Malaki 2:1-17
2 “Na rĩu inyuĩ athĩnjĩri-Ngai-rĩ, rĩathani rĩrĩ nĩ rĩanyu.+
2 Mũngĩrega gũthikĩrĩria na kũiga ũhoro wa kũgoocithia rĩĩtwa rĩakwa ngoro-inĩ,” ũguo nĩguo Jehova mũnene wa ita ekuuga, “nĩ ngaamũtũmĩra kĩrumi,+ na nĩ ngaagarũra irathimo cianyu ituĩke irumi.+ Ti itherũ, nĩ ngarũrĩte irathimo igatuĩka irumi, tondũ mũtiraiga ũhoro ũcio ngoro-inĩ.”
3 “Atĩrĩrĩ, nĩ ũndũ wanyu, nĩ ngaananga* mbegũ cianyu iria ihandĩtwo,+ na nĩ ngaamũminjĩria taatha mothiũ manyu, taatha ũcio wa ciathĩ cianyu; na nĩ mũgaakuuo mũtwarũo harĩ guo.*
4 Hĩndĩ ĩyo nĩ mũkaamenya atĩ ndĩmũheete rĩathani rĩrĩ nĩguo kĩrĩkanĩro gĩakwa na Lawii gĩthiĩ na mbere,”+ ũguo nĩguo Jehova mũnene wa ita ekuuga.
5 “Kĩrĩkanĩro gĩakwa hamwe nake kĩarĩ kĩa muoyo na thayũ, o icio ndamũheire hamwe na guoya.* Nĩ aanjĩtigagĩra, ti itherũ, nĩ aaheete rĩĩtwa rĩakwa gĩtĩo kĩnene.
6 Watho* wa ũhoro wa ma warĩ kanua-inĩ gake,+ na gũtirĩ ũndũ ũtarĩ wa ũthingu woonekire mĩromo-inĩ yake. Aatwaranaga hamwe na niĩ arĩ na thayũ na ũrũngĩrĩru,+ na nĩ aagarũrire andũ aingĩ kuuma mahĩtia-inĩ.
7 Nĩ gũkorũo mĩromo ya mũthĩnjĩri-Ngai yagĩrĩirũo kũgitĩra ũmenyo, na andũ magĩrĩirũo gũcaria watho* kuuma kanua-inĩ gake+ tondũ nĩwe mũtũmwo wa Jehova mũnene wa ita.
8 “Ĩndĩ inyuĩ ene nĩ mũgarũrũkĩte mũgatiga njĩra. Nĩ mũtũmĩte andũ aingĩ mahĩngwo ũhoro-inĩ wĩgiĩ watho.*+ Nĩ mũthũkĩtie kĩrĩkanĩro kĩa Lawii,”+ ũguo nĩguo Jehova mũnene wa ita ekuuga.
9 “Nĩ ũndũ ũcio nĩ ngaatũma mũnyararũo na mũconorithio mbere ya andũ othe, tondũ mũtiarũmĩrĩire njĩra ciakwa no mwarĩ na mũthutũkanio ũhoro-inĩ wĩgiĩ kũhũthĩra watho.”+
10 “Na githĩ ithuothe tũtirĩ a ithe ũmwe?+ Na githĩ tũtiombirũo nĩ Ngai ũmwe? Nĩ kĩĩ gĩgĩtũmaga tũkorũo tũtarĩ ehokeku mũndũ na ũrĩa ũngĩ,+ tũgathahia kĩrĩkanĩro kĩa maithe maitũ ma tene?
11 Juda nĩ ekĩte maũndũ matarĩ ma wĩhokeku, na ũndũ ũrĩ magigi nĩ wĩkĩtwo thĩinĩ wa Isiraeli na thĩinĩ wa Jerusalemu; nĩ gũkorũo Juda nĩ athahĩtie ũtheru wa* Jehova,+ ũrĩa We endete, na nĩ oete mwarĩ wa ngai ng’eni atuĩke mũhiki wake.+
12 Jehova nĩ akaaniina mũndũ o wothe wĩkaga ũguo ehere hema-inĩ cia Jakubu, o na angĩkorũo arĩ ũ,* o na gũtuĩka nĩ arutagĩra Jehova mũnene wa ita igongona.”+
13 “Na nĩ kũrĩ ũndũ ũngĩ* mwĩkaga, ũrĩa ũtũmaga kĩgongona kĩa Jehova kĩhumbĩrũo nĩ maithori na kĩrĩro na gũcaya, nĩkĩo atatindanagĩra na igongona rĩrĩa mũrutaga kana agetĩkĩra kĩndũ o gĩothe kuuma guoko-inĩ kwanyu.+
14 Na inyuĩ muugaga atĩrĩ, ‘Nĩkĩ hihi?’ Nĩ tondũ Jehova nĩ atuĩkĩte mũira gatagatĩ gaku na mũtumia wa wĩthĩ waku, o ũcio wagĩte kwĩhokeka harĩ we, o na gũtuĩka nĩ mũthiriti waku na mũtumia waku kũgerera kĩrĩkanĩro.*+
15 No nĩ harĩ ũmwe ũteekire ũguo, tondũ aarĩ na roho ũrĩa watigarĩte. Na hihi ũcio nĩ kĩĩ aacaragia? Aacaragia mbeũ ya* Ngai. Nĩ ũndũ ũcio, mwĩmenyagĩrĩrei ũhoro-inĩ wĩgiĩ roho wanyu, na ndũgekage mũtumia wa wĩthĩ waku maũndũ matarĩ ma wĩhokeku.
16 Nĩ gũkorũo nĩ thũire* ndigano,”+ ũguo nĩguo Jehova Ngai wa Isiraeli ekuuga, “na ngathũũra ũrĩa ũhumbagĩra nguo yake na ũhinya,”* ũguo nĩguo Jehova mũnene wa ita ekuuga. “Mwĩmenyagĩrĩrei ũhoro-inĩ wĩgiĩ roho wanyu, na mũtigekage maũndũ matarĩ ma wĩhokeku.+
17 “Nĩ mũnogetie Jehova na ciugo cianyu.+ No muugaga atĩrĩ, ‘Tũmũnogetie na njĩra ĩrĩkũ?’ Na njĩra ya kuuga ũũ, ‘Mũndũ o wothe wĩkaga maũndũ moru nĩ mwega maitho-inĩ ma Jehova, na nĩ amũkenagia,’+ kana na njĩra ya kuuga ũũ, ‘Ngai wa kĩhooto arĩ ha?’”
Tũũhoro twa magũrũ-inĩ
^ Ũkk., “ngaakũũma.”
^ Hau nĩ harĩa taatha ũrĩa woimanaga na magongona waikagio.
^ Kana “gĩtĩo.”
^ Kana “Ũrutani.”
^ Kana “ũrutani.”
^ Kana hihi, “kũgerera ũrutani wanyu.”
^ Kana hihi, “handũ harĩa hatheru ha.”
^ Ũkk., “mũndũ ũrĩa warahũkĩte na mũndũ ũrĩa ũcokagia.”
^ Ũkk., “wa kerĩ.”
^ Kana “mũtumia waku kũringana na watho.”
^ Kana “rũciaro rwa.”
^ Ũkk., “nĩ athũire.”
^ Kana “ũrĩa wĩkaga maũndũ ma ũhinya.”
