Ezekieli 35:1-15
-
Ũrathi wĩgiĩ gũũkĩrĩrũo kwa irĩma cia Seiru (1-15)
35 Na rĩrĩ, kiugo kĩa Jehova gĩkĩnginyĩra o rĩngĩ ngĩrũo atĩrĩ:
2 “Mũrũ wa mũndũ, erekeria ũthiũ waku harĩ gĩcigo kĩrĩa kĩrĩ irĩma gĩa Seiru+ ũrathe ũhoro wa gũgĩũkĩrĩra.+
3 Ũkĩre atĩrĩ, ‘Jehova Mwathani Ũrĩa Mũnene oigĩte ũũ: “Nĩ ngaagũũkĩrĩra wee gĩcigo gĩkĩ kĩrĩ irĩma gĩa Seiru, na ndambũrũkie guoko gwakwa ngũũkĩrĩre ndũme ũtuĩke kũndũ gũtiganĩrie na kwanangĩku.+
4 Nĩ ngaatũma matũũra maku manangĩke, nawe ũgaatuĩka kũndũ gũtiganĩrie na kwanangĩku;+ na nĩ ũkaamenya atĩ niĩ nĩ niĩ Jehova.
5 Nĩ gũkorũo nĩ woonanirie rũthũũro rũnene,+ na ũkĩneana Aisiraeli moragwo na rũhiũ rwa njora rĩrĩa maarĩ na thĩna, hĩndĩ ya iherithia rĩao rĩa mũico.”’+
6 Jehova Mwathani Ũrĩa Mũnene ekuuga atĩrĩ, “‘Nĩ ũndũ ũcio, o ta ũrĩa niĩ ndũũraga muoyo, nĩ ngaagũthagathaga nĩgetha ũitwo thakame, naguo ũiti wa thakame nĩ ũgaagũthingataga.+ Tondũ wee nĩ thakame wamenete-rĩ, nĩ ũgaathingatwo nĩ ũiti wa thakame.+
7 Ngaatũma gĩcigo kĩrĩa kĩrĩ irĩma gĩa Seiru gĩtuĩke kũndũ gũtiganĩrie na kwanangĩku,+ na njũrage mũndũ o wothe ũrahĩtũkĩra kuo na mũndũ o wothe ũracokera kuo.
8 Ngaaiyũria irĩma ciakĩo andũ arĩa moragĩtwo; nao arĩa moragĩtwo na rũhiũ rwa njora makaagwa tũrĩma-inĩ, mĩkuru-inĩ, na tũrũũĩ-inĩ twaku tuothe.
9 Ngaatũma ũtũũre ũrĩ kũndũ kwanangĩku tene na tene, na matũũra maku matigaatũũrũo;+ na nĩ ũkaamenya atĩ niĩ nĩ niĩ Jehova.’
10 “Nĩ gũkorũo woigire ũũ, ‘Ndũrĩrĩ ici cierĩ na mabũrũri maya merĩ megũtuĩka makwa, na tũgũciĩgwatĩra o cierĩ,’+ o na gũtuĩka Jehova we mwene aarĩ gatagatĩ-inĩ kao,
11 Jehova Mwathani Ũrĩa Mũnene oigĩte atĩrĩ, ‘nĩ ũndũ ũcio, o ta ũrĩa niĩ ndũũraga muoyo, ngaagwĩka maũndũ maringaine na marakara na ũiru ũrĩa warĩ naguo kũmerekera ũrĩ na rũmena;+ na nĩ ngemenyithania harĩ o rĩrĩa ngaakorũo ngĩgũtuĩra ciira.
12 Hĩndĩ ĩyo nĩ ũkaamenya atĩ niĩ mwene, Jehova, nĩ njiguĩte maũndũ matarĩ ma gĩtĩo marĩa waaririe kwerekera irĩma cia Isiraeli rĩrĩa woigire atĩrĩ, “Nĩ itiganĩirio na ikaneanwo harĩ ithuĩ nĩguo tũcitambure.”*
13 Na ũkĩaria na mwĩtĩo kũnjerekera, na ũkĩingĩhia ciugo cia kũnjũkĩrĩra.+ Gũtirĩ ũndũ itaiguire.’
14 “Jehova Mwathani Ũrĩa Mũnene ekuuga atĩrĩ: ‘Thĩ yothe nĩ ĩgaakena rĩrĩa ngaagũtua kũndũ gũtiganĩrie na kwanangĩku.
15 O ta ũrĩa wakenire rĩrĩa igai rĩa nyũmba ya Isiraeli rĩatiganĩirio, ũguo noguo o na niĩ ngaagwĩka.+ Ũgaatuĩka kũndũ gũtiganĩrie, wee gĩcigo gĩkĩ kĩrĩ irĩma gĩa Seiru, o na Edomu guothe;+ na nĩ makaamenya atĩ niĩ nĩ niĩ Jehova.’”
Tũũhoro twa magũrũ-inĩ
^ Ũkk., “irĩ ta irio.”
