Joshua 11:1-23
11 Na rĩrĩa Jabini mũthamaki wa Hazoru aaiguire ũhoro ũcio, agĩtũma ndũmĩrĩri kũrĩ Jobabu mũthamaki wa Madoni,+ na kũrĩ mũthamaki wa Shimuroni, mũthamaki wa Akishafu,+
2 athamaki arĩa maarĩ gĩcigo-inĩ kĩrĩa kĩrĩ irĩma kĩa mwena wa rũgongo, arĩa maarĩ kũndũ kwaraganu mwena wa mũhuro wa Kinerethu, arĩa maarĩ Shefela na iharũrũka-inĩ cia Doru+ mwena wa ithũĩro,
3 Akanaani+ arĩa maarĩ mwena wa irathĩro na mwena wa ithũĩro, Aamori,+ Ahiti, Aperizi, Ajebusi arĩa maarĩ gĩcigo-inĩ kĩrĩa kĩrĩ irĩma, na Ahivi+ arĩa maaikaraga magũrũ-inĩ ma kĩrĩma kĩa Herimoni+ thĩinĩ wa bũrũri wa Mizipa.
4 Magĩgĩũka na mbũtũ ciao ciothe, kĩrĩndĩ kĩnene kĩa andũ aingĩ mũno o ta mũthanga ũrĩa ũkoragwo hũgũrũrũ-inĩ cia iria, marĩ na mbarathi nyingĩ biũ na ngaari cia mbaara.
5 Athamaki acio othe magĩtĩkanĩria gũcemania, na magĩthiĩ makĩamba hema ciao hakuhĩ na maĩ ma Meromu nĩguo marũe na Isiraeli.
6 Nĩ ũndũ ũcio Jehova akĩra Joshua ũũ: “Ndũgetigĩre nĩ ũndũ wao,+ nĩ gũkorũo rũciũ ihinda ta rĩrĩ nĩ ngaamaneana othe moragwo nĩ Isiraeli. Na no mũhaka ũgaatema mbarathi ciao mĩkiha ya magũrũ,+ na ũcine ngaari ciao na mwaki.”
7 Nake Joshua hamwe na arũme othe a mbaara makĩmatharĩkĩra materĩgĩrĩire hakuhĩ na maĩ ma Meromu.
8 Jehova agĩkĩmaneana guoko-inĩ kwa Isiraeli,+ makĩmatooria na makĩmateng’eria o nginya Sidoni Ĩrĩa Nene+ na Misirefothu-maimu+ na Mũkuru-inĩ wa Mizipe mwena wa irathĩro, makĩmoraga o nginya gũgĩkorũo gũtarĩ o na ũmwe watigarire.+
9 Nake Joshua akĩmeeka o ta ũrĩa Jehova aamwĩrĩte; agĩtema mbarathi ciao mĩkiha ya magũrũ na agĩcina ngaari ciao na mwaki.+
10 Joshua agĩcoka akĩhũndũka na agĩtunyana itũũra rĩa Hazoru na akĩũraga mũthamaki wakuo na rũhiũ rwa njora,+ tondũ itũũra rĩu rĩa Hazoru nĩrĩo rĩakoragwo rĩrĩ inene harĩ mothamaki macio mothe.
11 Makĩũraga andũ arĩa othe maarĩ kuo na rũhiũ rwa njora makĩmaniina.+ Gũtirĩ kĩndũ o na kĩmwe kĩrĩa kĩhuhagia gĩatigarire.+ Agĩcoka agĩcina Hazoru na mwaki.
12 Joshua agĩgĩtunyana matũũra mothe ma athamaki acio na agĩtooria athamaki a kuo othe na rũhiũ rwa njora.+ Akĩmaniina+ o ta ũrĩa Musa ndungata ya Jehova aathanĩte.
13 O na kũrĩ ũguo, andũ a Isiraeli matiacinire itũũra o na rĩmwe harĩ marĩa meehandĩte tũrĩma-inĩ twamo o tiga Hazoru; rĩu norĩo tu Joshua aacinire.
14 Nacio indo ciothe cia matũũra macio cia gũtahwo o hamwe na mahiũ, Aisiraeli makĩĩyoera igĩtuĩka ciao.+ No makĩniina andũ othe na rũhiũ rwa njora o nginya magĩthira othe.+ Matiarekire mũndũ o na ũmwe ũrahuhia atigare.+
15 O ta ũrĩa Jehova aathĩte Musa ndungata yake, noguo Musa aathire Joshua,+ na noguo Joshua eekire. Gũtirĩ ũndũ o na ũmwe ateekire harĩ maũndũ marĩa mothe Jehova aathĩte Musa.+
16 Joshua agĩgĩtunyana bũrũri ũcio wothe, gĩcigo kĩrĩa kĩrĩ irĩma, Negebu guothe,+ gĩcigo gĩothe kĩa Gosheni, Shefela,+ Araba,+ gĩcigo kĩrĩa kĩrĩ irĩma kĩa Isiraeli na Shefela yakĩo,*
17 kuuma Kĩrĩma-inĩ kĩa Halaki, kĩrĩa kĩambatĩte o nginya Seiru, gũthiĩ nginya Baali-gadi+ Mũkuru-inĩ wa Lebanoni magũrũ-inĩ ma Kĩrĩma kĩa Herimoni,+ na agĩtharĩkĩra athamaki a kuo othe na akĩmatooria, akĩmoraga.
18 Joshua aarũire na athamaki acio othe ihinda iraya.
19 Gũtirĩ itũũra o na rĩmwe rĩathondekire thayũ na Aisiraeli o tiga Ahivi arĩa maaikaraga itũũra rĩa Gibeoni.+ Matũũra macio mangĩ mothe maatunyanirũo kũgerera mbaara.+
20 Jehova nĩwe wetĩkĩririe andũ acio momie ngoro ciao+ nĩgetha marũe na Isiraeli, nĩguo amaniine atekũmaiguĩra tha.+ Maagĩrĩire kũniinwo o ta ũrĩa Jehova aathĩte Musa.+
21 Ihinda-inĩ rĩu Joshua akĩniina Aanaki+ kuuma gĩcigo kĩrĩa kĩrĩ irĩma, kuuma Hebironi, Debiri, Anabu, na gĩcigo kĩrĩa kĩrĩ irĩma kĩa Juda kĩrĩ gĩothe na gĩcigo kĩrĩa kĩrĩ irĩma kĩa Isiraeli kĩrĩ gĩothe. Joshua akĩmaniina o hamwe na matũũra mao.+
22 Gũtirĩ Aanaki maatigarire bũrũri-inĩ wa Aisiraeli; maatigarire+ tu o thĩinĩ wa Gaza,+ thĩinĩ wa Gathu,+ na thĩinĩ wa Ashidodi.+
23 Nĩ ũndũ ũcio Joshua agĩtunyana bũrũri ũcio wothe, o ta ũrĩa Jehova eerĩire Musa,+ thutha ũcio Joshua akĩũheana kũrĩ Isiraeli ũtuĩke igai rĩao nĩguo ũgayanwo gatagatĩ-inĩ ka mĩhĩrĩga yao.+ Na bũrũri ũcio ũgĩkĩhurũka mbaara.+
Tũũhoro twa magũrũ-inĩ
^ Kana “tũrĩma twakĩo tũrĩa tũrĩ magũrũ-inĩ.”