Ũhoro Mwega Ũrĩa Waandĩkirũo nĩ Johana 13:1-38
13 Na rĩrĩ, tondũ Jesu nĩ aamenyaga o mbere ya gĩathĩ gĩa Pasaka atĩ ihinda rĩake+ rĩa kuuma thĩ ĩno athiĩ kũrĩ Ithe+ nĩ rĩakinyĩte, na tondũ nĩ aakoretwo endete arũmĩrĩri ake arĩa maarĩ thĩinĩ wa thĩ, akĩmenda o nginya mũthia.+
2 Na rĩrĩa maarĩaga irio cia hwaĩ-inĩ, Mũcukani nĩ aarĩkĩtie gwĩkĩra ngoro-inĩ ya Judasi Mũisikariota,+ mũrũ wa Simoni, rĩciria rĩa gũkunyanĩra Jesu.+
3 Tondũ Jesu nĩ aamenyaga atĩ Ithe nĩ aamũheete indo ciothe na atĩ ooimĩte kũrĩ Ngai na aarĩ hakuhĩ gũcoka kũrĩ Ngai,+
4 agĩũkĩra kuuma harĩa maarĩagĩra irio cia hwaĩ-inĩ na akĩruta nguo ciake cia igũrũ. Akĩoya taurũ, akĩĩyoha njohero.*+
5 Agĩcoka agĩĩkĩra maĩ kĩraĩ-inĩ na akĩambĩrĩria gũthambia arutwo magũrũ na kũmagiria na taurũ ĩyo eeyohete.*
6 Agĩgĩkinya harĩ Simoni Petero. Nake Petero akĩmũũria atĩrĩ: “Mwathani, ũrenda gũũthambia magũrũ?”
7 Jesu akĩmũcokeria ũũ: “Ũndũ ũyũ ndĩreka ndũrataũkĩrũo nĩguo rĩu, ĩndĩ ũgaataũkĩrũo thutha wa maũndũ maya.”
8 Petero akĩmwĩra: “Gũtirĩ hĩndĩ niĩ ũngĩthambia magũrũ.” Nake Jesu akĩmũcokeria: “Itangĩgũthambia,+ ndũrĩ ngwatanĩro hamwe na niĩ.”
9 Nake Simoni Petero akĩmwĩra: “Mwathani, ndũgathambie o magũrũ moiki ĩndĩ thambia nginya moko na mũtwe.”
10 Jesu akĩmwĩra: “Mũndũ o wothe ũrĩa wĩthambĩte ndabataraga gũthambio makĩria ma magũrũ tondũ akoragwo atherete biũ. Na inyuĩ mũrĩ atheru, ĩndĩ ti inyuothe.”
11 Nĩ aamenyaga mũndũ ũrĩa warĩ hakuhĩ kũmũkunyanĩra.+ Nĩkĩo ooigire ũũ: “Ti inyuothe atheru.”
12 Na rĩrĩa aarĩkirie kũmathambia magũrũ na gwĩkĩra nguo ciake cia igũrũ, agĩcoka metha-inĩ akĩmoria: “Hihi nĩ mwataũkĩrũo nĩ ũguo ndeka?
13 Mũnjĩtaga ‘Mũrutani’ na ‘Mwathani,’ na mũtikoragwo mũhĩtĩtie, tondũ ũguo nĩguo ndariĩ.+
14 Kwoguo, angĩkorũo niĩ Mwathani na Mũrutani wanyu nĩ ndamũthambia magũrũ-rĩ,+ o na inyuĩ nĩ mwagĩrĩirũo gũthambanagia magũrũ.+
15 Nĩ gũkorũo nĩ kĩonereria ndamũigĩra, atĩ o ta ũguo ndeka harĩ inyuĩ, o na inyuĩ mwĩkage ũguo.+
16 Ngũmwĩra atĩrĩ o ma o ma, ngombo ti nene gũkĩra mwathi wayo, o nake ũrĩa ũtũmĩtwo ti mũnene gũkĩra ũrĩa ũmũtũmĩte.
17 Angĩkorũo nĩ mũĩ maũndũ macio-rĩ, gũkena nĩ inyuĩ mũngĩmekaga.+
18 Ndiraria ũhoro wanyu inyuothe; nĩ njũĩ arĩa thuurĩte. No rĩrĩ, gũgũtuĩka ũguo nĩgetha rĩandĩko rĩrĩ rĩhinge:+ ‘Ũrĩa ũrarĩaga mũgate wakwa nĩ angarũrũkĩte.’+
19 Ndĩramwĩra o mbere ũndũ ũcio ũtanekĩka, nĩguo rĩrĩa ũgeekĩka mũgeetĩkia atĩ niĩ nĩ niĩ we.+
20 Ngũmwĩra atĩrĩ o ma o ma, ũrĩa wothe wamũkagĩra mũndũ o wothe ndũmĩte nĩ anyamũkagĩra o na niĩ,+ na ũrĩa wothe ũnyamũkagĩra amũkagĩra nginya Ũrĩa wandũmire.”+
21 Jesu arĩkia kuuga maũndũ macio, agĩtangĩka mũno,* na akĩruta ũira akiuga: “Ngũmwĩra atĩrĩ o ma o ma, ũmwe wanyu nĩ ekũngunyanĩra.”+
