Ezekieli 40:1-49
40 Na rĩrĩ, mwaka-inĩ wa 25 tũrĩ ithamĩrio,+ kĩambĩrĩria-inĩ kĩa mwaka ũcio, mũthenya wa ikũmi wa mweri, mwaka wa 14 kuuma rĩrĩa itũũra rĩagũire,+ guoko kwa Jehova kwarĩ igũrũ rĩakwa, nake akĩndwara thĩinĩ wa itũũra rĩu.+
2 Kũgerera cioneki kuuma kũrĩ Ngai, akĩndwara bũrũri wa Isiraeli na akĩnjiga igũrũ rĩa kĩrĩma kĩraihu mũno,+ na mwena wa mũhuro kwarĩ na mwako wahaanaga ta itũũra.
3 Rĩrĩa aanginyirie kũu, ngĩona mũndũ warĩ na mũhianĩre ta wa gĩcango.+ Na guoko-inĩ gwake aarĩ na mũkanda wa ũguta* na ithanjĩ rĩa gũthima,*+ na aarũgamĩte kĩhingo-inĩ.
4 Mũndũ ũcio akĩnjĩra atĩrĩ: “Mũrũ wa mũndũ, rora wega, thikĩrĩria na kinyi, na ũrũmbũiye* maũndũ mothe marĩa ngũkuonia, tondũ nĩkĩo warehwo gũkũ. Ĩra andũ a nyũmba ya Isiraeli maũndũ mothe marĩa ũkuona.”+
5 Ngĩona rũthingo rũthiũrũrũkĩirie nja ya hekarũ.* Na guoko-inĩ kwa mũndũ ũcio kwarĩ na ithanjĩ rĩa gũthima rĩa mĩkono ĩtandatũ (o mũkono wongereirũo wariĩ wa rũhĩ rũmwe).* Akĩambĩrĩria gũthima rũthingo rũu, na wariĩ waruo warĩ ithanjĩ rĩmwe na ũraihu waruo ithanjĩ rĩmwe.
6 Agĩcoka agĩthiĩ kĩhingo-inĩ kĩrĩa kĩarorete mwena wa irathĩro+ na akĩambata ngathĩ-inĩ ciakĩo. Rĩrĩa aathimire itonyero rĩa kĩhingo kĩu, wariĩ warĩo warĩ ithanjĩ rĩmwe, na wariĩ wa itonyero rĩu rĩngĩ o naguo warĩ ithanjĩ rĩmwe.
7 O kanyũmba ka mũrangĩri kaarĩ na ũraihu wa ithanjĩ rĩmwe na wariĩ wa ithanjĩ rĩmwe, na kuuma kanyũmba kamwe nginya karĩa kangĩ haarĩ na ũraihu wa mĩkono ĩtano.+ Na itonyero rĩa kĩhingo kĩrĩa kĩariganĩtie na gĩthaku gĩa kĩhingo kĩrĩa kĩarorete mwena wa thĩinĩ rĩarĩ ithanjĩ rĩmwe.
8 Agĩcoka agĩthima gĩthaku gĩa kĩhingo kĩrĩa kĩarorete mwena wa thĩinĩ, na kĩarĩ ithanjĩ rĩmwe.
9 Ningĩ agĩthima gĩthaku gĩa kĩhingo, na kĩarĩ mĩkono ĩnana; agĩthima itugĩ ciakĩo cia mĩena-inĩ, na ciarĩ mĩkono ĩĩrĩ; na gĩthaku gĩa kĩhingo kĩu kĩarĩ mwena ũrĩa warorete na thĩinĩ.
10 O mwena wa kĩhingo kĩu kĩa mwena wa irathĩro warĩ na tũnyũmba tũtatũ twa arangĩri. Tuothe tũtatũ nĩ twaiganaine, na itugĩ iria ciarĩ mĩena yerĩ nĩ ciaiganaine.
11 Agĩcoka agĩthima wariĩ wa mũromo wa kĩhingo kĩu, na warĩ mĩkono 10; na ũraihu wa kĩhingo kĩu warĩ mĩkono 13.
12 Gĩcigo kĩrĩa kĩahakanĩtio mwena wa mbere wa tũnyũmba twa arangĩri tũrĩa twarĩ mĩena yerĩ kĩarĩ mũkono ũmwe. Na o kanyũmba ka mũrangĩri mĩena yerĩ kaarĩ ka mĩkono ĩtandatũ.
