Macakaya 2:1-22
א [Aleph]
2 Kaĩ Jehova nĩ ahumbĩrĩte mwarĩ wa Zayuni na itu rĩa marakara make-ĩ!
Nĩ agũithĩtie ũthaka wa Isiraeli kuuma igũrũ akaũharũrũkia thĩ.+
Ndaririkanĩte gaturũa ka magũrũ make+ mũthenya wa marakara make.
ב [Beth]
2 Jehova nĩ ameretie ciikaro ciothe cia Jakubu ategũcicaĩra.
Nĩ amomorete kũndũ kũrĩa kũrĩ na ũgitĩri kwa mwarĩ wa Juda nĩ ũndũ wa marakara make.+
Nĩ agũithĩtie na agaconorithia ũthamaki+ o na anene ake.+
ג [Gimel]
3 Nĩ atinĩtie hinya wothe wa* Isiraeli nĩ ũndũ wa marakara make mahiũ.
Eeheririe guoko gwake kwa ũrĩo hĩndĩ ĩrĩa thũ yakuhĩrĩirie,+Na thĩinĩ wa Jakubu aaikaraga agĩakanaga ta mwaki ũrĩa wacinire indo ciothe iria ciaũthiũrũrũkĩirie.+
ד [Daleth]
4 Nĩ ahaarĩirie* ũta wake o ta thũ; guoko gwake kwa ũrĩo nĩ kwĩhaarĩirie o ta arĩ thũ;+Aaikaraga akĩũragaga arĩa othe meeriragĩrio nĩ maitho.+
Na agĩitũrũra mang’ũrĩ make o ta mwaki+ thĩinĩ wa hema ya mwarĩ wa Zayuni.+
ה [He]
5 Jehova nĩ atuĩkĩte o ta thũ;+Nĩ ameretie Isiraeli.
Nĩ ameretie nyũmba ciake ciothe iria ndaya na igũrũ;Nĩ anangĩte kũndũ gwakuo guothe kũrĩa kũrĩ na ũgitĩri.
Na harĩ mwarĩ wa Juda agatũma kĩrĩro na macakaya cingĩhe.
ו [Waw]
6 Nĩ ekĩte gĩthũnũ gĩake maũndũ ma ũhinya,+ o ta kanyũmba karĩ mũgũnda-inĩ.
Nĩ aniinĩte* gĩathĩ gĩake.+
Jehova nĩ atũmĩte gĩathĩ o na thabatũ iriganĩre thĩinĩ wa Zayuni,Na nĩ anyararĩte mũthamaki o na mũthĩnjĩri-Ngai nĩ ũndũ wa marakara make mahiũ.+
ז [Zayin]
7 Jehova nĩ aregete kĩgongona gĩake;Nĩ atiganĩirie handũ hake harĩa hatheru.+
Nĩ aneanĩte thingo cia nyũmba cia Zayuni iria ndaya na igũrũ irĩ na ũgitĩri guoko-inĩ gwa thũ.+
Nĩ cianĩrĩire na mũgambo mũnene irĩ thĩinĩ wa nyũmba ya Jehova,+ o ta arĩ mũthenya wa gĩathĩ.
ח [Heth]
8 Jehova nĩ atuĩte itua rĩa kwananga rũthingo rwa mwarĩ wa Zayuni.+
Nĩ atambũrũkĩtie rũrigi rwa gũthima.+
Ndagirĩrĩirie guoko gwake gũtikarehe mwanangĩko.*
Na nĩ atũmĩte rũirigo na rũthingo icakae.
Nĩ ciagithĩtio hinya irĩ hamwe.
ט [Teth]
9 Ihingo ciake nĩ irikĩrĩte na thĩ.+
Nĩ anangĩte na akoinanga mĩgamba yake.
Athamaki ake o na anene ake marĩ gatagatĩ-inĩ ka ndũrĩrĩ.+
Gũtirĩ na watho;* o na anabii ake mationaga cioneki kuuma kũrĩ Jehova.+
י [Yod]
10 Athuri* a mwarĩ wa Zayuni maikarĩte thĩ makirĩte.+
Nĩ mehurĩirie rũkũngũ mĩtwe-inĩ yao na makehumba nguo cia makũnia.+
Airĩtu gathirange a Jerusalemu nĩ mainamĩtie mĩtwe yao thĩ.
כ [Kaph]
11 Maitho makwa nĩ manogete nĩ ũndũ wa gũita maithori.+
Mara makwa marĩ* na ruo.
Ini rĩakwa rĩitĩtwo thĩ nĩ ũndũ wa kũgwa kwa mwarĩ wa* andũ akwa,+Nĩ ũndũ wa ciana na tũkenge tũrĩa tũraringĩkĩra ihaaro-inĩ cia mũingĩ cia taũni.+
ל [Lamed]
12 Cikaraga ikĩũragia manyina atĩrĩ, “Ngano* na ndibei irĩ kũ?”+
O ikĩringĩkaga ta mũndũ ũgurarĩtio ihaaro-inĩ cia mũingĩ cia itũũra,Muoyo wacio ũgĩthiraga irĩ moko-inĩ ma manyina.
