Ezekieli 17:1-24
17 Kiugo kĩa Jehova gĩkĩnginyĩra o rĩngĩ ngĩrũo atĩrĩ:
2 “Mũrũ wa mũndũ, gwatania ndaĩ na ũtaarĩrie thimo ĩgiĩ nyũmba ya Isiraeli.+
3 Uuge atĩrĩ, ‘Jehova Mwathani Ũrĩa Mũnene oigĩte ũũ: “Nderi ĩrĩa nene+ ĩrĩ mathagu manene, njoya ndaihu, na ĩiyũire macoya marĩ na marangi maingĩ nĩ yokire Lebanoni+ ĩkĩoya gacũmbĩrĩ ka mũtarakwa.+
4 Ĩkiuna thuuna ya igũrũ biũ ya gacũmbĩrĩ kau, ĩkĩmĩtwara bũrũri wa onjorithia* na ĩkĩmĩiga itũũra-inĩ rĩa onjorithia.+
5 Ĩgĩcoka ĩkĩoya mbegũ ĩmwe ya bũrũri+ ĩkĩmĩiga mũgũnda-inĩ mũnoru. Ĩkĩmĩhanda o ta mũtĩ ũrĩa ũkũraga hakuhĩ na maĩ maingĩ.
6 Nayo ĩkĩmera, ĩgĩtuĩka mũthabibũ mũkuhĩ ũtheremete,+ mathangũ maguo magĩcokanĩrĩra na thĩinĩ, nayo mĩri yaguo ĩgĩthiĩ na thĩ rungu rwayo. Nĩ ũndũ ũcio, ĩgĩtuĩka mũthabibũ na ĩkĩruta thuuna na honge.+
7 “‘“Na hagĩũka nderi ĩngĩ nene+ yarĩ na mathagu manene na njoya nene.+ Naguo mũthabibũ ũcio ũkĩerekeria mĩri yaguo harĩ nderi ĩyo ũrĩ na wendi mũnene, kũraya na mũgũnda ũrĩa wahandĩtwo, na ũkĩerekeria mathangũ maguo harĩ nderi ĩyo nĩguo ĩũhe maĩ.+
8 Nĩ wahandĩtwo mũgũnda-inĩ mwega hakuhĩ na maĩ maingĩ nĩguo ũrute honge, ũgĩe na maciaro, na ũtuĩke mũthabibũ mũnene.”’+
9 “Uuge atĩrĩ, ‘Jehova Mwathani Ũrĩa Mũnene oigĩte ũũ: “Hihi nĩ ũgaatherema? Githĩ mĩri yaguo ndĩkombororio+ na maciaro maguo mabuthe na thuuna ciaguo ihoohe?+ Ũkooma biũ ũũ atĩ ndũkaabatara guoko kũrĩ na hinya kana andũ aingĩ kũũmunya na mĩri.
10 O na gũtuĩka nĩ ũhandĩtwo handũ hangĩ-rĩ, hihi nĩ ũgaatherema? Githĩ ndũkooma biũ wahurutwo nĩ rũhuho rwa mwena wa irathĩro? Ũkoomĩra mũgũnda-inĩ ũrĩa wamereire.”’”
