Ezekieli 2:1-10
2 Nake akĩnjĩra atĩrĩ: “Mũrũ wa mũndũ,* rũgama na magũrũ maku nĩguo njarie nawe.”+
2 Rĩrĩa aanjarĩirie, roho ũgĩũka thĩinĩ wakwa na ũgĩtũma ndũgame na magũrũ makwa+ nĩguo njigue Ũcio waaragia na niĩ.
3 Agĩcoka akĩnjĩra atĩrĩ: “Mũrũ wa mũndũ, nĩ ngũgũtũma kũrĩ andũ a Isiraeli,+ kũrĩ ndũrĩrĩ nemi iria inemeire.+ Acio o hamwe na maithe mao ma tene matũire magararĩte watho wakwa o nginya ũmũthĩ.+
4 Ndĩragũtũma kũrĩ ariũ acio aremi* na momĩtie ngoro,+ nawe no mũhaka ũmeere atĩrĩ, ‘Jehova Mwathani Ũrĩa Mũnene oigĩte ũũ.’
5 Nao, o na mangĩthikĩrĩria kana marege gũthikĩrĩria—nĩ gũkorũo o nĩ nyũmba nemi+—hatarĩ nganja nĩ makaamenya atĩ nĩ kwarĩ na mũnabii gatagatĩ-inĩ kao.+
6 “No wee mũrũ wa mũndũ-rĩ, ndũkametigĩre,+ na ndũgetigĩre ciugo ciao, o na gũtuĩka ũthiũrũrũkĩirio nĩ mĩigua*+ na ũgaikara gatagatĩ-inĩ ga tũng’aurũ. Ndũgetigĩre ciugo ciao,+ na ndũkamakio nĩ mothiũ mao,+ nĩ gũkorũo o nĩ nyũmba nemi.
7 No mũhaka ũmeere ciugo ciakwa, kana nĩ megũthikĩrĩria kana matigũthikĩrĩria, tondũ o nĩ andũ aremi.+
8 “No wee mũrũ wa mũndũ-rĩ, thikĩrĩria ũrĩa ndĩrakwĩra. Ndũgatuĩke mũremi ta nyũmba ĩno nemi. Athamia kanua ũrĩe kĩrĩa ngũkũhe.”+
9 Na rĩrĩa ndarorire, ngĩona guoko gũtambũrũkĩtio harĩ niĩ,+ na ngĩona kũnyitĩte gĩkũnjo kĩandĩke.*+
10 Rĩrĩa aagĩtambũrũkirie mbere yakwa, ngĩona kĩandĩkĩtwo mwena wa mbere na wa thutha.+ Na kĩandĩkĩtwo nyĩmbo cia macakaya, na kĩeha o na kĩrĩro.+
Tũũhoro twa magũrũ-inĩ
^ “Mũrũ wa mũndũ”; ciugo ici cionekaga maita 93 thĩinĩ wa Ezekieli, na rĩrĩ nĩrĩo riita rĩa mbere.
^ Kana “momĩtie ũthiũ.”
^ Kana hihi, “o na gũtuĩka andũ acio nĩ momĩtie ngoro na matariĩ ta indo iragũtheca.”
^ Kana “gĩkũnjo kĩa ibuku.”