Ũhoro Mwega Ũrĩa Waandĩkirũo nĩ Johana 3:1-36
3 Nĩ kwarĩ mũndũ warĩ Mũfarisai wetagwo Nikodemo,+ na aarĩ mũtongoria wa Ayahudi.
2 Mũndũ ũcio agĩthiĩ kũrĩ Jesu ũtukũ+ akĩmwĩra atĩrĩ: “Rabii,+ nĩ tũĩ atĩ wee ũrĩ mũrutani uumĩte kũrĩ Ngai, nĩ gũkorũo gũtirĩ mũndũ ũngĩringa ciama+ iria ũringaga Ngai atarĩ hamwe nake.”+
3 Nake Jesu akĩmũcokeria akĩmwĩra: “Ngũkwĩra atĩrĩ o ma o ma, mũndũ angĩaga gũciarũo rĩngĩ,*+ ndangĩona Ũthamaki wa Ngai.”+
4 Nikodemo akĩmũũria: “Mũndũ angĩciarũo atĩa arĩ mũkũrũ? No ahote kũingĩra nda ya nyina riita rĩa kerĩ nĩguo aciarũo rĩngĩ?”
5 Jesu akĩmũcokeria: “Ngũkwĩra atĩrĩ o ma o ma, mũndũ angĩaga gũciarũo na maĩ+ na roho,+ ndangĩingĩra Ũthamaki-inĩ wa Ngai.
6 Kĩrĩa gĩciarĩtwo kuumana na mwĩrĩ nĩ mwĩrĩ, na kĩrĩa gĩciarĩtwo kuumana na roho nĩ roho.
7 Ndũkagege tondũ nĩ ndakwĩra atĩrĩ: No mũhaka mũciarũo rĩngĩ.
8 Rũhuho rũhurutanaga na kũrĩa rũkwenda, na ũkaigua mũgambo waruo, no ndũmenyaga kũrĩa rũroima na kũrĩa rũrathiĩ. Ũguo no taguo gũtariĩ ũhoro-inĩ wa mũndũ wothe ũrĩa ũciarĩtwo kuumana na roho.”+
9 Nake Nikodemo akĩmũũria atĩrĩ: “Maũndũ macio mangĩhoteka atĩa?”
10 Jesu akĩmũũria: “Wee ũrĩ mũrutani wa Isiraeli na ndũĩ maũndũ macio?
11 Ngũkwĩra atĩrĩ o ma o ma, maũndũ marĩa tũĩ nĩmo twaragia, na marĩa tuonete tũkamarutĩra ũira, no inyuĩ mũtiamũkagĩra ũira ũrĩa tũrutaga.
12 Angĩkorũo ndamwĩra maũndũ ma gũkũ thĩ na mũtiretĩkia-rĩ, mũngĩgĩtĩkia atĩa ingĩmwĩra maũndũ ma igũrũ?
13 Makĩria ma ũguo-rĩ, gũtirĩ mũndũ ũrĩ wambata igũrũ+ o tiga ũrĩa waikũrũkire kuuma igũrũ,+ na nĩwe Mũrũ wa mũndũ.
14 Na o ta ũrĩa Musa aacuuririe nyoka werũ-inĩ,+ noguo Mũrũ wa mũndũ agaacuurio,+
15 nĩguo mũndũ ũrĩa wothe ũmwĩtĩkagia agĩe na muoyo wa tene na tene.+
16 “Nĩ gũkorũo Ngai nĩ eendire kĩrĩndĩ gĩa gũkũ thĩ mũno, nginya akĩruta Mũrũ wake wa mũmwe,+ nĩguo mũndũ o wothe ũrĩonanagia wĩtĩkio harĩ we ndakananiinwo no akaagĩa na muoyo wa tene na tene.+
17 Tondũ Ngai ndaatũmire Mũrũ wake thĩinĩ wa thĩ nĩguo amĩtuĩre, no aamũtũmire nĩguo thĩ ĩhonokio kũgerera harĩ we.+
18 Mũndũ o wothe wonanagia wĩtĩkio harĩ we ti wa gũtuĩrũo.+ Mũndũ o wothe ũtonanagia wĩtĩkio nĩ arĩkĩtie gũtuĩrũo, nĩ gũkorũo ndonanagia wĩtĩkio thĩinĩ wa rĩĩtwa rĩa Mũrũ wa mũmwe wa Ngai.+
19 Ũyũ nĩguo mũthingi wa ituĩro: ũtheri nĩ ũũkĩte thĩinĩ wa thĩ,+ no andũ nĩ mendete nduma handũ ha ũtheri, nĩ gũkorũo ciĩko ciao ciarĩ njũru.
