Ezekieli 3:1-27
3 Agĩcoka akĩnjĩra atĩrĩ: “Mũrũ wa mũndũ, rĩa kĩrĩa kĩrĩ mbere yaku.* Rĩa gĩkũnjo gĩkĩ, ũcoke ũthiĩ ũkaarĩrie nyũmba ya Isiraeli.”+
2 Ngĩathamia kanua, nake akĩhe gĩkũnjo kĩu ndĩkĩrĩe.
3 Agĩcoka akĩnjĩra atĩrĩ: “Mũrũ wa mũndũ, rĩa gĩkũnjo gĩkĩ ndĩrakũhe, ũiyũrie nda yaku nakĩo.” Nĩ ũndũ ũcio ngĩambĩrĩria gũkĩrĩa, na kĩarĩ na cama ta ũũkĩ kĩrĩ kanua-inĩ gakwa.+
4 Ningĩ akĩnjĩra atĩrĩ: “Mũrũ wa mũndũ, thiĩ kũrĩ nyũmba ya Isiraeli ũmahe ciugo ciakwa.
5 Tondũ ndũratũmwo kũrĩ andũ maragia rũthiomi rũtarataũkĩka kana mwarĩrie ũtoĩkaine, no ũratũmwo kũrĩ nyũmba ya Isiraeli.
6 Ndũratũmwo kũrĩ ikundi nyingĩ cia andũ iria ciaragia rũthiomi rũtarataũkĩka kana mwarĩrie ũtoĩkaine, iria ũtangĩtaũkĩrũo nĩ ciugo ciacio. Ingĩgũtũma kũrĩ cio, no igũthikĩrĩrie.+
7 No nyũmba ya Isiraeli nĩ mekũrega gũgũthikĩrĩria, tondũ matirenda gũũthikĩrĩria.+ Andũ othe a nyũmba ya Isiraeli nĩ momĩtie ciongo na makomia ngoro.+
8 Atĩrĩrĩ, nĩ ndũmĩte ũthiũ waku ũũme o ta mothiũ mao na thiithi waku ũũme o ta mathiithi mao.+
9 Nĩ ndũmĩte thiithi waku ũhaane arimathi, na ũũme gũkĩra ihiga rĩũmũ.+ Ndũkametigĩre o na kana ũmakio nĩ mothiũ mao,+ nĩ gũkorũo o nĩ nyũmba nemi.”
10 Agĩcoka akĩnjĩra atĩrĩ: “Mũrũ wa mũndũ, thikĩrĩria ciugo ciakwa ciothe iria ngũkwĩra, na ũciige ngoro-inĩ yaku.
11 Thiĩ kũrĩ andũ anyu* arĩa marĩ ithamĩrio+ ũmaarĩrie. Ũmeere atĩrĩ, ‘Ũũ nĩguo Jehova Mwathani Ũrĩa Mũnene oigĩte,’ o na mangĩthikĩrĩria kana marege gũthikĩrĩria.”+
12 Hĩndĩ ĩyo roho ũkĩnguua,+ na thutha wakwa ngĩigua mũgambo ũrĩ na mũrurumo mũnene ũkiuga ũũ: “Riri wa Jehova ũrogoocwo gĩikaro-inĩ gĩake.”
13 Nĩ haarĩ na mũgambo wa mathagu ma ciũmbe iria irĩ muoyo makĩhutania,+ na mũgambo wa magũrũ ma ngaari marĩa maarĩ mwena-inĩ wacio,+ na mũgambo warĩ na mũrurumo mũnene.
14 Na roho ũkĩnguua na ũkĩnjoya, na niĩ ngĩthiĩ ndĩ na marũrũ na marakara manene ngoro-inĩ, na guoko kwa Jehova kwarĩ na hinya igũrũ rĩakwa.
