Ezekieli 38:1-23
38 Na rĩrĩ, kiugo kĩa Jehova gĩkĩnginyĩra o rĩngĩ ngĩrũo atĩrĩ:
2 “Mũrũ wa mũndũ, erekeria ũthiũ waku harĩ Gogu wa bũrũri wa Magogu,+ mũtongoria ũrĩa mũnene wa Mesheki na Tubali,+ ũrathe ũhoro wa kũmũũkĩrĩra.+
3 Uuge atĩrĩ, ‘Jehova Mwathani Ũrĩa Mũnene oigĩte atĩrĩ: “Wee Gogu, nĩ ngaagũũkĩrĩra, o wee mũtongoria ũrĩa mũnene wa Mesheki na Tubali.
4 Ngaakũhũgũra na ngwĩkĩre ihocio thĩa-inĩ ciaku+ njoke ngũrute nja ũrĩ hamwe na mbũtũ yaku yothe,+ mbarathi na atwarithia a cio, othe mahumbĩtwo riri, marĩ kĩrĩndĩ kĩnene na marĩ na ngo nene o na nini, na othe meyohete hiũ cia njora;
5 marĩ hamwe na Perisia, Ethiopia na Puti,+ othe marĩ na ngo na ngũbia;
6 o na Gomeri na thigari ciakuo ciothe, na nyũmba ya Togarima+ kuuma kũndũ kũraya mũno mwena wa rũgongo hamwe na thigari ciayo ciothe—ikundi nyingĩ cia andũ irĩ hamwe nawe.+
7 “‘“Ikara wĩhaarĩirie, mwĩthagathagei, wee na mbũtũ ciaku iria irĩ hamwe nawe, na nĩwe ũgũtuĩka mũtongoria* wao.
8 “‘“Thutha wa matukũ maingĩ nĩ ũkaarũmbũiyo.* Na ihinda-inĩ rĩa mũthia rĩa mĩaka ĩyo nĩ ũgaatharĩkĩra bũrũri ũrĩa andũ a kuo maacokirio na makĩhonokio kuumana na rũhiũ rwa njora, magĩcokanĩrĩrio kuuma ikundi-inĩ nyingĩ cia andũ magĩtwarũo irĩma-inĩ cia Isiraeli, iria ciatũũraga cianangĩkĩte. Aikari a bũrũri ũcio maacokirio kuuma ikundi-inĩ cia andũ, na othe maikaraga na thayũ.+
9 Ũkaamatharĩkĩra o ta kĩhuhũkanio, na ũhumbĩre bũrũri ũcio o ta matu, wee hamwe na thigari ciaku ciothe na ikundi nyingĩ cia andũ iria irĩ hamwe nawe.”’
10 “Jehova Mwathani Ũrĩa Mũnene oigĩte ũũ: ‘Mũthenya ũcio nĩ ũkaagĩa na meciria ngoro-inĩ yaku, na ũthugunde ũndũ mũũru.
11 Ũkoiga ũũ: “Nĩ ngũtharĩkĩra bũrũri ũcio ũrĩ na matũũra matarĩ mairigĩre.+ Ngũtharĩkĩra arĩa maikaraga marĩ na ũgitĩri, matarĩ na ũndũ ũramathĩnia, arĩa othe maikaraga matũũra matarĩ magitĩre na thingo, mĩgamba, kana ihingo.”
12 Ũgeeka ũguo nĩgetha ũtahe o na ũtunyane indo, ũtharĩkĩre kũndũ kũrĩa kwanangĩku, o kũu gũikaragwo rĩu,+ na ũtharĩkĩre andũ arĩa maacokanĩrĩirio kuuma ndũrĩrĩ-inĩ,+ o acio maregĩĩra ũtonga o na indo,+ na maikaraga gatagatĩ ga thĩ.
13 “‘Sheba+ na Dedani,+ ahũũri biacara a Tarishishi+ hamwe na njamba ciao cia ita magaakũũria* atĩrĩ: “Hihi muoroto waku wa gũtharĩkĩra nĩ gũtaha na gũtunyana indo nyingĩ? Hihi ũcokanĩrĩirie mbũtũ ciaku nĩguo ũkuue betha na thahabu, wĩyoere ũtonga na indo, na ũtahe indo nyingĩ biũ?”’
