ngai ũrĩa wa ma atĩrĩ, ‘Tigana na ithuĩ!
Tũtirenda kũmenya njĩra ciaku.+
15 Mwene-Hinya-Wothe nĩwe ũ, atĩ nĩguo tũmũtungatĩre?+
Tũkũgunĩka atĩa twamũmenya?’+
16 No nĩ njũĩ atĩ kũgaacĩra kwao gũtirĩ moko-inĩ mao.+
Niĩ ndinyitanagĩra na mwĩcirĩrie* wa andũ arĩa aganu.+
17 Tawa wa andũ arĩa aganu-rĩ, ũhoraga maita maigana?+
Nĩ maita maigana makoragwo nĩ maũndũ moru?
Nĩ maita maigana Ngai amarehagĩra mwanangĩko nĩ ũndũ wa ũrĩa arakarĩte?
18 Hihi nĩ kũrĩ hĩndĩ mahaanaga ta nyeki nyũmũ ĩrahurutwo nĩ rũhuho?
Kana ta mahuti marĩa makuuagwo nĩ rũhuho rũnene?
19 Ngai nĩ aigagĩra ariũ a mũndũ iherithia rĩa ithe wao.
No Ngai aromũrĩha nĩguo arĩmenye.+
20 Kaba maitho make mwene meyonere mwanangĩko wake,Na gũtuĩke atĩ we mwene nĩwe ũkũnyua marakara ma Mwene-Hinya-Wothe.+
21 Tondũ rĩrĩ, angĩkĩmakio atĩa nĩ maũndũ marĩa magaakora nyũmba yake thutha-inĩAngĩkorũo mũigana wa mĩeri yake nĩ mũnyihie?*+
22 Hihi nĩ kũrĩ mũndũ ũngĩruta Ngai nĩguo agĩe na ũmenyo,*+Na nĩwe ũtuagĩra nginya andũ arĩa matũũgĩrĩte mũno?+
23 Mũndũ ũmwe akuaga arĩ na hinya wake wothe+Arĩ na thayũ na atarĩ na mĩtangĩko,+
24 Ciero ciake igakorũo ciyũire magutaNa mahĩndĩ make marĩ na hinya.*
25 No nĩ kũrĩ ũngĩ ũkuaga aiyũire mĩtangĩko,Atarĩ acama ũndũ o na ũmwe mwega.
26 Othe magaakoma hamwe tĩri-inĩ,+Na o eerĩ mahumbĩrũo nĩ igunyũ.+
27 Atĩrĩrĩ, nĩ njũĩ wega ũrĩa mũreciria,Na njama iria mũrabanga nĩguo mũnjĩke ũũru.*+
28 Nĩ gũkorũo mũũragia atĩrĩ, ‘Nyũmba ya mũndũ ũrĩa ũrĩ igweta ĩrĩ ha,Nayo hema ĩrĩa mũndũ mwaganu araikaraga ĩrĩ ha?’+
29 Kaĩ mũtorĩtie agendi?
Kaĩ mũtathuthurĩtie na kinyi maũndũ marĩa meyoneire,*
30 Atĩ mũndũ mwaganu ndaniinagwo mũthenya ũrĩa kũrĩ na mwanangĩkoNa atĩ nĩ ahonokagio mũthenya wa marakara?
31 Hihi nũũ ũkũmũmenyithia ũhoro wa mĩthiĩre yake,Na nũũ ũkũmũherithia nĩ ũndũ wa maũndũ marĩa ekĩte?
32 Rĩrĩa agaatwarũo mbĩrĩra-inĩ,Mbĩrĩra yake nĩ ĩgaaikario.
33 Akaaiguaga ngũmba cia tĩri cia mũkuru irĩ na cama,+Na andũ othe nĩ makaamũrũmĩrĩra*+O ta andũ aingĩ arĩa maarĩ mbere yake.
34 Nĩ kĩĩ kĩragĩtũma mũnyũmĩrĩrie na ciugo itarandeithia?+
Macokio manyu no maheeni matheri!”
Tũũhoro twa magũrũ-inĩ
^ Ũkk., “roho wakwa ndũngĩnogete.”
^ Kana “ũhoti.”
^ Kana “Sheoli,” ũguo nĩ kuuga, mbĩrĩra ya mũhaano kũrĩa akuũ makomete. Rora Ũthathaũri wa Ciugo.
^ Kana “narua,” ũguo nĩ kuuga, gĩkuũ kĩa na ihenya na gĩtarĩ na ruo.
^ Kana “ũtaaro.”
^ Kana “ũgayanĩtio maita merĩ.”
^ Kana “ũngĩruta Ngai ũndũ o wothe.”
^ Ũkk., “maguta ma mahĩndĩ make marĩ maigũ.”
^ Kana hihi, “mũnjĩke maũndũ ma ũhinya.”
^ Ũkk., “imenyithia.”
^ Ũkk., “Na akururie andũ othe mamũrũmĩrĩre.”
