Ũhoro Mwega Ũrĩa Waandĩkirũo nĩ Johana 2:1-25
2 Na mũthenya wa gatatũ gũgĩkorũo na iruga rĩa ũhiki Kana ya Galili, na nyina wa Jesu aarĩ kuo.
2 O nake Jesu na arutwo ake nĩ meetĩtwo iruga-inĩ rĩu rĩa ũhiki.
3 Rĩrĩa ndibei yanyihire, nyina wa Jesu akĩmwĩra: “Matirĩ na ndibei.”
4 No Jesu akĩmwĩra atĩrĩ: “Mũtumia ũyũ, ũndũ ũcio ũtwĩgiĩ atĩa niĩ nawe?* Kahinda gakwa ti gakinyu.”
5 Nyina akĩra arĩa maatungataga ũũ: “Ĩkai ũrĩa wothe ekũmwĩra.”
6 Na rĩrĩ, nĩ haarĩ na ndigithũ ithathatũ cia maĩ ciathondeketwo na mahiga o ta ũrĩa mawatho ma Ayahudi ma gwĩtheria maathanĩte,+ na o ĩmwe yacio nĩ ĩngĩahotire gũkuua ithimi* igĩrĩ kana ithatũ cia maĩ.
7 Nake Jesu akĩmeera: “Ihũriai ndigithũ icio maĩ.” Magĩciihũria nginya mũromo-inĩ.
8 Agĩcoka akĩmeera atĩrĩ: “Rĩu tahiai mũtwarĩre mũrũgamĩrĩri wa iruga.” Nao makĩmũtwarĩra.
9 Rĩrĩa mũrũgamĩrĩri wa iruga rĩu aacamire maĩ macio maagarũrĩtwo magatuĩka ndibei, atekũmenya kũrĩa yoimĩte (o na gũtuĩka ndungata iria ciatahĩte maĩ macio nĩ ciamenyaga), agĩta mũhikania
10 akĩmwĩra: “Andũ arĩa angĩ othe mambaga kũheana ndibei ĩrĩa njega, na rĩrĩa andũ marĩĩo makaheana ĩrĩa ĩtarĩ njega tayo. No wee ũkũigĩte ĩrĩa njega nginya rĩu.”
11 Jesu eekire ũguo thĩinĩ wa Kana ya Galili kĩrĩ kĩambĩrĩria gĩa ciama ciake, agĩtũma riri wake ũmenyeke,+ nao arutwo ake makĩmwĩtĩkia.
12 Thutha ũcio, we na nyina na ariũ a nyina,+ o hamwe na arutwo ake magĩikũrũka magĩthiĩ Kaperinaumu,+ no matiaikarire kuo matukũ maingĩ.
13 Na rĩrĩ, Pasaka+ ya Ayahudi nĩ yakuhĩrĩirie, nake Jesu akĩambata agĩthiĩ Jerusalemu.
14 Na thĩinĩ wa hekarũ agĩkora arĩa meendagia ng’ombe na ng’ondu na ndutura,+ na arĩa maakũũranagia mbeca maikarĩire itĩ ciao.
15 Nĩ ũndũ ũcio agĩthondeka mũcarica wa mĩkanda, akĩrutũrũra arĩa othe maarĩ na ng’ondu na ng’ombe akĩmoimia nja ya hekarũ, na akĩhurunja thendi cia arĩa maakũũranagia mbeca na akĩng’aũrania metha ciao.+
16 Agĩcoka akĩra arĩa meendagia ndutura atĩrĩ: “Eheriai indo ici gũkũ! Tigai gũtua nyũmba ya Awa nyũmba ya biacara!”*+
17 Arutwo ake makĩririkana atĩ nĩ kwandĩke ũũ: “Kĩyo kĩa nyũmba yaku nĩ gĩkaandĩa.”+
18 Nĩ ũndũ ũcio Ayahudi makĩmũũria atĩrĩ: “Nĩ kĩmenyithia kĩrĩkũ ũngĩtuonia,+ kuona atĩ nĩ ũreka maũndũ maya?”
19 Jesu akĩmacokeria ũũ: “Thariai hekarũ ĩno, na nĩ ngũmĩaka rĩngĩ na thikũ ithatũ.”+
20 Hĩndĩ ĩyo Ayahudi makĩũria: “Hekarũ ĩno yaakirũo na mĩaka 46, nawe ũroiga ũkũmĩaka na thikũ ithatũ?”
21 No we aaragia ũhoro wa hekarũ ya mwĩrĩ wake.+
22 No rĩrĩa aariũkirio kuuma kũrĩ arĩa akuũ, arutwo ake makĩririkana atĩ nĩ ooigaga ũguo kaingĩ,+ na magĩtĩkia rĩandĩko na ciugo iria Jesu aarĩtie.
23 O na kũrĩ ũguo, rĩrĩa aarĩ Jerusalemu hĩndĩ ya gĩathĩ gĩa Pasaka, andũ aingĩ nĩ maagĩire na wĩtĩkio harĩ rĩĩtwa rĩake mona ciama iria aaringaga.
24 No Jesu ndaamehokaga tondũ nĩ aamoĩ wega othe
25 na tondũ ndaabataraga ũira wa mũndũ ũkoniĩ ũrĩa mũndũ atariĩ, nĩ gũkorũo nĩ aamenyaga wega kĩrĩa kĩrĩ thĩinĩ wa mũndũ.+
Tũũhoro twa magũrũ-inĩ
^ Ũkk., “Nĩ ũhoro ũrĩkũ ũrĩ naguo na niĩ, mũtumia ũyũ?” Icio nĩ ciugo cia kuonania kũrega ũndũ. Kiugo “mũtumia” gĩtihũthĩrĩtwo na njĩra ya kuonania kwaga gĩtĩo.
^ No kũhoteke gĩthimi kĩu kĩarĩ mbathi ĩmwe ĩrĩa yaiganaine na lita 22. Rora Ũhoro Muongerere B14.
^ Kana “thoko.”