13 Ningĩ agĩthima kĩhingo kĩu kuuma igũrũ rĩa kanyũmba* kamwe ka mũrangĩri nginya igũrũ rĩa karĩa kangĩ, na kĩarĩ na wariĩ wa mĩkono 25; na mĩrango yatuo nĩ yaroranĩte.+
14 Agĩcoka agĩthima itugĩ cia mĩena-inĩ, na ciarĩ mĩkono 60 kũraiha na igũrũ, o hamwe na itugĩ cia mĩena-inĩ iria ciarĩ ihingo-inĩ gũthiũrũrũkĩria nja ĩyo.
15 Kuuma mwena wa mbere wa mũromo wa kĩhingo nginya mwena wa mbere wa gĩthaku kĩrĩa kĩarĩ mwena wa thĩinĩ wa kĩhingo, haarĩ mĩkono 50.
16 Kwarĩ na ndirica ciarĩ na buremu ciathiĩte icekehete+ cia tũnyũmba twa arangĩri na cia itugĩ ciatuo cia mĩena-inĩ thĩinĩ wa kĩhingo mĩena yerĩ. Mĩena ya thĩinĩ ya ithaku o nayo yarĩ na ndirica o mwena, na itugĩ cia mĩena-inĩ ciacongetwo mĩhianĩre ya mĩkĩndũ.+
17 Agĩcoka akĩndwara thĩinĩ wa nja ĩrĩa nene, na ngĩona rumu cia kũrĩĩra*+ na gacĩra gaathondeketwo na mahiga gũthiũrũrũkĩria nja ĩyo. Na gacĩra-inĩ kau haarĩ na rumu 30 cia kũrĩĩra.
18 Wariĩ wa gacĩra kau kaarĩ mwena-inĩ wa ihingo waringaine na ũraihu wa ihingo icio, na nĩko kaarĩ gacĩra ka mũhuro.
19 Agĩcoka agĩthima wariĩ kuuma mwena wa mbere wa kĩhingo kĩa mũhuro nginya mũhaka-inĩ wa nja ĩrĩa nini. Na warĩ mĩkono 100 mwena wa irathĩro na mwena wa rũgongo.
20 Nja ĩrĩa nene yarĩ na kĩhingo kĩarorete mwena wa rũgongo, na agĩthima ũraihu na wariĩ wakĩo.
21 Kwarĩ na tũnyũmba tũtatũ twa arangĩri mĩena yerĩ. Itugĩ ciakĩo cia mĩena-inĩ na gĩthaku gĩakĩo ciarĩ na ithimi ta cia kĩhingo kĩa mbere. Kĩarĩ na ũraihu wa mĩkono 50 na wariĩ wa mĩkono 25.
22 Ndirica ciakĩo, gĩthaku gĩakĩo, na mĩcongo yakĩo ya mĩkĩndũ+ ciaiganaine na cia kĩhingo kĩa mwena wa irathĩro. Andũ maahaicaga ngathĩ mũgwanja nĩguo makinye harĩ kĩo, na gĩthaku gĩakĩo kĩarĩ mbere yacio.
23 Nja ĩrĩa nini yarĩ na kĩhingo kĩaroranĩte na kĩhingo kĩa rũgongo, na kĩngĩ kĩaroranĩte na kĩhingo kĩa irathĩro. Agĩthima ũraihu wa kuuma kĩhingo kĩmwe nginya kĩrĩa kĩngĩ, na warĩ mĩkono 100.
24 Agĩcoka akĩndwara mwena wa mũhuro, ngĩona kĩhingo mwena ũcio wa mũhuro.+ Agĩthima itugĩ ciakĩo cia mĩena-inĩ na gĩthaku gĩakĩo, na ciarĩ na ithimi o ta cia icio ingĩ.
25 Kwarĩ na ndirica mĩena-inĩ yakĩo o na gĩthaku-inĩ gĩakĩo, o ta ndirica iria ingĩ. Kĩarĩ na ũraihu wa mĩkono 50 na wariĩ wa mĩkono 25.