20 Tondũ mũndũ o wothe ũmenyerete gwĩkaga maũndũ moru nĩ athũire ũtheri na ndokaga ũtheri-inĩ, nĩguo ciĩko ciake itikaguũrio.
21 No mũndũ o wothe wĩkaga maũndũ marĩa magĩrĩire nĩ okaga ũtheri-inĩ,+ nĩguo ciĩko ciake imenyeke atĩ ciĩkĩtwo kũringana na wendi wa Ngai.”
22 Thutha ũcio, Jesu na arutwo ake magĩthiĩ Judea mĩgũnda-inĩ, na agĩikara nao kũu kwa ihinda, na nĩ aabatithanagia.+
23 No Johana o nake nĩ aabatithanagia thĩinĩ wa Ainoni hakuhĩ na Salimu, tondũ kũu nĩ kwarĩ na maĩ maingĩ,+ na andũ maaikaraga o magĩũkaga na makabatithio;+
24 nĩ gũkorũo hĩndĩ ĩyo Johana ndaaikĩtio njera.+
25 Na rĩrĩ, arutwo a Johana makĩgĩa ngarari na Mũyahudi ũmwe igũrũ rĩgiĩ gwĩtheria.
26 Thutha ũcio magĩthiĩ kũrĩ Johana makĩmwĩra: “Rabii, mũndũ ũrĩa mwarĩ nake mũrĩmo wa Jorodani, ũrĩa wee warutire ũira igũrũ rĩake,+ nĩ arabatithania, na andũ othe marathiĩ kũrĩ we.”
27 Nake Johana akĩmacokeria akĩmeera: “Mũndũ ndangĩgĩa na kĩndũ o na kĩmwe tiga aheirũo kuuma igũrũ.
28 Inyuĩ ene mũrĩ aira a ũrĩa ndoigire atĩ, ‘Niĩ ti niĩ Kristo,+ ĩndĩ nĩ gũtũmwo ndũmĩtwo njũke mbere yake.’+
29 Mũndũ o wothe ũrĩ na mũhiki nĩwe mũhikania.+ No rĩrĩa mũrata wa mũhikania arũgama hakuhĩ nake na aigua akĩaria, nĩ akenaga mũno nĩ kũigua mũgambo wa mũhikania. Nĩ ũndũ ũcio, gĩkeno gĩakwa nĩ gĩkinyanĩru.
30 Ũcio no mũhaka athiĩ na mbere kuongerereka, ĩndĩ niĩ no mũhaka thiĩ na mbere kũnyiha.”
31 Ũrĩa uumĩte matu-inĩ+ akoragwo arĩ igũrũ rĩa arĩa angĩ othe. Ũrĩa uumĩte thĩ oimĩte thĩinĩ wa thĩ na aragia maũndũ ma thĩ. Ũrĩa uumĩte igũrũ akoragwo arĩ igũrũ rĩa arĩa angĩ othe.+
32 Arutaga ũira igũrũ rĩa maũndũ marĩa onete na akaigua,+ no gũtirĩ mũndũ wĩtĩkagĩra ũira wake.+
33 Mũndũ o wothe wĩtĩkĩrĩte ũira wake nĩ ahũũrĩte mũhũũri* atĩ Ngai nĩ wa ma.+
34 Nĩ gũkorũo ũrĩa ũtũmĩtwo nĩ Ngai aragia ciugo cia Ngai,+ tondũ We aheanaga roho ategũthima.
35 Ithe nĩ endete Mũriũ+ na nĩ aheanĩte indo ciothe guoko-inĩ gwake.+
36 Ũrĩa wonanagia wĩtĩkio harĩ Mũriũ arĩ na muoyo wa tene na tene;+ ũrĩa ũtaathĩkagĩra Mũriũ ndakona muoyo,+ ĩndĩ marakara ma Ngai megũtũũra igũrũ rĩake.+