22 Arutwo makĩambĩrĩria kũrorana, marigĩtwo nĩ ũrĩkũ aaragia ũhoro wake.+
23 Mũrutwo ũmwe ũrĩa Jesu eendete,+ aaikarĩte thĩ hakuhĩ na* Jesu.
24 Nĩ ũndũ ũcio Simoni Petero akĩmũheneria akĩmwĩra: “Twĩre araria ũhoro wa ũ.”
25 Nĩ ũndũ ũcio mũrutwo ũcio agĩĩtiirania gĩthũri-inĩ kĩa Jesu akĩmũũria: “Mwathani, twĩre nũũ?”+
26 Jesu akĩmũcokeria: “Nĩ ũrĩa ngũhe kĩenyũ kĩa mũgate kĩrĩa ngũrikia mbakũri-inĩ.”+ Nĩ ũndũ ũcio rĩrĩa aarikirie mũgate mbakũri-inĩ, akĩwoya na akĩũnengera Judasi, mũrũ wa Simoni Mũisikariota.
27 Thutha wa Judasi kuoya kĩenyũ kĩu kĩa mũgate, Shaitani akĩingĩra thĩinĩ wake.+ Nĩ ũndũ ũcio Jesu akĩmwĩra: “Ũndũ ũrĩa ũreka, wĩke na ihenya makĩria.”
28 No rĩrĩ, gũtirĩ o na ũmwe wa arĩa maaikarĩte thĩ metha-inĩ wamenyire kĩrĩa gĩatũmire amwĩre ũguo.
29 Amwe o na meeciragia atĩ tondũ Judasi nĩwe warĩ na ithandũkũ rĩa mbeca-rĩ,+ Jesu aamwĩraga, “Gũra kĩrĩa tũrabatara nĩ ũndũ wa gĩathĩ,” kana atĩ eeragwo ahe athĩni kĩndũ.
30 Arĩkia kwamũkĩra kĩenyũ kĩu kĩa mũgate, akiuma hĩndĩ o ĩyo kũrĩ ũtukũ.+
31 Nĩ ũndũ ũcio, rĩrĩa aakorirũo oima, Jesu akiuga: “Rĩu Mũrũ wa mũndũ nĩ aragoocithio,+ na Ngai nĩ aragoocithio nĩ ũndũ wake.
32 Ngai we mwene nĩ ekũmũgoocithia,+ na ekũmũgoocithia o narua.
33 Twana tũtũ, ndĩ hamwe na inyuĩ ihinda inyinyi. Nĩ mũkaanjaria; na o ta ũrĩa nderire Ayahudi, o na inyuĩ ndĩramwĩra atĩrĩ, ‘Kũrĩa ndĩrathiĩ mũtingĩhota gũka.’+
34 Ndĩramũhe rĩathani rĩerũ, atĩ mwendanage; o ta ũrĩa ndĩmwendete inyuĩ,+ o na inyuĩ endanagai inyuĩ ene.+
35 Nĩ ũndũ ũcio andũ othe nĩ marĩmenyaga atĩ mũrĩ arutwo akwa—mwakorũo na wendo gatagatĩ-inĩ kanyu.”+
36 Simoni Petero akĩmũũria: “Mwathani kaĩ ũrathiĩ kũ?” Jesu akĩmũcokeria: “Kũrĩa ndĩrathiĩ, ndũngĩhota kũnũmĩrĩra rĩu, no nĩ ũkaanũmĩrĩra thutha-inĩ.”+
37 Petero akĩmwĩra: “Mwathani nĩ kĩĩ kĩngĩgiria ngũrũmĩrĩre rĩu? Nĩ ngũruta muoyo* wakwa nĩ ũndũ waku.”+
38 Jesu akĩmũũria: “Nĩ ũkũruta muoyo* waku nĩ ũndũ wakwa? Ngũkwĩra atĩrĩ o ma o ma, ngũkũ ndĩgũkũga ũtanganĩte maita matatũ.”+
Tũũhoro twa magũrũ-inĩ
^ Kana “akĩĩhotora.”
^ Kana “eehotorete.”
^ Kana “roho-inĩ.”
^ Ũkk., “gĩthũri-inĩ kĩa.”
^ Kĩngiriki, psy·kheʹ. Rora Ũthathaũri wa Ciugo.
^ Kĩngiriki, psy·kheʹ. Rora Ũthathaũri wa Ciugo.
