Ũhoro Mwega Ũrĩa Waandĩkirũo nĩ Johana 9:1-41
9 Na rĩrĩa Jesu aahĩtũkaga, akĩona mũndũ waciarĩtwo arĩ mũtumumu.
2 Arutwo ake makĩmũũria: “Rabii,+ mũndũ ũyũ aaciarirũo arĩ mũtumumu nĩ ũndũ wa mehia make-ĩ kana ma aciari ake?”
3 Nake Jesu agĩcokia: “Ti mũndũ ũyũ o na kana aciari ake meehirie, no gwathiire ũguo nĩguo ciĩko cia Ngai cionekane ũndũ-inĩ ũyũ.+
4 No mũhaka tũrute mawĩra ma Ũrĩa wandũmire kũrĩ o mũthenya;+ ũtukũ nĩ ũroka rĩrĩa gũtarĩ mũndũ ũngĩruta wĩra.
5 Hĩndĩ ĩrĩa yothe ndĩ gũkũ thĩ, nĩ niĩ ũtheri wa thĩ.”+
6 Thutha wa kuuga maũndũ macio, agĩtua mata thĩ na akĩringia ndoro namo, agĩcoka akĩmĩhaka mũndũ ũcio maitho+
7 na akĩmwĩra: “Thiĩ ũgethambe karia-inĩ ga Siloamu” (rĩĩtwa rĩrĩa rĩtaũragwo “Gũtũmwo”). Agĩgĩthiĩ na agĩĩthamba, agĩcoka akĩonaga.+
8 Andũ a itũũra rĩao o hamwe na arĩa maamuonaga akĩhoyahoya makĩambĩrĩria kũũrania atĩrĩ: “Na githĩ ũyũ ti mũndũ ũrĩa ũraikaraga thĩ akĩhoyahoyaga?”
9 Amwe mooigaga: “Nĩwe ũyũ.” Angĩ makoiga: “Aca tiwe, no ahaana take.” Nake mũndũ ũcio akameera ũũ: “Nĩ niĩ.”
10 Nĩ ũndũ ũcio makĩmũũria atĩrĩ: “Gũkĩrĩ ũguo-rĩ, maitho maku mahingũkire atĩa?”
11 Akĩmacokeria ũũ: “Mũndũ ũrĩa wĩtagwo Jesu aringirie ndoro ahaka maitho acoka anjĩra atĩrĩ, ‘Thiĩ Siloamu wĩthambe.’+ Ndagĩthiĩ na ndethamba ndambĩrĩria kuona.”
12 Maigua ũguo makĩmũũria: “Mũndũ ũcio arĩ kũ?” Akĩmeera: “Niĩ ndiũĩ.”
13 Nao magĩtwara mũndũ ũcio watũũrĩte arĩ mũtumumu kũrĩ Afarisai.
14 Na atĩrĩ, mũthenya ũrĩa Jesu aaringirie ndoro na akĩmũhingũra maitho+ warĩ wa Thabatũ.+
15 Kwoguo Afarisai o nao makĩambĩrĩria kũũria mũndũ ũcio ũrĩa arahotire kuona. Akĩmeera: “Arahakire maitho makwa ndoro, ndĩrethamba, na ndĩrambĩrĩria kuona.”
16 Afarisai amwe makĩambĩrĩria kuuga: “Mũndũ ũcio ndoimĩte kwĩ Ngai, tondũ ndarũmagĩrĩra Thabatũ.”+ Angĩ nao makiuga: “Mũndũ mwĩhia angĩhota atĩa kũringa ciama cia mũthemba ũcio?”+ Nĩ ũndũ ũcio gũkĩgĩa ngayũkano gatagatĩ-inĩ kao.+
17 Ningĩ makĩũria mũndũ ũcio warĩ mũtumumu ũũ: “Wee ũkuuga atĩa igũrũ rĩake tondũ nĩwe arahingũrire maitho?” Mũndũ ũcio agĩcokia: “Nĩ mũnabii.”
18 O na kũrĩ ũguo, Ayahudi matiigana gwĩtĩkia atĩ mũndũ ũcio aatũũrĩte arĩ mũtumumu, o nginya rĩrĩa meetire aciari ake.
19 Makĩmoria atĩrĩ: “Ũyũ nĩwe mũrũ wanyu ũrĩa muugaga aaciarĩtwo arĩ mũtumumu? Gũthiĩte atĩa rĩu akambĩrĩria kuona?”
20 Aciari ake magĩcokia: “Nĩ tũĩ atĩ ũyũ nĩwe mũrũ witũ na atĩ aaciarirũo arĩ mũtumumu.
21 No rĩrĩ, ũrĩa gũthiĩte akambĩrĩria kuona, ithuĩ tũtiũĩ; kana nũũ ũmũhingũrĩte maitho, ithuĩ tũtiũĩ. Mũũriei nĩ mũndũ mũgima. Nĩ eyarie.”
