Ũhoro Mwega Ũrĩa Waandĩkirũo nĩ Johana 19:1-42
19 Hĩndĩ ĩyo Pilato akĩoya Jesu na akĩmũhũũrithia iboko.+
2 Nacio thigari igĩtuma thũmbĩ ya mĩigua ikĩmwĩkĩra mũtwe na ikĩmũhumba kanjũ ya rangi wa papũ,+
3 nacio ciokaga harĩ we ikoiga: “Geithĩka,* wee Mũthamaki wa Ayahudi!” Ningĩ nĩ ciamũhũũraga hĩ ũthiũ.+
4 Pilato akiuma nja o rĩngĩ akĩmeera: “Atĩrĩrĩ, ndĩramuumia nja kũrĩ inyuĩ nĩguo mũmenye atĩ gũtirĩ mahĩtia ndĩrona harĩ we.”+
5 Jesu agĩkiuma nja, ekĩrĩtwo thũmbĩ ya mĩigua na kanjũ ya rangi wa papũ. Pilato agĩcoka akiuga: “Mũndũ nĩwe ũyũ!”
6 Hĩndĩ ĩrĩa anene a athĩnjĩri-Ngai na thigari maamuonire, makĩanĩrĩra atĩrĩ: “Nĩ acuurio mũtĩ-inĩ! Nĩ acuurio mũtĩ-inĩ!”*+ Pilato akĩmeera: “Muoei arĩ inyuĩ mũkamũũrage,* nĩ gũkorũo niĩ gũtirĩ mahĩtia ndĩrona harĩ we.”+
7 Ayahudi makĩmũcokeria: “Nĩ tũkoragwo na watho, na kũringana na watho ũcio agĩrĩire kũũragwo,+ tondũ nĩ etuĩte mũrũ wa Ngai.”+
8 Rĩrĩa Pilato aaiguire ũrĩa mooigaga, agĩĩtigĩra o na makĩria,
9 agĩcoka akĩingĩra gĩikaro kĩa ngavana o rĩngĩ, akĩũria Jesu atĩrĩ: “Wee uumĩte kũ?” No Jesu ndaamũcokeirie ũndũ.+
10 Nĩ ũndũ ũcio Pilato akĩmũũria: “Nĩ kũrega ũrarega kũnjarĩria? Kaĩ ũtoĩ atĩ ndĩ na wathani wa gũkũrekereria na ndĩ na wathani wa gũkũũraga?”*
11 Jesu akĩmũcokeria: “Ndũngĩrĩ na wathani o na mũnini igũrũ rĩakwa tiga no harĩa ũheetwo kuuma igũrũ. Nĩkĩo mũndũ ũrĩa ũũneanire kũrĩ wee, arĩ na mehia manene makĩria.”
12 Nĩ ũndũ ũcio Pilato nĩ aacaragia mweke wa kũrekereria Jesu, no Ayahudi makĩanĩrĩra: “Warekereria mũndũ ũyũ, ndũrĩ mũrata wa Kaisari. Mũndũ o wothe wĩtuaga mũthamaki akoragwo akĩregana na* Kaisari.”+
13 Na rĩrĩa Pilato aaiguire ciugo icio, akĩruta Jesu nja, na agĩikarĩra gĩtĩ gĩa ciira handũ hetagwo Gacĩra ka Mahiga, no hetagwo Gabatha na Kĩhibirania.
14 Na rĩrĩ, ũcio warĩ mũthenya wa Kũhaarĩria+ Pasaka, na kwarĩ ta thaa thita cia mũthenya. Agĩcoka akĩra Ayahudi: “Onei mũthamaki wanyu!”
15 No makĩanĩrĩra makiuga: “Mweherie! Mweherie! Nĩ acuurio mũtĩ-inĩ!”* Pilato akĩmoria: “Mũrenda njũrage mũthamaki wanyu?” Anene a athĩnjĩri-Ngai magĩcokia: “Tũtirĩ mũthamaki ũngĩ tiga Kaisari.”
16 Agĩcoka akĩmũneana kũrĩ o akoragĩrũo mũtĩ-inĩ.+
Nĩ ũndũ ũcio makĩoya Jesu.