15 Ngĩthiĩ kũrĩ andũ acio maarĩ ithamĩrio Teli-abibu, arĩa maaikaraga hakuhĩ na rũũĩ rwa Kebari,+ na ngĩikara kũu maaikaraga; ngĩikarania nao thikũ mũgwanja ndĩ na kĩmako kĩnene.+
16 Thutha wa thikũ mũgwanja kiugo kĩa Jehova gĩkĩnginyĩra ngĩrũo atĩrĩ:
17 “Mũrũ wa mũndũ, nĩ ngwamũrĩte ũtuĩke mũrangĩri wa nyũmba ya Isiraeli;+ na rĩrĩa waigua kiugo kuuma kanua-inĩ gakwa, no mũhaka ũmaheage mũkaana ũcio uumĩte kũrĩ niĩ.+
18 Hĩndĩ ĩrĩa ndera mũndũ mwaganu ũũ, ‘Hatarĩ nganja nĩ ũgũkua,’ nawe wage kũmũhe mũkaana, na wage kwaria nĩguo ũhe mũndũ ũcio mwaganu mũkaana atigane na mĩthiĩre yake mĩũru nĩgetha atũũre muoyo,+ nĩ agaakua nĩ ũndũ wa mehia make tondũ nĩ mwaganu,+ no nĩ ngaakũũria thakame yake.+
19 No ũngĩhe mũndũ mwaganu mũkaana na age kũgarũrĩra atigane na waganu ũcio wake na mĩthiĩre yake mĩũru, nĩ agaakua nĩ ũndũ wa mehia make, no wee nĩ ũkaahonokia muoyo waku.+
20 No mũndũ mũthingu angĩtigana na ũthingu wake eke ũndũ mũũru,* nĩ ngaiga mũhĩnga mbere yake na nĩ agaakua.+ Angĩkorũo ndwamũheire mũkaana, nĩ agaakua nĩ ũndũ wa mehia make na ciĩko ciake cia ũthingu itikaaririkanwo, no nĩ ngaakũũria thakame yake.+
21 No angĩkorũo nĩ ũheete mũndũ ũcio mũthingu mũkaana nĩguo ndakehie, na age kwĩhia, nĩ agaatũũra muoyo tondũ nĩ aathikĩrĩirie mũkaana,+ nawe nĩ ũgaakorũo ũhonoketie muoyo waku.”
22 Guoko kwa Jehova gũgĩũka igũrũ rĩakwa ndĩ kũu, nake akĩnjĩra atĩrĩ: “Ũkĩra ũthiĩ mũkuru-inĩ mwaraganu, na nĩ ngũkwarĩria wĩ kũu.”
23 Nĩ ũndũ ũcio ngĩũkĩra ngĩthiĩ mũkuru-inĩ ũcio mwaraganu, na kũu kwarĩ na riri wa Jehova,+ o ta riri ũrĩa ndonete ndĩ rũũĩ-inĩ rwa Kebari,+ ngĩĩgũithia ngĩturumithia ũthiũ thĩ.
24 Hĩndĩ ĩyo roho ũkĩingĩra thĩinĩ wakwa na ũgĩtũma ndũgame na magũrũ makwa,+ nake akĩnjarĩria akĩnjĩra atĩrĩ:
“Thiĩ wĩhingĩre thĩinĩ wa nyũmba yaku.
25 Nawe mũrũ wa mũndũ-rĩ, nĩ megũgwĩkĩra mĩkanda na makuohe nayo nĩguo ndũkahote gũthiaga gatagatĩ-inĩ kao.
26 Na nĩ ngaatũma rũrĩmĩ rwaku rũnyitane na mwena wa igũrũ wa kanua gaku, na ũtuĩke bubu, ũremwo kũmarũnga, tondũ o nĩ nyũmba nemi.
27 No rĩrĩa ngaakwarĩria nĩ ngaahingũra kanua gaku, na no mũhaka ũkaameera atĩrĩ,+ ‘Ũũ nĩguo Jehova Mwathani Ũrĩa Mũnene oigĩte.’ Wa gũthikĩrĩria nĩ athikĩrĩrie,+ na wa kũrega gũthikĩrĩria nĩ arege, tondũ o nĩ nyũmba nemi.+
Tũũhoro twa magũrũ-inĩ
^ Ũkk., “rĩa kĩrĩa ũrona.”
^ Ũkk., “ariũ a andũ anyu.”
^ Kana “eke ũndũ ũtarĩ wa kĩhooto.”