14 “Nĩ ũndũ ũcio, ratha ũhoro wee mũrũ wa mũndũ, wĩre Gogu atĩrĩ: ‘Jehova Mwathani Ũrĩa Mũnene oigĩte ũũ: “Mũthenya ũcio andũ akwa Isiraeli magaakorũo maikarĩte marĩ na ũgitĩri-rĩ, githĩ ndũkaamenya?+
15 Nĩ ũgooka uumĩte handũ haku, uumĩte kũndũ kũraya mũno mwena wa rũgongo,+ wee o hamwe na ikundi nyingĩ cia andũ iria irĩ hamwe nawe, ciothe ihaicĩte mbarathi, irĩ kĩrĩndĩ kĩnene, mbũtũ nene.+
16 Ũgookĩrĩra andũ akwa Isiraeli ũtariĩ o ta matu mahumbĩrĩte bũrũri. Ihinda-inĩ rĩa mũthia rĩa matukũ macio nĩ ngaatũma wee Gogu+ ũũkĩrĩre bũrũri wakwa+ nĩguo menyeke nĩ ndũrĩrĩ rĩrĩa ngeyonania ũrĩa ndĩ mũtheru kũgerera harĩ wee ikĩĩyonagĩra.”’
17 “Jehova Mwathani Ũrĩa Mũnene ekuuga atĩrĩ: ‘Na githĩ wee tiwe ndaririe ũhoro waku matukũ-inĩ ma tene kũgerera ndungata ciakwa anabii a Isiraeli, arĩa maarathire ihinda rĩa mĩaka mĩingĩ atĩ nĩ ũngĩkaarehwo ũmokĩrĩre?’
18 “‘Mũthenya ũrĩa Gogu agaatharĩkĩra bũrũri wa Isiraeli, mang’ũrĩ makwa manene nĩ makaarahũka,’+ ũguo nĩguo Jehova Mwathani Ũrĩa Mũnene oigĩte.
19 ‘Nĩ ngaaria ndĩ na marakara matariĩ o ta mwaki; na mũthenya ũcio nĩ gũkaagĩa gĩthingithia kĩnene bũrũri-inĩ wa Isiraeli.
20 Thamaki cia iria-inĩ, nyoni cia rĩera-inĩ, nyamũ cia gĩthaka, nyamũ ciothe iria itambaga thĩ, na andũ othe thĩinĩ wa thĩ nĩ makaainaina nĩ ũndũ wakwa, irĩma nĩ ikaagwa,+ o nacio iharũrũka igwe, na thingo ciothe imomoke igwe thĩ.’
21 “‘Nĩ ngaarehe rũhiũ rwa njora rũũkĩrĩre Gogu kũu irĩma-inĩ ciakwa ciothe,’ ũguo nĩguo Jehova Mwathani Ũrĩa Mũnene oigĩte. ‘O mũndũ nĩ agookĩrĩra mũrũ wa ithe na rũhiũ rwake rwa njora.+
22 Nĩ ngaamũtuĩra ciira ndĩmũrehere mũrimũ mũũru+ na ũiti wa thakame; ngaatũma we mwene hamwe na thigari ciake na ikundi nyingĩ cia andũ iria irĩ hamwe nake+ moirĩrũo nĩ mbura nene mũno na mbura ya mbembe+ na mwaki+ na ũbiriti.+
23 Na nĩ ngeegoocithia, na ndĩyonanie ũrĩa ndĩ mũtheru na ndĩĩmenyithanie mbere ya maitho ma ndũrĩrĩ nyingĩ; nacio nĩ ikaamenya atĩ niĩ nĩ niĩ Jehova.’
Tũũhoro twa magũrũ-inĩ
^ Ũkk., “mũrangĩri.”
^ Kana “nĩ ũgeetwo.”
^ Kana “mĩrũthi mĩthĩ ya njamba ĩgaakũũria.”
