Ezekieli 9:1-11
9 Agĩcoka akĩanĩrĩra na mũgambo mũnene matũ-inĩ makwa akiuga atĩrĩ: “Ĩta andũ arĩa mekũherithia itũũra rĩrĩ, o ũmwe wao anyitĩte itharaita rĩake rĩa kwananga!”
2 Ngĩona andũ atandatũ moimĩte na kũrĩa kĩhingo kĩa rũgongo kĩarĩ,+ kĩrĩa kĩarorete mwena wa rũgongo, o ũmwe wao anyitĩte itharaita rĩake rĩa kwananga; na haarĩ na mũndũ ũmwe gatagatĩ-inĩ kao wehumbĩte nguo ya gatani, na njohero-inĩ aarĩ na rũhĩa rwa mwandĩki rwa gwĩkĩra rangi, na makĩingĩra makĩrũgama hakuhĩ na kĩgongona gĩa gĩcango.+
3 Naguo riri wa Ngai wa Isiraeli+ ũkiuma harĩa warĩ igũrũ rĩa akerubi ũgĩthiĩ mũrango-inĩ wa nyũmba ĩyo,+ na akĩambĩrĩria kwarĩria mũndũ ũcio wehumbĩte nguo ya gatani, o ũcio warĩ na rũhĩa rwa mwandĩki njohero-inĩ rwa gwĩkĩra rangi.
4 Jehova akĩmwĩra atĩrĩ: “Tuĩkanĩria itũũra-inĩ, ũtuĩkanĩrie Jerusalemu, na wĩkĩre rũũri mathiithi-inĩ ma andũ arĩa maracaya na magacakaya+ nĩ ũndũ wa maũndũ mothe marĩ magigi marĩa marekwo itũũra-inĩ rĩu.”+
5 Nao acio angĩ akĩmeera ũũ ngĩiguaga: “Mũrũmĩrĩrei mũtuĩkanĩrie itũũra rĩrĩ mũũrage andũ. Mũtigetĩkĩrie riitho rĩanyu rĩigue tha, na mũtikamacaĩre.+
6 Mũũrage biũ mũthuri mũkũrũ, mwanake, mũirĩtu gathirange, mwana mũnini, na atumia.+ No mũtigakuhĩrĩrie mũndũ o wothe ũrĩ na rũũri rũu.+ Na mwagĩrĩirũo kwambĩrĩria na handũ hakwa harĩa hatheru.”+ Nĩ ũndũ ũcio makĩambĩrĩria na athuri* arĩa maarĩ mbere ya nyũmba ĩyo.+
7 Agĩcoka akĩmeera atĩrĩ: “Thahiai nyũmba ĩyo na mũiyũrie nja ciayo ciimba cia arĩa moragĩtwo.+ Thiĩi!” Nĩ ũndũ ũcio makiumagara na makĩũraga andũ itũũra-inĩ.
8 No niĩ ndatigarire hĩndĩ ĩyo maamoragaga, na ngĩĩgũithia ngĩturumithia ũthiũ thĩ ngĩanĩrĩra ngiuga ũũ: “Hĩ, atĩrĩrĩ wee Jehova Mwathani Ũrĩa Mũnene! Hihi ũkũniina arĩa othe matigarĩte thĩinĩ wa Isiraeli ũgĩitũrũra mathũgũta maku harĩ Jerusalemu?”+
9 Nĩ ũndũ ũcio akĩnjĩra atĩrĩ: “Mehia ma nyũmba ya Isiraeli na Juda nĩ maingĩ mũno.+ Bũrũri ũiyũire ũiti wa thakame,+ narĩo itũũra rĩkaiyũra ungumania.+ Nĩ gũkorũo moigaga atĩrĩ, ‘Jehova nĩ eherete bũrũri-inĩ, na Jehova ndarona.’+
10 No niĩ-rĩ, riitho rĩakwa rĩtikaamaiguĩra tha; na ndikaamacaĩra.+ Ngaamarehera moimĩrĩro ma njĩra yao igũrũ rĩa mũtwe wao ene.”
11 Ngĩcoka ngĩona mũndũ ũcio wehumbĩte nguo ya gatani, na warĩ na rũhĩa rwa mwandĩki njohero-inĩ rwa gwĩkĩra rangi agĩcokia ũhoro, akiuga ũũ: “Nĩ ndeka o ta ũrĩa ũkũnjathĩte.”
Tũũhoro twa magũrũ-inĩ
^ Athuri arĩa meehokeirũo maũndũ.
