Ezekieli 14:1-23
14 Na rĩrĩ, athuri* amwe a Isiraeli magĩũka na magĩikara thĩ mbere yakwa.+
2 Nakĩo kiugo kĩa Jehova gĩkĩnginyĩra ngĩrũo atĩrĩ:
3 “Mũrũ wa mũndũ, athuri aya nĩ matuĩte itua rĩa kũrũmĩrĩra mĩhianano ĩyo yao ĩrĩ magigi,* na nĩ maigĩte mũhĩnga ũratũma andũ mehie. Hihi nĩ njagĩrĩirũo kũreka matuĩrie ũhoro harĩ niĩ?+
4 Maarĩrie ũmeere atĩrĩ, ‘Jehova Mwathani Ũrĩa Mũnene oigĩte ũũ: “Mũisiraeli angĩtua itua rĩa kũrũmĩrĩra mĩhianano yake ĩrĩ magigi na aige mũhĩnga ũratũma andũ mehie, acoke athiĩ agatuĩrie ũhoro harĩ mũnabii-rĩ, niĩ Jehova, ngaamũcokeria ũrĩa kwagĩrĩire kũringana na ũingĩ wa mĩhianano ĩyo yake ĩrĩ magigi.
5 Nĩ gũkorũo nĩ ngaatũma ngoro cia andũ a nyũmba ya Isiraeli inyitwo nĩ guoya tondũ othe nĩ mandiganĩirie makarũmĩrĩra mĩhianano yao ĩrĩ magigi.”’+
6 “Nĩ ũndũ ũcio ĩra nyũmba ya Isiraeli atĩrĩ, ‘Jehova Mwathani Ũrĩa Mũnene oigĩte ũũ: “Njokererai na mũtigane na mĩhianano ĩyo yanyu ĩrĩ magigi, na mũhũgũre mothiũ manyu mũtigane na mĩtugo yanyu yothe ĩrĩ magigi.+
7 Tondũ Mũisiraeli o wothe kana mũgeni ũikaraga Isiraeli angĩnjeherera na atue itua rĩa kũrũmĩrĩra mĩhianano yake ĩrĩ magigi na aige mũhĩnga ũratũma andũ mehie, acoke athiĩ kũrĩ mũnabii wakwa agatuĩrie ũhoro,+ niĩ Jehova, niĩ mwene nĩ niĩ ngaamũcokeria.
8 Nĩ ngeerekeria ũthiũ wakwa harĩ mũndũ ũcio ndĩmũũkĩrĩre na ndũme atuĩke mũkaana harĩ andũ arĩa angĩ, na ndũme atuĩke wa kũgwetagwo na thimo, na nĩ ngaamũniina ndĩmweherie harĩ andũ akwa;+ na nĩ mũkaamenya atĩ niĩ nĩ niĩ Jehova.”’
9 “‘No mũnabii angĩkaheeneka na aheane macokio, niĩ Jehova, nĩ niĩ ngaakorũo ndĩmũheenereirie.+ Hĩndĩ ĩyo nĩ ngaatambũrũkia guoko gwakwa kũmũũkĩrĩre na ndĩmũniine ehere thĩinĩ wa andũ akwa Isiraeli.
10 No mũhaka makaaherithio nĩ ũndũ wa mahĩtia mao; mahĩtia ma mũtuĩria wa ũhoro magaakorũo marĩ ũndũ ũmwe na mahĩtia ma mũnabii ũcio,
11 nĩguo andũ a nyũmba ya Isiraeli matige kũhĩtia njĩra makanjeherera na matige gwĩthahia na mehia mao mothe. Na nĩ magaatuĩka andũ akwa, na niĩ nĩ ngaatuĩka Ngai wao,’+ ũguo nĩguo Jehova Mwathani Ũrĩa Mũnene oigĩte.”
12 Na kiugo kĩa Jehova gĩkĩnginyĩra o rĩngĩ ngĩrũo atĩrĩ:
13 “Mũrũ wa mũndũ, bũrũri ũngĩnjĩhĩria na njĩra ya gwĩka maũndũ matarĩ ma wĩhokeku, nĩ ngaatambũrũkia guoko gwakwa ndĩũkĩrĩre na niine irio ciaguo,*+ na nĩ ngaatũma kũgĩe ng’aragu+ na niine andũ o hamwe na nyamũ iria irĩ bũrũri ũcio.”+
14 “‘O na athuri aya atatũ—Nuhu,+ Danieli,+ na Ayubu+—mangĩkorũo thĩinĩ wa bũrũri ũcio, mangĩhonokia o mĩoyo yao tu nĩ ũndũ wa ũthingu wao,’+ ũguo nĩguo Jehova Mwathani Ũrĩa Mũnene oigĩte.”