26 Kwarĩ na ngathĩ mũgwanja cia kwambata harĩ kĩo,+ na gĩthaku gĩakĩo kĩarĩ mbere yacio. Na itugĩ cia mĩena-inĩ ciacongetwo mĩhianĩre ya mĩkĩndũ, o mwena mũcongo ũmwe.
27 Nja ĩrĩa nini yarĩ na kĩhingo kĩarorete mwena wa mũhuro; agĩthima kuuma kĩhingo kĩmwe nginya kĩrĩa kĩngĩ arorete mwena wa mũhuro, na ũraihu warĩ mĩkono 100.
28 Agĩcoka akĩndwara thĩinĩ wa nja ĩrĩa nini kũgerera kĩhingo kĩa mwena wa mũhuro; na rĩrĩa aathimire kĩhingo kĩu kĩa mwena wa mũhuro, nĩ kĩaiganaine na iria ingĩ.
29 Tũnyũmba twakĩo twa arangĩri, itugĩ ciakĩo cia mĩena-inĩ, na gĩthaku gĩakĩo ciaiganaine na iria ingĩ. Kwarĩ na ndirica mĩena-inĩ yakĩo o na gĩthaku-inĩ gĩakĩo. Kĩarĩ na ũraihu wa mĩkono 50 na wariĩ wa mĩkono 25.+
30 Kwarĩ na ithaku ciathiũrũrũkĩirie mĩena yothe; ciarĩ na ũraihu wa mĩkono 25 na wariĩ wa mĩkono 5.
31 Gĩthaku gĩakĩo kĩarorete nja ĩrĩa nene, na kwarĩ na mĩcongo ya mĩkĩndũ itugĩ-inĩ ciakĩo cia mĩena-inĩ,+ na haarĩ ngathĩ inyanya cia kwambata harĩ kĩo.+
32 Na rĩrĩa aandwarire thĩinĩ wa nja ĩrĩa nini kũgerera mwena wa irathĩro, agĩthima kĩhingo kĩu, na nĩ kĩaiganaine na iria ingĩ.
33 Tũnyũmba twakĩo twa arangĩri, itugĩ ciakĩo cia mĩena-inĩ, na gĩthaku gĩakĩo ciaiganaine na iria ingĩ, na kwarĩ na ndirica mĩena-inĩ yakĩo o na gĩthaku-inĩ gĩakĩo. Kĩarĩ na ũraihu wa mĩkono 50 na wariĩ wa mĩkono 25.
34 Gĩthaku gĩakĩo kĩarorete nja ĩrĩa nene, na kwarĩ na mĩcongo ya mĩkĩndũ itugĩ-inĩ ciakĩo cierĩ cia mĩena-inĩ, na haarĩ ngathĩ inyanya cia kwambata harĩ kĩo.
35 Agĩcoka akĩndwara kĩhingo-inĩ kĩa mwena wa rũgongo+ na agĩgĩthima; kĩaiganaga o ta icio ingĩ.
36 Tũnyũmba twakĩo twa arangĩri, itugĩ ciakĩo cia mĩena-inĩ, na gĩthaku gĩakĩo ciaiganaine na iria ingĩ. Kĩarĩ na ndirica mĩena-inĩ yakĩo. Kĩarĩ na ũraihu wa mĩkono 50 na wariĩ wa mĩkono 25.
37 Itugĩ ciakĩo cia mĩena-inĩ ciarorete nja ĩrĩa nene, na kwarĩ na mĩcongo ya mĩkĩndũ itugĩ-inĩ ciakĩo cierĩ cia mĩena-inĩ, na haarĩ ngathĩ inyanya cia kwambata harĩ kĩo.
38 Haarĩ na rumu ya kũrĩĩra hamwe na mũromo wayo hakuhĩ na itugĩ cia mĩena-inĩ cia ihingo, harĩa magongona magima ma njino maathambagĩrio.+
39 Kwarĩ na metha igĩrĩ o mwena wa gĩthaku gĩa kĩhingo iria ciathĩnjagĩrũo magongona magima ma njino,+ magongona ma mehia,+ na magongona ma mahĩtia.+
40 Na ũgĩthiĩ kĩhingo-inĩ kĩa mwena wa rũgongo, haarĩ na metha igĩrĩ mũromo-inĩ ũtanaingĩra. Ningĩ haarĩ na metha igĩrĩ mwena ũcio ũngĩ wa gĩthaku gĩa kĩhingo.