מ [Mem]
13 Nĩ kĩĩ ingĩhũthĩra kĩrĩ ta mũira,Kana ingĩkũhaanania na kĩĩ, wee mwarĩ wa Jerusalemu?
Ingĩkũringithania na kĩĩ, nĩguo ngũũmĩrĩrie, wee mũirĩtu gathirange wa Zayuni?
Nĩ gũkorũo nguraro yaku nĩ nene o ta iria.+ Nũũ ũngĩhota gũkũhonia?+
נ [Nun]
14 Cioneki iria anabii aku maakuonagĩra ciarĩ cia maheeni na cia tũhũ,+Na matiaguũririe mahĩtia maku nĩguo magirĩrĩrie ndũgatahwo,+No maaikaraga magĩkuonagĩra cioneki cia maheeni na cia kũhĩtithia.+
ס [Samekh]
15 Andũ arĩa othe marahĩtũkĩra barabara-inĩ makũhũũragĩra hĩ na kĩnyũrũri.+
Mahuuhaga mĩrũri magegete+ na makainia mĩtwe yao nĩ ũndũ wa mwarĩ wa Jerusalemu makoiga atĩrĩ:
“Ĩ rĩrĩ nĩrĩo itũũra rĩrĩa andũ mooigaga, ‘Ũthaka warĩo nĩ mũkinyanĩru, na nĩrĩo gĩkeno gĩa thĩ yothe’?”+
פ [Pe]
16 Thũ ciaku ciothe nĩ ciathamĩtie kanua nĩ ũndũ waku.
Ihuuhaga mĩrũri na ikahagarania magego ikoiga ũũ: “Nĩ tũmũmeretie.+
Ũyũ nĩguo mũthenya ũrĩa tũtũire twetereire!+ Nĩ mũkinyu, na nĩ tũwonete!”+
ע [Ayin]
17 Jehova nĩ ekĩte ũndũ ũrĩa aabangĩte;+ nĩ ahingĩtie uuge wake,+Ũrĩa aathanire tene.+
Amomorete ategũcaĩra.+
Nĩ atũmĩte thũ ĩgũthekerere; nĩ atũũgĩrĩtie hinya wa* arĩa magũũkagĩrĩra.
צ [Tsade]
18 Ngoro ya andũ nĩ ĩkaĩire Jehova, wee rũthingo rũrũ rwa mwarĩ wa Zayuni.
Maithori nĩ manyũrũrũke o ta karũũĩ mũthenya na ũtukũ.
Ndũkahurũke, ndũkareke riitho rĩaku rĩhurũke.*
ק [Qoph]
19 Arahũka! Anĩrĩra na mũgambo mũnene ũtukũ, kĩambĩrĩria-inĩ kĩa matuanĩra* ma ũtukũ.
Itũrũra ngoro yaku ta maĩ mbere ya ũthiũ wa Jehova.
Mwambararĩrie moko nĩ ũndũ wa mĩoyo ya ciana ciakuO icio iraringĩkĩra kona-inĩ ciothe cia barabara* nĩ ũndũ wa ng’aragu.+
ר [Resh]
20 Ta rora wee Jehova, ũrore mũndũ ũrĩa wee ũherithĩtie na njĩra nene ũguo.
Hihi atumia nĩ magĩrĩirũo gũthiĩ na mbere kũrĩa rũciaro rwao* ene, ciana ciao iria maciarĩte irĩ na ũgima mwega wa mwĩrĩ,+Kana hihi athĩnjĩri-Ngai na anabii nĩ magĩrĩirũo kũũragĩrũo handũ harĩa hatheru ha Jehova?+
ש [Shin]
21 Kamwana kanini o na mũthuri mũkũrũ makomete thĩ marĩ akuũ barabara-inĩ.+
Airĩtu* akwa o na anake akwa nĩ moragĩtwo na rũhiũ rwa njora,+Nĩ ũũraganĩte mũthenya-inĩ waku wa marakara; ũthĩnjanĩte ũtegũcayanĩra.+
ת [Taw]
22 Wĩtĩte maũndũ ma kũrehe guoya kuuma mĩena yothe, o ta ũrĩa wĩtanaga mũthenya wa gĩathĩ.+
Mũthenya wa mang’ũrĩ ma Jehova, gũtirĩ mũndũ wetharire kana akĩhonoka;+Arĩa ndaciarire* na ngĩrera, nĩ maniinĩtwo nĩ thũ.+
Tũũhoro twa magũrũ-inĩ
^ Ũkk., “rũhĩa o ruothe rwa.”
^ Ũkk., “arangĩte.”
^ Kana “anangĩte.”
^ Ũkk., “gũtikamerie.”
^ Kana “ũrutani.”
^ Athuri arĩa meehokeirũo maũndũ.
^ Kana “Thĩinĩ wakwa kũrĩ.”
^ Icio nĩ ciugo cia kũgerekania, hihi cia kuonania tha kana ũcayanĩri.
^ Kana “Cairi.”
^ Ũkk., “rũhĩa rwa.”
^ Ũkk., “mwarĩ wa riitho rĩaku ahurũke.”
^ Ituanĩra rĩmwe nĩ kĩndũ mathaa mana.
^ Ũkk., “mũtwe-inĩ wa barabara ciothe.”
^ Kana “maciaro mao.”
^ Kana “Airĩtu gathirange.”
^ Kana “ndaciarire marĩ na ũgima mwega wa mwĩrĩ.”
