Isaia 6:1-13
6 Na rĩrĩ, mwaka ũrĩa Mũthamaki Uzia aakuire,+ nĩ ndonire Jehova aikarĩire gĩtĩ kĩa ũnene kĩrĩ handũ igũrũ na gĩtũũgĩrĩtio,+ na icũrĩ cia kanjũ yake ciaiyũrĩte hekarũ yothe.
2 Aserafi maarũgamĩte igũrũ rĩake; o ũmwe wao aarĩ na mathagu matandatũ. O serafi eehumbĩrĩte ũthiũ wake na mathagu merĩ na akehumbĩra magũrũ make na mathagu merĩ, na o ũmwe wao oombũkaga na mathagu merĩ.
3 Na o ũmwe wao eeraga ũcio ũngĩ atĩrĩ:
“Mũtheru, mũtheru, mũtheru nĩ Jehova mũnene wa ita.+
Thĩ yothe ĩiyũirũo nĩ riri wake.”
4 Na itugĩ cia mĩrango ikĩinaina nĩ ũndũ wa mũgambo wa mũrurumo ũcio,* nayo nyũmba ĩyo ĩkĩiyũra ndogo.+
5 Na niĩ ngiuga ũũ: “Kaĩ ndĩ na haaro-ĩ!
Ndariĩ o ta ndĩ mũkuũ,*Nĩ gũkorũo ndĩ mũndũ ũrĩ na mĩromo ĩtarĩ mĩtheru,Na njikaranagia na andũ makoragwo na mĩromo ĩtarĩ mĩtheru;+Nĩ ũndũ maitho makwa nĩ monete Mũthamaki, Jehova mũnene wa ita we mwene!”
6 Hĩndĩ ĩyo, serafi ũmwe akĩũmbũka agĩũka harĩ niĩ, na guoko-inĩ gwake aarĩ na ikara rĩa mwaki+ rĩrĩa ooire kĩgongona-inĩ akĩhũthĩra kĩndũ gĩa kũnyita mwaki.+
7 Akĩhutia kanua gakwa na akiuga:
“Atĩrĩrĩ, ikara rĩrĩ nĩ rĩahutia mĩromo yaku.
Nĩ wehererio mahĩtia maku,Namo mehia maku nĩ maahumbĩrũo.”
8 Ngĩcoka ngĩigua mũgambo wa Jehova ũkiuga: “Nũũ ngũtũma, na nũũ ũgũthiĩ handũ-inĩ haitũ?”+ Na niĩ ngĩcokia ũũ: “Niĩ ũyũ haha! Ndũma!”+
9 Nake akĩnjĩra, “Thiĩ, wĩre andũ acio ũũ:
‘Nĩ mũkũigua rĩngĩ na rĩngĩ,Ĩndĩ mũtigũtaũkĩrũo;Nĩ mũkuona rĩngĩ na rĩngĩ,Ĩndĩ mũtikũgĩa na ũmenyo o na ũrĩkũ.’+
10 Tũma ngoro cia andũ aya ciũme,+Na ũtũme matũ mao mage kũigua,+Na ũhinge maitho mao,Nĩgetha matikone na maitho maoNa matikaigue na matũ mao,Nĩguo ngoro ciao itigataũkĩrũoNa nĩgetha matikagarũrũke mahonio.”+
11 Ndaigua ũguo ngĩũria: “Nĩ nginya rĩ, Jehova?” Nake akĩnjĩra ũũ:
“Nĩ nginya rĩrĩa matũũra magaathũkangio kwage mũndũ ũgũikara kuoNa nyũmba ikorũo itarĩ andũNa bũrũri ũkorũo ũthũkangĩtio na ũgatuĩka kũndũ gũtiganĩrie;+
12 Nginya rĩrĩa Jehova akeeheria andũ amatware kũndũ kũraihu+Naguo bũrũri ũkorũo ũtiganĩirio biũ.
13 “No nĩ gũgaakorũo gũtigarĩte gĩcunjĩ gĩa ikũmi thĩinĩ waguo, na nĩ ũgaacinwo o rĩngĩ, o ta mũtĩ mũnene na o ta mũtĩ wa mũgandi, ĩrĩa ĩtigaraga gĩthukĩ thutha wa gũtemwo; mbeũ nyamũre nĩyo ĩgaatuĩka* gĩthukĩ kĩaguo.”
Tũũhoro twa magũrũ-inĩ
^ Ũkk., “mũgambo wa ũcio waaririe.”
^ Ũkk., “Nĩ ndakirio.”
^ Kana “rũciaro rwamũre nĩruo rũgaatuĩka.”