15 “‘Kana ingĩtũma nyamũ njũru cia gĩthaka igerere bũrũri-inĩ ũcio iniine andũ thĩinĩ waguo* na ũtuĩke kũndũ kwanangĩku gũtarĩ mũndũ ũragerera kuo nĩ ũndũ wa nyamũ icio cia gĩthaka.’+
16 Jehova Mwathani Ũrĩa Mũnene oigĩte ũũ: ‘O ta ũrĩa niĩ ndũũraga muoyo, o na athuri acio atatũ mangĩkorũo thĩinĩ wa bũrũri ũcio, matingĩhonokia ariũ ao o na kana aarĩ ao; mangĩhonokia o mĩoyo yao tu, na bũrũri ũcio ũtuĩke kũndũ gũtiganĩrie.’”
17 “‘Kana ingĩrehe rũhiũ rwa njora rũũkĩrĩre bũrũri ũcio+ njuge atĩrĩ: “Reke rũhiũ rwa njora rũhĩtũkĩre thĩinĩ wa bũrũri ũyũ,” na rũniine andũ o hamwe na nyamũ thĩinĩ waguo,+
18 o na athuri acio atatũ mangĩkorũo thĩinĩ wa bũrũri ũcio, o ta ũrĩa niĩ ndũũraga muoyo, matingĩhonokia ariũ ao o na kana aarĩ ao; mangĩhonokia o mĩoyo yao tu,’ ũguo nĩguo Jehova Mwathani Ũrĩa Mũnene oigĩte.”
19 “‘Kana ingĩrehe mũrimũ mũũru bũrũri-inĩ ũcio+ na njitũrũre mathũgũta makwa na njĩra ya gũita thakame nĩguo niine andũ o hamwe na nyamũ thĩinĩ waguo,
20 o na Nuhu,+ Danieli,+ na Ayubu+ mangĩkorũo thĩinĩ waguo, o ta ũrĩa niĩ ndũũraga muoyo, matingĩhonokia ariũ ao o na kana aarĩ ao; mangĩhonokia o mĩoyo yao tu nĩ ũndũ wa ũthingu wao,’+ ũguo nĩguo Jehova Mwathani Ũrĩa Mũnene oigĩte.”
21 “Nĩ ũndũ Jehova Mwathani Ũrĩa Mũnene oigĩte atĩrĩ: ‘Ũguo nĩguo gũkaahaanĩka rĩrĩa ngokĩrĩra andũ ndĩmaherithie na maũndũ macio mana*+—rũhiũ rwa njora, ng’aragu, nyamũ njũru ya gĩthaka, na mũrimũ mũũru+—nĩguo niine andũ o hamwe na nyamũ thĩinĩ wa Jerusalemu.+
22 O na kũrĩ ũguo, amwe arĩa magaatigara nĩ makaahonoka na marutwo kuo,+ ariũ anyu na aarĩ anyu. Nĩ magooka kũrĩ inyuĩ, na rĩrĩa mũkona njĩra ciao na mĩtugo yao, hatarĩ nganja nĩ mũkaaigua mũmĩrĩirio kuumana na maũndũ moru marĩa ngaakorũo ndeheire Jerusalemu, marĩa mothe ngaakorũo ndĩmĩkĩte.’”
23 “‘Nĩ mũkomĩrĩrio nĩo rĩrĩa mũkona njĩra ciao na mĩtugo yao, na nĩ mũkaamenya atĩ maũndũ macio ndekire itũũra rĩu ndiamekire hatarĩ gĩtũmi,’+ ũguo nĩguo Jehova Mwathani Ũrĩa Mũnene oigĩte.”
Tũũhoro twa magũrũ-inĩ
^ Athuri arĩa meehokeirũo maũndũ.
^ Haha kiugo gĩa Kĩhibirania kĩrĩa gĩtaũrĩtwo no kĩringane na kiugo kĩrĩa gĩtaũragwo “mai” na kĩhũthĩkaga kuonania ũhoro wa kĩndũ kĩrĩ magigi.
^ Ũkk., “nyunange mĩtĩ yaguo ya mĩgate.” No kũhoteke nĩ mĩtĩ ĩrĩa yahũthagĩrũo gũcuuria mĩgate.
^ Kana “ciũtige ũtarĩ ciana.”
^ Kana “ciĩko icio inya cia ituĩro cia kũmarehera ũũru.”