17 Nake agĩĩkuuĩra we mwene mũtĩ wa kũnyarirĩrũo,* agĩthiĩ nginya kũndũ gwĩtagwo Kũndũ kwa Ihĩndĩ rĩa Kĩongo,+ kũrĩa gwĩtagwo Gologotha na Kĩhibirania.+
18 Marĩ hau, makĩmũhũũrĩra mũtĩ-inĩ na mĩcumarĩ+ hamwe na andũ angĩ erĩ, ũmwe mwena ũmwe na ũrĩa ũngĩ mwena ũcio ũngĩ, Jesu arĩ gatagatĩ kao.+
19 Ningĩ Pilato akĩandĩka kĩmenyithia agĩkĩhũũrĩra igũrũ rĩa mũtĩ ũcio wa kũnyarirĩrũo.* Nakĩo kĩaandĩkĩtwo: “Jesu Mũnazarethi Mũthamaki wa Ayahudi.”+
20 Ayahudi aingĩ nĩ maathomire kĩmenyithia kĩu, nĩ gũkorũo harĩa Jesu aahũũrĩrĩirũo mũtĩ-inĩ na mĩcumarĩ haarĩ hakuhĩ na Jerusalemu, nakĩo kĩaandĩkĩtwo na Kĩhibirania, Kĩlatini, na Kĩngiriki.
21 O na kũrĩ ũguo anene a athĩnjĩri-Ngai a Ayahudi makĩra Pilato atĩrĩ: “Ndũkandĩke, ‘Mũthamaki wa Ayahudi,’ no andĩka aroigaga atĩ, ‘Niĩ ndĩ Mũthamaki wa Ayahudi.’”
22 Pilato agĩcokia: “Ũrĩa ndandĩka nĩ ndandĩka.”
23 Hĩndĩ ĩrĩa thigari ciamũhũũrĩrĩire mũtĩ-inĩ na mĩcumarĩ, ikĩoya nguo ciake cia igũrũ na igĩcigayania maita mana, o gĩcunjĩ harĩ mũthigari ũmwe, na ningĩ ikĩoya nguo yake ya thĩinĩ. No nguo ĩyo ya thĩinĩ ndĩarĩ na rũtumo, yarĩ gĩtambaya kĩmwe kuuma igũrũ nginya thĩ.
24 Kwoguo thigari ikĩĩrana atĩrĩ: “Tũtikamĩtinangie, no rekei tũmĩcukĩre mĩtĩ nĩguo tũmenye ĩgũtuĩka ya ũ.”+ Gwekĩkire ũguo nĩguo rĩandĩko rĩhinge atĩ: “Nĩ maagayanire nguo ciakwa, na magĩcukĩra nguo yakwa mĩtĩ.”+ Ũguo nĩguo thigari icio ciekire.
25 No rĩrĩ, hau hakuhĩ na mũtĩ wa Jesu wa kũnyarirĩrũo,* nĩho nyina,+ mwarĩ wa nyina na nyina, Mariamu ũrĩa mũtumia wa Kileopa na Mariamu Mũmagidali maarũgamĩte.+
26 Hĩndĩ ĩrĩa Jesu oonire nyina na mũrutwo ũrĩa we eendete+ marũgamĩte hau hakuhĩ, akĩra nyina: “Mũtumia ũyũ, ta rora mũrũguo!”
