Ũhoro Mwega Ũrĩa Waandĩkirũo nĩ Luka 15:1-32
15 Na rĩrĩ, etia a mbeca cia igooti othe na ehia makĩmũthiũrũrũkĩria nĩguo mamũthikĩrĩrie.+
2 Nao Afarisai na andĩki-watho maang’ung’uaga makerana atĩrĩ: “Mũndũ ũyũ amũkagĩra ehia na akarĩanĩra nao.”
3 Nake akĩmahe ngerekano ĩno, akiuga:
4 “Nĩ mũndũ ũrĩkũ gatagatĩ-inĩ kanyu arĩ na ng’ondu 100, ĩmwe ĩngĩũra, ũtangĩtiga icio 99 werũ-inĩ agacarie ĩyo ĩmwe yũrĩte nginya arĩmĩona?+
5 Na rĩrĩa amĩona, amĩigagĩrĩra ciande-inĩ ciake na agakena mũno.
6 Na akinya mũciĩ, etaga arata na andũ a itũũra rĩake, akameera atĩrĩ, ‘Kenai hamwe na niĩ, tondũ nĩ ndona ng’ondu yakwa ĩrĩa ĩrorĩte.’+
7 Ngũmwĩra atĩrĩ, rĩrĩa mwĩhia ũmwe erira,+ ũguo noguo gũkoragwo na gĩkeno kĩnene igũrũ nĩ ũndũ wake, gũkĩra nĩ ũndũ wa andũ athingu 99 matarabatara kwĩrira.
8 “Kana nĩ mũtumia ũrĩkũ ũrĩ na thendi ikũmi cia drakma,* ĩmwe ya drakma* icio ĩngĩũra, ũtakagia tawa na akahaata nyũmba yake akamĩcaria na kĩyo nginya rĩrĩa arĩmĩona?
9 Na rĩrĩa amĩona, etaga arata* na andũ a itũũra rĩake, akameera atĩrĩ, ‘Kenai hamwe na niĩ, tondũ nĩ ndona thendi ya drakma* ĩrĩa ĩrorĩte.’
10 Ngũmwĩra atĩrĩ, ũguo noguo araika a Ngai magĩaga na gĩkeno rĩrĩa mwĩhia ũmwe erira.”+
11 Agĩcoka akiuga atĩrĩ: “Mũthuri ũmwe aarĩ na ariũ erĩ.
12 Ũrĩa warĩ mũnyinyi akĩra ithe atĩrĩ, ‘Baba, he igai rĩa indo iria ciagĩrĩire gũtuĩka ciakwa.’ Nĩ ũndũ ũcio akĩmagayania indo ciake.
13 Matukũ manini thutha ũcio, mũriũ ũcio mũnyinyi agĩcokanĩrĩria indo ciake ciothe agĩthiĩ bũrũri wa kũraya na arĩ kũu akĩananga indo icio ciake na mũtũũrĩre wa waganu.*
14 Rĩrĩa aacihũthĩrire ciothe, gũkĩgĩa ng’aragu nene bũrũri-inĩ ũcio wothe, nake agĩtuĩka mũgiĩki.
15 Agĩthiĩ akĩĩgwatania na mũikari ũmwe wa bũrũri ũcio, ũrĩa wamwĩrire athiĩ mĩgũnda-inĩ yake akarĩithagie ngũrũe.+
16 Na eeriragĩria kũrĩa maciaro ma mũtĩ wa mũkarabi marĩa ngũrũe ciarĩaga, no gũtirĩ mũndũ wamũheaga kĩndũ.
17 “Hĩndĩ ĩrĩa aacokereirũo nĩ meciria, akiuga atĩrĩ, ‘Nĩ andũ aigana mandĩkĩtwo wĩra nĩ baba monaga mũgate wa kũmaigana, na niĩ gũkũ nĩ gũkua ndĩrakua nĩ ng’aragu!