11 Na kiugo kĩa Jehova gĩkĩnginyĩra o rĩngĩ ngĩrũo atĩrĩ:
12 “Ĩra andũ a nyũmba ĩyo nemi ũũ, ‘Kaĩ mũtarataũkĩrũo nĩ ũrĩa maũndũ macio moigĩte?’ Meere atĩrĩ, ‘Mũthamaki wa Babuloni ookire Jerusalemu akĩoya mũthamaki wakuo na anene a kuo agĩcoka nao Babuloni.+
13 Ningĩ nĩ ooire mũndũ ũmwe wa mbeũ ya*+ mũthamaki na akĩrĩkanĩra kĩrĩkanĩro hamwe nake na akĩmwĩhĩtithia.+ Agĩcoka agĩkuua andũ a bũrũri ũcio arĩa maarĩ igweta,+
14 nĩgetha ũthamaki ũcio wage hinya, na ũremwo nĩ kwĩhanda, no ũtũũre tu nĩ ũndũ wa gwathĩkĩra kĩrĩkanĩro kĩu gĩake.+
15 No marigĩrĩrio-inĩ mũthamaki ũcio akĩmũremera+ na njĩra ya gũtũma atũmwo ake mathiĩ Misiri makamũgĩrĩre mbarathi+ na mbũtũ nene ya mbaara.+ Hihi nĩ ekũgaacĩra? Hihi ũcio ũreka maũndũ macio nĩ egwĩthema kũherithio? Hihi no age kũhingia kĩrĩkanĩro na ahonoke?’+
16 Jehova Mwathani Ũrĩa Mũnene oigĩte ũũ: “‘“O ta ũrĩa niĩ ndũũraga muoyo, agaakuĩra Babuloni kũrĩa mũthamaki* ũrĩa wamũtuire mũthamaki* atũũraga, o ũcio aanyararire mwĩhĩtwa wake na akĩaga kũhingia kĩrĩkanĩro gĩake.+
17 Na mbũtũ nene na thigari nyingĩ cia Firauni itigaateithia mbaara-inĩ+ rĩrĩa hĩba cia kũrigicĩria igaathondekwo na thingo cia kũrigicĩria ciakwo nĩguo mĩoyo mĩingĩ ĩniinwo.
18 Nĩ anyararĩte mwĩhĩtwa na akaga kũhingia kĩrĩkanĩro. O na gũtuĩka nĩ eehĩtire,* nĩ ekĩte maũndũ macio mothe, na ndakaahonoka.”’
19 “‘Nĩ ũndũ ũcio, Jehova Mwathani Ũrĩa Mũnene oigĩte ũũ: “O ta ũrĩa niĩ ndũũraga muoyo, nĩ ngaamũrehera igũrũ rĩa mũtwe wake moimĩrĩro ma kũnyarara mwĩhĩtwa wakwa+ na kwaga kũhingia kĩrĩkanĩro gĩakwa.
20 Nĩ ngaaikia neti yakwa igũrũ rĩake, na nĩ akaanyitwo nĩ neti ĩyo yakwa ya gũtega.+ Ngaamũtwara Babuloni ndĩmũciirithĩrie kuo tondũ wa kwaga gũkorũo arĩ mwĩhokeku harĩ niĩ.+
21 Nacio thigari ciake ciothe iria ikoora nĩ ikooragwo na rũhiũ rwa njora, nacio iria igaatigara ihurunjũke mĩena yothe.*+ Hĩndĩ ĩyo nĩ mũkaamenya atĩ niĩ mwene, Jehova, nĩ njarĩtie.”’+
22 “‘Jehova Mwathani Ũrĩa Mũnene oigĩte ũũ: “Nĩ ngoya thuuna kuuma gacũmbĩrĩ ka mũtarakwa mũtũũgĩru+ na ndĩmĩhande, nĩ ngaatua gathuuna kororo+ kuuma gacũmbĩrĩ ka honge ciaguo, na niĩ mwene ndĩkahande igũrũ rĩa kĩrĩma kĩraihu na gĩtũũgĩru.+
23 Ngaakahanda igũrũ rĩa kĩrĩma kĩraihu kĩa Isiraeli; na honge ciako nĩ igaakũra, na nĩ gakaagĩa maciaro na gatuĩke mũtarakwa mũnene. Na nyoni cia mĩthemba yothe nĩ igaaka rungu rwaguo na itũũre kĩĩruru-inĩ kĩa mathangũ maguo.
24 Na mĩtĩ yothe ya gĩthaka nĩ ĩkaamenya atĩ niĩ mwene, Jehova, nĩ niĩ nyihĩtie mũtĩ ũrĩa mũraihu na nganenehia mũtĩ ũrĩa mũkuhĩ;+ nĩ niĩ nyũmĩtie mũtĩ ũrĩa mũruru na ngatũma mũtĩ ũrĩa mũũmũ ũrute kĩro.+ Niĩ mwene, Jehova, nĩ njarĩtie na ngeka ũguo.”’”
Tũũhoro twa magũrũ-inĩ
^ Ũkk., “bũrũri wa Kanaani.”
^ Kana “rũciaro rwa.”
^ Nĩ Nebukadineza.
^ Ũrĩa watuirũo mũthamaki nĩ Zedekia.
^ Ũkk., “nĩ aaneanire guoko gwake.”
^ Ũkk., “huho-inĩ ciothe.”