Hagai 2:1-23
2 Mweri-inĩ wa mũgwanja, mũthenya wa 21 wa mweri ũcio, kiugo kĩa Jehova nĩ gĩokire kũgerera harĩ mũnabii Hagai+ gĩkiuga atĩrĩ,
2 “Ta ũria Zerubabeli+ mũrũ wa Shealitieli, ũcio ngavana wa Juda,+ na Joshua+ mũrũ wa Jehozadaku,+ mũthĩnjĩri-Ngai ũrĩa mũnene, na andũ acio angĩ atĩrĩ:
3 ‘Nũũ ũtigarĩte gatagatĩ-inĩ kanyu woonire riri ũrĩa nyũmba* ĩno yarĩ naguo mbere?+ Mũrona ĩhaana atĩa rĩu? Githĩ ndĩroneka ĩhaana kĩndũ hatarĩ yaringithanio?’+
4 “‘No rĩrĩ, gĩa na hinya, wee Zerubabeli,’ ũguo nĩguo Jehova ekuuga, ‘na ũgĩe na hinya, wee Joshua mũrũ wa Jehozadaku, mũthĩnjĩri-Ngai ũrĩa mũnene.’
“‘Na mũgĩe na hinya, inyuĩ andũ othe a bũrũri,’+ ũguo nĩguo Jehova ekuuga, ‘na mũrute wĩra.’
“‘Nĩ gũkorũo niĩ ndĩ hamwe na inyuĩ,’+ ũguo nĩguo Jehova mũnene wa ita ekuuga.
5 ‘Ririkanai ũndũ ũrĩa ndamwĩrĩire rĩrĩa mwoimire bũrũri wa Misiri,+ na roho wakwa ũrĩ o gatagatĩ-inĩ kanyu.*+ Mũtigetigĩre.’”+
6 “Nĩ gũkorũo ũũ nĩguo Jehova mũnene wa ita ekuuga, ‘O rĩngĩ—thutha wa ihinda inini—nĩ ngaathingithia igũrũ na thĩ na iria na thĩ nyũmũ.’+
7 “‘Na nĩ ngaathingithia ndũrĩrĩ ciothe, na indo cia goro* cia ndũrĩrĩ ciothe nĩ ikaaingĩra;+ na nĩ ngaaiyũria nyũmba ĩno riri,’+ ũguo nĩguo Jehova mũnene wa ita ekuuga.
8 “‘Betha nĩ yakwa, na thahabu nĩ yakwa,’ ũguo nĩguo Jehova mũnene wa ita ekuuga.
9 “‘Riri wa ihinda rĩũkĩte wa nyũmba ĩno ũgaakorũo ũrĩ mũnene gũkĩra ũrĩa yarĩ naguo mbere,’+ ũguo nĩguo Jehova mũnene wa ita ekuuga.
“‘Na nĩ ngaatũma kũndũ gũkũ kũgĩe thayũ,’+ ũguo nĩguo Jehova mũnene wa ita ekuuga.”
10 Mũthenya wa 24 wa mweri wa kenda, mwaka-inĩ wa kerĩ wa Dario, kiugo kĩa Jehova nĩ gĩakinyĩire mũnabii Hagai+ akĩrũo atĩrĩ:
11 “Jehova mũnene wa ita ekuuga ũũ, ‘Ta ũria athĩnjĩri-Ngai ũhoro wĩgiĩ watho,+ ũmorie atĩrĩ:
12 “Mũndũ angĩkuua nyama nyamũre mũhuko-inĩ wa nguo yake, na nguo ĩyo yake ĩhutie mũgate kana gĩtoero kana ndibei kana maguta kana irio cia mũthemba ũngĩ o wothe-rĩ, hihi no ituĩke nyamũre?”’”
Nao athĩnjĩri-Ngai magĩcokia makiuga: “Aca!”
13 Hagai agĩcoka akĩũria atĩrĩ: “Mũndũ ũrĩ na thahu nĩ ũndũ wa kũhutia kĩimba* angĩhutia kĩndũ o na kĩmwe gĩa icio-rĩ, hihi kĩndũ kĩu no kĩgĩe na thahu?”+
Nao athĩnjĩri-Ngai magĩcokia makiuga: “No kĩgĩe na thahu.”
