Ezekieli 5:1-17
5 “Nawe mũrũ wa mũndũ-rĩ, oya rũhiũ rũũgĩ rwa njora ũrũhũthĩre ta rwenji rwa mwenjani. Wĩenje mũtwe o na nderu, ũcoke woe ratiri ũthime na ũgayanie njuĩrĩ ĩyo icunjĩ ithatũ.
2 Na matukũ ma kũrigicĩrio mathira, ũcine gĩcunjĩ kĩmwe kĩayo na mwaki thĩinĩ wa itũũra rĩu.+ Ũcoke woe gĩcunjĩ gĩa kerĩ ũkĩhũũre na rũhiũ rwa njora kũndũ guothe gũthiũrũrũka itũũra rĩu,+ na gĩcunjĩ kĩu kĩngĩ gĩa gatatũ ũkĩrekererie gĩthiĩ na rũhuho, na nĩ ngaacomora rũhiũ rwa njora ndĩmaingatithie.+
3 “Ningĩ no mũhaka woe tũcuĩrĩ tũigana ũna harĩ gĩcunjĩ kĩu ũtũkũnjanĩrie na mĩkũnjo ya nguo yaku.
4 Na woe tũcuĩrĩ tũngĩ ũtũikie mwaki-inĩ ũtũcine tũhĩe biũ. Naguo mwaki nĩ ũkuuma hau ũthereme kũrĩ nyũmba yothe ya Isiraeli.+
5 “Jehova Mwathani Ũrĩa Mũnene oigĩte ũũ: ‘Ĩno nĩ Jerusalemu. Ndĩmĩigĩte gatagatĩ ka ndũrĩrĩ, ĩthiũrũrũkĩirio nĩ mabũrũri.
6 No nĩ ĩregete gwathĩkĩra matuĩro makwa ma ciira o na mawatho makwa, ĩgeka maũndũ moru gũkĩra ndũrĩrĩ na mabũrũri marĩa mamĩthiũrũrũkĩirie.+ Nĩ gũkorũo nĩ maregete matuĩro makwa ma ciira, na matirũmagĩrĩra mawatho makwa.’
7 “Nĩ ũndũ ũcio-rĩ, Jehova Mwathani Ũrĩa Mũnene oigĩte ũũ: ‘Tondũ nĩ ũtuĩkĩte mũremi gũkĩra ndũrĩrĩ ciothe iria igũthiũrũrũkĩirie na ndũrũmĩrĩire mawatho makwa kana ũkahingia matuĩro makwa ma ciira, no ithenya rĩa ũguo ũrũmĩrĩire matuĩro ma ciira ma ndũrĩrĩ iria igũthiũrũrũkĩirie-rĩ,+
8 Jehova Mwathani Ũrĩa Mũnene oigĩte ũũ: “Nĩ ngagũũkĩrĩra, wee itũũra rĩrĩ,+ na niĩ mwene nĩ ngaahingia ituĩro rĩakwa thĩinĩ waku ndũrĩrĩ ikĩonaga.+
9 Thĩinĩ waku nĩ ngeeka maũndũ itarĩ ndeka rĩngĩ, na itageka rĩngĩ, nĩ ũndũ wa ciĩko ciaku ciothe iria irĩ magigi.+
10 “‘“Nĩ ũndũ ũcio, thĩinĩ waku maithe nĩ makaarĩa ariũ ao,+ nao ariũ nĩ makaarĩa maithe, na nĩ ngaahingia ituĩro rĩakwa thĩinĩ waku, nao arĩa magaatigara gatagatĩ-inĩ gaku ndĩmahurunje na mĩena yothe.”’*+
11 “Jehova Mwathani Ũrĩa Mũnene oigĩte ũũ: ‘Nĩ ũndũ ũcio-rĩ, o ta ũrĩa niĩ ndũũraga muoyo, tondũ nĩ ũthahĩtie handũ hakwa harĩa hatheru kũgerera mĩhianano yaku yothe ĩrĩ magigi na ciĩko ciaku ciothe irĩ magigi,+ o na niĩ nĩ ngaakũrega;* riitho rĩakwa rĩtigaakũiguĩra tha, na ndigaagũcaĩra.+
12 Gĩcunjĩ gĩa ithatũ kĩa andũ aku gĩgaakua nĩ ũndũ wa mũrimũ mũũru kana kĩniinwo nĩ ng’aragu. Nakĩo gĩcunjĩ kĩngĩ gĩa ithatũ nĩ gĩkooragwo na rũhiũ rwa njora kũndũ guothe kũrĩa gũgũthiũrũrũkĩirie.+ Na kĩu kĩngĩ gĩa ithatũ ndĩkĩhurunje gĩthiĩ mĩena yothe,* na nĩ ngaacomora rũhiũ rwa njora ndĩmaingatithie.+
13 Hĩndĩ ĩyo marakara makwa nĩ magaathira, na mang’ũrĩ makwa kũmerekera manyihe, na nĩ ngaiganĩra.+ Na rĩrĩa ngaakorũo ndĩkĩtie kũmaitũrũrĩra mang’ũrĩ makwa, nĩ makaamenya atĩ niĩ, Jehova, njarĩtie ũguo tondũ nyendaga wĩrutĩri wa ngoro yothe.+
14 “‘Nĩ ngaakwananga biũ na ngũtue kĩndũ gĩa kũnyũrũrio harĩ ndũrĩrĩ iria igũthiũrũrũkĩirie na maitho-inĩ ma mũndũ wothe ũrahĩtũka.+
15 Hĩndĩ ĩrĩa ngaahingia ituĩro rĩakwa ndĩ na marakara na mang’ũrĩ, na ngũherithie ndĩ na mathũgũta manene, ũgaatuĩka kĩndũ gĩa kũnyũrũrio na kũnyararũo,+ ũtuĩke mũkaana na kĩndũ gĩa kũguoyohia harĩ ndũrĩrĩ iria igũthiũrũrũkĩirie. Niĩ Jehova, nĩ niĩ njugĩte ũguo.
16 “‘Nĩ ngaamatũmĩra mĩguĩ mĩũru ya ng’aragu ĩmaniine. Mĩguĩ ĩrĩa ngaatũma nĩ ĩgaakwananga.+ Na nĩ ngaatũma ng’aragu ĩyo ĩkorũo ĩrĩ nene harĩ wee na njĩra ya kũniina irio ciaku.*+
17 Nĩ ngaakũrehera ng’aragu na nyamũ njũru cia gĩthaka,+ na nĩ ikooraga ciana ciaku. Nĩ ũgaatoorio nĩ mũrimũ mũũru na ũiti wa thakame, na nĩ ngaakũrehera rũhiũ rwa njora rũgũũkĩrĩre.+ Niĩ Jehova, nĩ niĩ njugĩte ũguo.’”
Tũũhoro twa magũrũ-inĩ
^ Ũkk., “huho-inĩ ciothe.”
^ Kana “nĩ ngaatũma ũnyihe.”
^ Ũkk., “huho-inĩ ciothe.”
^ Ũkk., “kuunanga mĩtĩ yaku ya mĩgate.” No kũhoteke nĩ mĩtĩ ĩrĩa yahũthagĩrũo gũcuuria mĩgate.
