Ayubu 4:1-21
4 Nake Elifazu+ ũrĩa Mũtemani agĩcokia atĩrĩ:
2 “Mũndũ angĩgeria gũkwarĩria-rĩ, hihi nĩ ũkwaga kũmũkirĩrĩria?
Nũũ ũngĩĩgirĩrĩria kwaria?
3 Nĩ ma wanarũnga andũ aingĩ,Na wanekĩra hinya moko marĩa maregeru.
4 Ciugo ciaku nĩ iratiiragĩrĩra mũndũ o wothe ũhĩngĩtwo,Na nĩ ũrekĩraga hinya arĩa maregerete maru.
5 No rĩu ũndũ ũcio wĩkĩkĩte harĩ wee, nawe ũgatoorio;*Ũgakũhutia, nawe ũkamaka.
6 Kaĩ gũkorũo wĩtigĩrĩte Ngai gũtakũheaga ũmĩrĩru?
Kaĩ mĩthiĩre yaku ya wĩkindĩru+ ĩtakũheaga kĩĩrĩgĩrĩro?
7 Ta ririkana ũndũ ũyũ: Nĩ mũndũ ũrĩkũ ũtarĩ na mahĩtia ũrĩ waniinwo?
Nĩ rĩ andũ arũngĩrĩru marĩ manangwo?
8 Ũndũ ũrĩa nyonete nĩ atĩ arĩa marĩmaga* maũndũ moruNa arĩa mahandaga thĩna magethaga maũndũ o macio.
9 Manangagwo nĩ mĩhũmũ ya Ngai,Na makaniinwo nĩ mũtuthũko wa marakara make.
10 Mũrũthi ũraramaga, naguo mũrũthi mwĩthĩ ũkaruruma,Ĩndĩ o na magego ma mĩrũthi ĩrĩ hinya* nĩ moinangagwo.
11 Mũrũthi ũkuaga nĩ kwaga gĩa kũhĩta,Na ciana cia mũrũthi ikahurunjũka.
12 Rĩu-rĩ, nĩ ndareheirũo kiugo na hitho,Na ngĩigua ndahehererũo ũhoro wakĩo gũtũ-inĩ.
13 Ngĩgĩa na mĩtangĩko ya meciria hĩndĩ ya cioneki cia ũtukũ,Hĩndĩ ĩrĩa andũ makoragwo makomete biũ.
14 Ngĩnyitwo nĩ guoya mũnene,Mahĩndĩ makwa mothe makĩinaina mũno.
15 Roho ũkĩhĩtũkĩra ũthiũ-inĩ wakwa;Njuĩrĩ cia mwĩrĩ wakwa ikĩambarara.
16 Roho ũcio ũgĩcoka ũkĩrũgama wĩhandĩte,No ndiamenyire ũrĩa wahaanaga.
Mbere yakwa haarĩ na mũhianĩre wa kĩndũ;Gũkĩhoorera, ngĩcoka ngĩigua mũgambo woiga atĩrĩ:
17 ‘Hihi mũndũ no akorũo arĩ mũthingu gũkĩra Ngai?
Hihi mũndũ no akorũo arĩ mũtheru gũkĩra Mũmũũmbi?’
18 Atĩrĩrĩ, ndakoragwo ehokete ndungata ciake,Na nĩ acaragĩria araika* ake mahĩtia.
19 Na githĩ ndangĩgĩka ũguo o na makĩria harĩ arĩa maikaraga nyũmba cia rĩũmba,Arĩa mũthingi wao ũrĩ rũkũngũ-inĩ,+O acio mamemendagwo na ihenya o ta memenyi!
20 Mamemendagwo biũ kuuma rũcinĩ nginya hwaĩ-inĩ magathira;Maniinagwo tene na tene, na gũtirĩ mũndũ ũmarũmbũyagia.
21 Githĩ matihaana ta hema ĩrutĩtwo mũkanda wayo?
Gũkua makuaga matarĩ na ũũgĩ.
Tũũhoro twa magũrũ-inĩ
^ Ũkk., “nawe ũkorũo nĩ hinya.”
^ Kana “mabangaga.”
^ Kana “mĩrũthi mĩthĩ ya njamba.”
^ Kana “atũmwo.”