18 Ngũũkĩra thiĩ kũrĩ baba ndĩmwĩre: “Baba, nĩ njĩhĩirie igũrũ na ngakwĩhĩria.
19 Ndiagĩrĩirũo gwĩtwo mũrũguo rĩngĩ. Reke nduĩke ta ũmwe wa andũ arĩa wandĩkĩte.”’
20 Nĩ ũndũ ũcio agĩũkĩra agĩthiĩ kũrĩ ithe. Na arĩ o haraya ithe akĩmuona, akĩringwo nĩ tha, akĩhanyũka, akĩmũhĩmbĩria* na akĩmũmumunya na wendo muororo.
21 Nake mũriũ ũcio akĩmwĩra, ‘Baba, nĩ njĩhĩirie igũrũ na ngakwĩhĩria.+ Ndiagĩrĩirũo gwĩtwo mũrũguo rĩngĩ.’
22 No ithe akĩra ngombo ciake atĩrĩ, ‘Rehei narua kanjũ ĩrĩa njega mũno, mũmũhumbe, na mũmwĩkĩre mbete guoko na mũmwĩkĩre iratũ!
23 Mũcoke mũrehe njaũ ĩrĩa norie, mũmĩthĩnje tũrĩe na tũkũngũĩre,
24 nĩ gũkorũo mũriũ ũyũ wakwa ararĩ mũkuũ no rĩu nĩ acokete muoyo;+ nĩ arorĩte no rĩu nĩ onekete.’ Nao makĩambĩrĩria gũkũngũĩra.
25 “Hĩndĩ ĩyo mũrũwe ũrĩa mũkũrũ aarĩ mũgũnda, na rĩrĩa aacokire na agĩkuhĩrĩria mũciĩ, akĩigua andũ makĩina nyĩmbo magĩthũngũthaga.
26 Nĩ ũndũ ũcio agĩta ndungata ĩmwe akĩmĩũria ũrĩa gwathiaga na mbere.
27 Nayo ĩkĩmwĩra, ‘Mũrũ wa nyũkwa nĩ okire, nake thoguo athĩnja njaũ ĩrĩa norie tondũ amwamũkĩrire arĩ na ũgima mwega wa mwĩrĩ.’*
28 No we akĩrakara na akĩrega kũingĩra thĩinĩ. Nake ithe akiuma nja akĩambĩrĩria kũmũthaitha.
29 Agĩcokeria ithe akĩmwĩra ũũ, ‘Atĩrĩrĩ, ngoretwo ngĩkũrutĩra wĩra mĩaka ĩno yothe na ndirĩ ndagarara watho waku o na riita rĩmwe, no niĩ ndũrĩ wahe kabũri o na rĩ nĩguo ngenere hamwe na arata akwa.
30 No o na ihenya hĩndĩ ĩrĩa mũrũguo ũyũ akinya, o ũyũ waanangire* indo ciaku na ahũũri maraya, wamũthĩnjĩra njaũ ĩrĩa norie.’
31 Nake ithe akĩmwĩra, ‘Mũrũ wakwa, ũkoretwo hamwe na niĩ hĩndĩ ciothe, na indo iria ciothe ndĩ nacio nĩ ciaku.
32 Nĩ twagĩrĩirũo gũkũngũĩra na gũkena, nĩ gũkorũo mũrũ wa nyũkwa nĩ arakuĩte na rĩu nĩ acokete muoyo; nĩ arorĩte no rĩu nĩ onekete.’”
Tũũhoro twa magũrũ-inĩ
^ Rora Ũhoro Muongerere B14.
^ Rora Ũhoro Muongerere B14.
^ Rora Ũhoro Muongerere B14.
^ Kana “atumia arĩa arata ake.”
^ Kana “ũitangi.”
^ Ũkk., “akĩmũgwĩra ngingo.”
^ Kana “arĩ mũgima.”
^ Ũkk., “watamburire.”