27 Agĩcoka akĩra mũrutwo ũcio: “Ta rora maitũguo!” Kuuma hĩndĩ ĩyo mũrutwo ũcio agĩthiĩ na Mariamu gwake mũciĩ.
28 Thutha ũcio, rĩrĩa Jesu aamenyire atĩ maũndũ mothe nĩ maarĩkĩtie kũhinga, akiuga ũũ nĩguo ahingie rĩandĩko: “Ndĩ mũnyotu.”+
29 Na hau haarĩ na ndigithũ yaiyũire ndibei ngagatu. Kwoguo magĩthecereria thibonji ĩiyũire ndibei ĩyo kamũtĩ-inĩ ka mũthobi* na magĩgatwara kanua-inĩ gake.+
30 Rĩrĩa Jesu aacamire ndibei ĩyo ngagatu, akiuga: “Maũndũ mothe nĩ mahinga!”+ na akĩinamia mũtwe, agĩtuĩkana.+
31 Tondũ kwarĩ mũthenya wa Kũhaarĩria,+ Ayahudi makĩhoya Pilato oige andũ acio moinangwo magũrũ na mĩĩrĩ yao yeherio nĩguo ndĩgatigwo mĩtĩ-inĩ ya kũnyarirĩrũo+ mũthenya wa Thabatũ (nĩ gũkorũo Thabatũ ĩyo yarĩ nene).+
32 Kwoguo thigari igĩthiĩ ikiunanga magũrũ ma mũndũ wa mbere na ma mũndũ ũcio ũngĩ wacuurĩtio mũtĩ-inĩ hamwe nake.
33 No rĩrĩa ciakinyire harĩ Jesu, ikĩona atĩ nĩ akuĩte, kwoguo itiamunire magũrũ.
34 No mũthigari ũmwe akĩmũtheca mbaru-inĩ na itimũ,+ na o rĩo thakame na maĩ ikiuma.
35 Nake ũrĩa wonete maũndũ macio nĩwe ũrutĩte ũira ũyũ, na ũira wake nĩ wa ma, na nĩ oĩ atĩ maũndũ marĩa oigĩte nĩ ma ma, nĩguo o na inyuĩ mwĩtĩkie.+
36 Maũndũ macio meekĩkire nĩguo rĩandĩko rĩhinge atĩ: “Gũtirĩ ihĩndĩ rĩake rĩkoinwo.”*+
37 Na ningĩ rĩandĩko rĩngĩ riugaga: “Nĩ makeerorera mũndũ ũrĩa maathecire.”+
38 Na rĩrĩ, thutha wa maũndũ macio, Jusufu wa Arimathea, ũrĩa warĩ mũrutwo wa Jesu na hitho nĩ ũndũ wa gwĩtigĩra Ayahudi,+ akĩhoya Pilato amwĩtĩkĩrie eherie mwĩrĩ wa Jesu, nake Pilato akĩmũhe rũtha. Nĩ ũndũ ũcio agĩthiĩ akĩeheria mwĩrĩ ũcio.+
39 Na Nikodemo,+ ũrĩa mbere ĩyo wathiĩte kũrĩ we ũtukũ, o nake agĩũka, akĩrehe mũtukanio wa* manemane na thubiri ratiri* ta igana rĩmwe.+
40 Nao makĩoya mwĩrĩ ũcio wa Jesu makĩũthaya na itambaya cia gatani irĩ na mahuti marĩa manungaga wega+ kũringana na ũndũire wa Ayahudi wa gũthikana.
41 Na atĩrĩ, harĩa ooragĩirũo* haarĩ na mũgũnda, na mũgũnda-inĩ ũcio nĩ kwarĩ na mbĩrĩra*+ njerũ ĩrĩa ĩtaakometio mũndũ o na ũmwe mbere ĩyo.
42 Tondũ kwarĩ mũthenya wa Ayahudi wa Kũhaarĩria+ na mbĩrĩra ĩyo yarĩ hakuhĩ, magĩkomia Jesu ho.
Tũũhoro twa magũrũ-inĩ
^ Kana “Ũrogoocwo.”
^ Kana “Mũũragĩre mũtĩ-inĩ! Mũũragĩre mũtĩ-inĩ!”
^ Kana “Mũmũũragĩre mũtĩ-inĩ.”
^ Kana “gũkũũragĩra mũtĩ-inĩ?”
^ Kana “agĩkararia.”
^ Kana “Mũũragĩre mũtĩ-inĩ!”
^ Rora Ũthathaũri wa Ciugo.
^ Rora Ũthathaũri wa Ciugo.
^ Rora Ũthathaũri wa Ciugo.
^ Rora Ũthathaũri wa Ciugo.
^ Kana “rĩkaahehenjwo.”
^ Kana hihi, “kĩohe kĩa.”
^ Ratiri cia Roma. Rora Ũhoro Muongerere B14.
^ Kana “ooragĩirũo mũtĩ-inĩ.”
^ Kana “mbĩrĩra ya kĩririkano.”