41 O mwena wa kĩhingo warĩ na metha inya, ciothe ciarĩ metha inyanya, iria ciathĩnjagĩrũo magongona.
42 Metha icio inya cia igongona igima rĩa njino ciathondeketwo na mahiga ma gwacũhio. Ciarĩ cia mũkono ũmwe na nuthu kũraiha, mũkono ũmwe na nuthu kwarama, na mũkono ũmwe kũraiha na igũrũ. Na nĩcio ciaigagĩrĩrũo indo iria ciahũthagĩrũo gũthĩnja magongona ma njino na maruta.
43 Kwarĩ na tũhocio twarĩ na wariĩ wa rũhĩ rũmwe, twahũũrĩirũo thingo-inĩ cia thĩinĩ mĩena yothe; na nyama cia magongona ciaigagĩrĩrũo metha-inĩ icio.
44 Nja ya kĩhingo gĩa thĩinĩ nĩ kwarĩ rumu cia kũrĩĩra cia aini;+ ciarĩ nja ĩrĩa nini hakuhĩ na kĩhingo kĩa rũgongo, irorete mwena wa mũhuro. Rumu ĩngĩ ya kũrĩĩra yarĩ hakuhĩ na kĩhingo kĩa irathĩro, ĩrorete mwena wa rũgongo.
45 Akĩnjĩra atĩrĩ: “Rumu ĩno ya kũrĩĩra ĩrorete mwena wa mũhuro nĩ ya athĩnjĩri-Ngai arĩa matungataga thĩinĩ wa hekarũ.+
46 Rumu ya kũrĩĩra ĩrĩa ĩrorete mwena wa rũgongo nĩ ya athĩnjĩri-Ngai arĩa matungataga kĩgongona-inĩ.+ Nĩo ariũ a Zadoku,+ na nĩ Alawii arĩa maheetwo wĩra wa gũkuhĩrĩria Jehova nĩguo mamũtungatĩre.”+
47 Agĩcoka agĩthima nja ĩrĩa nini. Yaiganaine mĩena yothe ĩna, yarĩ na ũraihu wa mĩkono 100 na wariĩ wa mĩkono 100. Kĩgongona kĩarĩ mbere ya hekarũ.
48 Agĩcoka akĩndwara gĩthaku-inĩ kĩa hekarũ,+ agĩthima gĩtugĩ kĩa mwena-inĩ gĩa gĩthaku kĩu, na kĩarĩ mĩkono ĩtano mwena ũmwe na mĩkono ĩtano mwena ũcio ũngĩ. Wariĩ wa kĩhingo kĩu warĩ mĩkono ĩtatũ mwena ũmwe na mĩkono ĩtatũ mwena ũcio ũngĩ.
49 Gĩthaku kĩu kĩarĩ na ũraihu wa mĩkono 20 na wariĩ wa mĩkono 11.* Andũ maahaicaga ngathĩ nĩguo makinye harĩ kĩo. Kwarĩ na itugĩ hakuhĩ na ikĩngĩ cia mĩena-inĩ, o mwena gĩtugĩ kĩmwe.+
Tũũhoro twa magũrũ-inĩ
^ Nĩ mũmera wakũragio kuuma tene. Ndigi ciaguo nĩ ciahũthagĩrũo gũthondeka nguo cia gatani.
^ Rora Ũhoro Muongerere B14.
^ Ũkk., “ũige ngoro-inĩ.”
^ Ũkk., “nyũmba.” Kiugo gĩkĩ nĩkĩo kĩhũthĩrĩtwo thĩinĩ wa mũrango wa 40-48 rĩrĩa kiugo “nyũmba” kĩrarĩrĩria hekarũ na mĩako yayo kana hekarũ yo nyene.
^ Ũkk., “ithanjĩ rĩa gũthima rĩa mĩkono ĩtandatũ, mũkono ũmwe na rũhĩ rũmwe.” Mĩkono ĩno nĩ ĩrĩa mĩraihu. Rora Ũhoro Muongerere B14.
^ Kwahoteka nĩ igũrũ rĩa rũthingo rwa kanyũmba ka mũrangĩri.
^ Kana “ngĩona tũnyũmba.”
^ Kana hihi, “12.”