22 Aciari ake mooigire ũguo tondũ nĩ meetigagĩra Ayahudi,+ nĩ gũkorũo Ayahudi nĩ maarĩkĩtie gwĩtĩkanĩria atĩ mũndũ o wothe ũngĩoimbũrire atĩ Jesu nĩwe Kristo, no kũingatwo angĩaingatirũo thunagogi-inĩ.+
23 Nĩkĩo aciari ake mooigire: “Nĩ mũndũ mũgima. Mũũriei.”
24 Kwoguo riita rĩa kerĩ magĩta mũndũ ũcio warĩ mũtumumu makĩmwĩra atĩrĩ: “Goocithia Ngai; nĩ tũĩ atĩ mũndũ ũcio nĩ mwĩhia.”
25 Nake agĩcokia: “Angĩkorũo akoragwo arĩ mwĩhia, niĩ ndiũĩ. Ũrĩa njũĩ nĩ atĩ, ndĩrarĩ mũtumumu, no rĩu nĩ ndĩrona.”
26 Nao makĩmũũria: “Aragwĩkire atĩa? Arakũhingũrire maitho atĩa?”
27 Akĩmacokeria ũũ: “Na githĩ ndiamwĩra, na mũtinathikĩrĩria. Mũrenda kũigua rĩngĩ nĩkĩ? Kaĩ o na inyuĩ mũrenda gũtuĩka arutwo ake?”
28 Maigua ũguo makĩmwĩra ũũ na kĩnyũrũri: “Wee ũrĩ mũrutwo wa mũndũ ũcio, ĩndĩ ithuĩ tũrĩ arutwo a Musa.
29 Nĩ tũĩ atĩ Ngai nĩ arĩtie na Musa, no ũhoro wĩgiĩ mũndũ ũyũ-rĩ, tũtiũĩ kũrĩa oimĩte.”
30 Mũndũ ũcio akĩmacokeria: “Ũkĩrĩ ũndũ wa magegania atĩ mũtiũĩ kũrĩa oimĩte, na nĩ aratũmire hote kuona.
31 Nĩ tũĩ Ngai ndathikagĩrĩria ehia,+ no mũndũ o wothe angĩkorũo nĩ etigĩrĩte Ngai na nĩ ekaga wendi wake, nĩ amũthikagĩrĩria.+
32 Kuuma tene gũtirĩ kwaiguĩka mũndũ ũhingũrĩte maitho ma mũndũ waciarirũo arĩ mũtumumu.
33 Korũo mũndũ ũyũ ndoimĩte kũrĩ Ngai-rĩ, gũtirĩ ũndũ o na ũmwe angĩrahotire gwĩka.”+
34 Nao makĩmũcokeria: “Wee waciarirũo na mehia, na rĩu nĩ gũtũruta ũratũruta?” Magĩcoka makĩmũingata!+
35 Jesu akĩigua atĩ nĩ maamũingatĩte, na rĩrĩa oonire mũndũ ũcio, akĩmũũria: “Hihi ũrĩ na wĩtĩkio harĩ Mũrũ wa mũndũ?”
36 Mũndũ ũcio akĩmũũria: “Mũthuri ũyũ, ũcio nũũ hihi, nĩguo ngĩe na wĩtĩkio harĩ we?”
37 Jesu akĩmwĩra: “Nĩ ũmuonete, na rĩrĩ, nĩwe ũyũ ũraria nake.”
38 Nake akiuga: “Nĩ ndamwĩtĩkia, Mwathani.” Agĩcoka akĩmũinamĩrĩra.
39 Ningĩ Jesu akiuga: “Niĩ ndokire gũkũ thĩ nĩ ũndũ wa ituĩro rĩrĩ, atĩ arĩa matonaga mone+ nao arĩa monaga matuĩke itumumu.”+
40 Rĩrĩa Afarisai arĩa maarĩ hamwe nake maaiguire maũndũ macio, makĩmũũria: “Kaĩ o na ithuĩ tũrĩ atumumu?”
41 Jesu akĩmeera: “Korũo mũrĩ atumumu-rĩ, mũtingĩrĩ na mehia. No rĩu tondũ mũroiga, ‘Nĩ tuonaga,’ mũrĩ o na mehia.”+