14 Nĩ ũndũ ũcio Hagai akiuga atĩrĩ: “‘Ũguo nĩguo andũ aya matariĩ, na ũguo nĩguo rũrĩrĩ rũrũ rũtariĩ maitho-inĩ makwa, na ũguo nĩguo wĩra wothe wa moko mao ũtariĩ; kĩrĩa gĩothe marutaga kũu gĩkoragwo na thahu,’ ũguo nĩguo Jehova ekuuga.
15 “‘No rĩrĩ, ta mwĩciriei mũno ũndũ ũyũ kuuma mũthenya ũyũ gũthiĩ na mbere: Ihiga rĩtanaigĩrĩrũo igũrũ wa rĩrĩa rĩngĩ hekarũ-inĩ ya Jehova-rĩ,+
16 maũndũ maahaanaga atĩa hĩndĩ ĩyo? Mũndũ angĩathiire hĩba-inĩ ya ngano akĩĩrĩgĩrĩra ithimi 20, aakoraga 10 tu; na mũndũ angĩathiire mũtũngi-inĩ gũtaha ithimi 50 mũharatĩ-inĩ wa ndibei, aakoraga 20 tu;+
17 Nĩ ndamũhũũrire, ngĩhũũra wĩra wothe wa moko manyu na ũrugarĩ mũnene na mbuu+ na mbura ya mbembe, no gũtirĩ o na ũmwe wanyu wanjokereire,’ ũguo nĩguo Jehova ekuuga.
18 “‘Ta mwĩciriei mũno ũndũ ũyũ kuuma mũthenya ũyũ gũthiĩ na mbere, kuuma mũthenya wa 24 wa mweri wa kenda, kuuma mũthenya ũrĩa mũthingi wa hekarũ ya Jehova waakirũo;+ mwĩciriei mũno ũndũ ũyũ:
19 Hihi nĩ kũrĩ mbegũ ĩtigarĩte ikũmbĩ-inĩ?*+ Mũthabibũ, mũkũyũ, mũkomamanga, na mũtĩ wa mũtamaiyũ—hihi nĩ kũrĩ ũrutĩte maciaro? Kuuma mũthenya ũyũ nĩ ndĩrĩtũmaga kĩrathimo.’”+
20 Kiugo kĩa Jehova gĩgĩkinyĩra Hagai riita rĩa kerĩ mũthenya wa 24 wa mweri,+ akĩrũo atĩrĩ:
21 “Ĩra Zerubabeli ũcio ngavana wa Juda atĩrĩ, ‘Nĩ ngũthingithia igũrũ na thĩ.+
22 Nĩ ngaang’aũrania gĩtĩ kĩa ũnene kĩa mothamaki na niine hinya wa mothamaki ma ndũrĩrĩ;+ na nĩ ngaang’aũrania ngaari ya mbarathi na atwarithia ayo, na mbarathi hamwe na atwarithia a cio nĩ makaagwa, o ũmwe wao oragwo nĩ rũhiũ rwa njora rwa mũrũ wa ithe.’”+
23 Jehova mũnene wa ita ekuuga atĩrĩ, “‘Mũthenya ũcio, nĩ ngaakuoya wee ndungata yakwa Zerubabeli+ mũrũ wa Shealitieli,’+ ũguo nĩguo Jehova ekuuga, ‘na nĩ ngaagũtua ta gĩcũhĩ kĩa mũhũũri, tondũ wee nĩwe thuurĩte,’ ũguo nĩguo Jehova mũnene wa ita ekuuga.”
Tũũhoro twa magũrũ-inĩ
^ Kana “hekarũ.”
^ Kana hihi, “na rĩrĩa roho wakwa warũgamĩte gatagatĩ-inĩ kanyu.”
^ Kana “kwĩrirĩrio.”
^ Kĩhibirania, ne′phesh. Rora Ũthathaũri wa Ciugo.
^ Kana “irima-inĩ rĩa kũiga ngano (kana cairi)?”
