Ezekieli 8:1-18
8 Na mwaka wa gatandatũ, mweri wa gatandatũ, mũthenya wa gatano wa mweri ũcio, rĩrĩa ndaikarĩte thĩ thĩinĩ wa nyũmba yakwa, nao athuri* a Juda maaikarĩte thĩ mbere yakwa, guoko kwa Jehova Mwathani Ũrĩa Mũnene nĩ kwanyitire ndĩ hau.
2 Na rĩrĩa ndarorire, ngĩona mũndũ warĩ na mũhianĩre ta wa mwaki; na haarĩ na mwaki kuuma harĩa hoonekaga ta arĩ ho njohero yake gũcoka na thĩ,+ na kuuma njohero-inĩ yake gũthiĩ na igũrũ oonekaga akengete, o ta cuma ĩrahenia.*+
3 Agĩcoka agĩtambũrũkia kĩrĩa kĩoonekaga ta arĩ guoko na akĩnyita tũcuĩrĩ twa kĩongo gĩakwa, na roho ũkĩnguua ndĩ gatagatĩ ga thĩ na igũrũ ũkĩndwara Jerusalemu kũgerera cioneki kuuma kũrĩ Ngai, ũkĩnginyia mũromo-inĩ wa kĩhingo gĩa thĩinĩ+ kĩrĩa kĩarorete mwena wa rũgongo, harĩa mũhianano wa ũiru ũrĩa ũrehaga ũiru warũngiĩ.+
4 Na rĩrĩ, kũu kwarĩ na riri wa Ngai wa Isiraeli,+ o ta mũhianĩre ũrĩa ndonete mũkuru-inĩ mwaraganu.+
5 Hĩndĩ ĩyo akĩnjĩra atĩrĩ: “Mũrũ wa mũndũ, ta rora mwena wa rũgongo.” Nĩ ũndũ ũcio ngĩrora mwena wa rũgongo, na hau mwena wa rũgongo wa kĩhingo gĩa kĩgongona, haarĩ na mũhianano wa ũiru itonyero-inĩ.
6 Na akĩnjĩra atĩrĩ: “Mũrũ wa mũndũ, hihi nĩ ũrona maũndũ moru mũno na marĩ magigi marĩa marekwo nĩ nyũmba ya Isiraeli gũkũ,+ maũndũ maratũma thiĩ haraya na handũ hakwa harĩa hatheru?+ No nĩ ũkuona maũndũ marĩ magigi na moru o na makĩria.”
7 Agĩcoka akĩndwara mũromo-inĩ wa nja ya hekarũ, na rĩrĩa ndarorire, ngĩona irima rũthingo-inĩ.
8 Nake akĩnjĩra atĩrĩ: “Mũrũ wa mũndũ, aramia irima rĩu rĩrĩ rũthingo-inĩ.” Nĩ ũndũ ũcio ngĩaramia irima rĩu rĩarĩ rũthingo-inĩ, ngĩona handũ ha gũtonyera.
9 Ningĩ akĩnjĩra ũũ: “Tonya thĩinĩ wone maũndũ moru na marĩ magigi marĩa andũ acio mareka kuo.”
10 Ngĩgĩtonya kuo na ngĩrora, ngĩona mĩcongo ya mĩthemba yothe ya ciũmbe iria itambaga thĩ, na nyamũ iria irĩ magigi+ na mĩhianano yothe ĩrĩ magigi* ya nyũmba ya Isiraeli;+ yacongetwo gũthiũrũrũka rũthingo ruothe.
11 Na athuri 70 a nyũmba ya Isiraeli maarũgamĩte mbere yayo, na Jaazania mũrũ wa Shafani+ aarũgamĩte hamwe nao. O ũmwe wao aanyitĩte rũgĩo rwa gũcinĩra ũbumba, na kwarĩ na itu rĩanungaga wega rĩa ũbumba rĩaambataga na igũrũ.+
12 Akĩnjĩra atĩrĩ: “Mũrũ wa mũndũ, hihi nĩ ũrona maũndũ marĩa athuri* a nyũmba ya Isiraeli marekĩra nduma-inĩ, o mũndũ arĩ rumu-inĩ cia thĩinĩ kũrĩa aigĩte mĩhianano yake? Nĩ gũkorũo maroiga ũũ, ‘Jehova ndaratuona. Jehova nĩ eherete bũrũri-inĩ.’”+
13 Agĩcoka akĩnjĩra atĩrĩ: “Nĩ ũkuona maũndũ marĩ magigi na moru makĩria marĩa mareka.”
14 Kwoguo akĩndwara mũromo-inĩ wa kĩhingo kĩa mwena wa rũgongo kĩa nyũmba ya Jehova, na hau ngĩona atumia maikarĩte thĩ makĩrĩrĩra ngai ya Tamuzu.
15 Ningĩ akĩnjĩra atĩrĩ: “Hihi nĩ ũrona maũndũ maya, wee mũrũ wa mũndũ? Nĩ ũkuona maũndũ marĩ magigi na moru o na gũkĩra maya.”+
16 Nĩ ũndũ ũcio, akĩndwara nja ĩrĩa nini ya nyũmba ya Jehova.+ Hau mũromo-inĩ wa hekarũ ya Jehova, gatagatĩ ga gĩthaku na kĩgongona, haarĩ na arũme ta 25 mahũgũkĩire hekarũ ya Jehova na mothiũ mao maarorete mwena wa irathĩro; maainamagĩrĩra riũa mwena wa irathĩro.+
17 Agĩcoka akĩnjĩra atĩrĩ: “Mũrũ wa mũndũ, hihi nĩ ũrona maũndũ maya? Hihi nĩ ũndũ mũnini harĩ nyũmba ya Juda gwĩka maũndũ maya marĩ magigi, makaiyũria bũrũri na ũhinya,+ na magaikara makĩndakaragia? Nĩ gũikia maraikia rũhonge* iniũrũ-inĩ rĩakwa.
18 Nĩ ũndũ ũcio, nĩ ngoya ikinya ndĩ na mathũgũta. Riitho rĩakwa rĩtikaamaiguĩra tha; na ndikaamacaĩra.+ O na mangĩkarĩrĩra matũ-inĩ makwa maanĩrĩire, ndikaamaigua.”+
Tũũhoro twa magũrũ-inĩ
^ Athuri arĩa meehokeirũo maũndũ.
^ Cuma yarĩ mũtukanio wa thahabu na betha.
^ Haha kiugo gĩa Kĩhibirania kĩrĩa gĩtaũrĩtwo no kĩringane na kiugo kĩrĩa gĩtaũragwo “mai” na kĩhũthĩkaga kuonania ũhoro wa kĩndũ kĩrĩ magigi.
^ Athuri arĩa meehokeirũo maũndũ.
^ No kũhoteke nĩ rũhonge rwahũthagĩrũo ũthathaiya-inĩ wa mĩhianano.
