Ũhoro Mwega Ũrĩa Waandĩkirũo nĩ Mariko 4:1-41
4 Agĩcoka akĩambĩrĩria kũrutana o rĩngĩ arĩ rũteere-inĩ rwa iria, na kĩrĩndĩ kĩnene mũno gĩkĩũngana hakuhĩ nake. Nĩ ũndũ ũcio akĩhaica gatarũ na agĩikara thĩinĩ wako haraihu hanini kuuma rũteere-inĩ rwa iria, no kĩrĩndĩ gĩothe kĩarĩ rũteere-inĩ rwa iria.+
2 Akĩambĩrĩria kũmaruta maũndũ maingĩ na njĩra ya ngerekano,+ na rĩrĩa aamarutaga akĩmeera ũũ:+
3 “Thikĩrĩriai. Atĩrĩrĩ, mũhuri nĩ aathiire kũhura mbeũ.+
4 Na rĩrĩa aahuraga, mbeũ imwe ikĩgwa mũkĩra-inĩ wa njĩra, na nyoni igĩũka igĩcirĩa.
5 Ingĩ ikĩgwa kũndũ kũrĩ mahiga, kũrĩa gũtaarĩ na tĩri mũingĩ, na ikĩmera narua tondũ tĩri ũcio ndwarĩ mũriku.+
6 No rĩrĩa riũa rĩaarire, ikĩhĩa na ikĩũma tondũ itiarĩ na mĩri.
7 Mbeũ ingĩ ikĩgwa mĩigua-inĩ, nayo mĩigua ĩyo ĩkĩneneha ĩgĩcihatĩka, nacio ikĩaga maciaro.+
8 No ingĩ ikĩgwa tĩri-inĩ ũrĩa mwega, igĩkũra na ikĩingĩha, ikĩambĩrĩria kũgĩa maciaro, nacio ciaciaraga maita 30, 60, na maita 100 makĩria.”+
9 Agĩcoka akĩongerera ũũ: “Ũrĩa ũrĩ matũ ma kũigua, nĩ aigue.”+
10 Na rĩrĩa aarĩ wiki, arĩa maarĩ nake hamwe na arĩa Ikũmi na Erĩ makĩambĩrĩria kũmũũria ũhoro wa ngerekano icio.+
11 Akĩmeera atĩrĩ: “Inyuĩ nĩ mũtaũkĩirũo nĩ hitho ĩrĩa theru+ ĩgiĩ Ũthamaki wa Ngai, no harĩ andũ arĩa marĩ nja maũndũ mothe maikaraga marĩ ngerekano,+
12 nĩgetha atĩ o na marora matikone, na o na maigua matigataũkĩrũo; na matikanagarũrũke nĩguo moherũo.”+
13 Ningĩ akĩmeera ũũ: “Angĩkorũo mũtirataũkĩrũo nĩ ngerekano ĩno-rĩ, mũngĩtaũkĩrũo atĩa nĩ ngerekano iria ingĩ ciothe?
14 “Mũhuri ahuraga kiugo kĩa Ngai.+
15 Na rĩrĩ, aya nĩo mbeũ iria ciarĩ mũkĩra-inĩ wa njĩra harĩa kiugo kĩhurĩtwo; rĩrĩa maigua kiugo, o rĩo Shaitani okaga+ akeheria kiugo kĩu kĩahurũo thĩinĩ wao.+
16 O ũndũ ũmwe na ũcio, aya nĩo mbeũ iria ciahurirũo kũndũ kũrĩ na mahiga; rĩrĩa maigua kiugo, magĩtĩkagĩra o rĩo makenete.+
17 O na kũrĩ ũguo, matikoragwo na mĩri thĩinĩ wao, no mathiaga na mbere kwa ihinda; na rĩrĩa thĩna woka kana manyarirũo nĩ ũndũ wa kiugo kĩu, o rĩmwe makahĩngĩka.
18 Ningĩ nĩ kũrĩ ingĩ ciahurirũo mĩigua-inĩ. Icio nĩ andũ arĩa maiguĩte kiugo,+
19 no mĩtangĩko+ ya mũtabarĩre ũyũ wa maũndũ* na hinya wa maheeni wa ũtonga+ na merirĩria+ ma indo iria ingĩ ciothe ikaingĩra thĩinĩ wa ngoro ciao na ikahatĩka kiugo kĩu, nakĩo gĩkaga maciaro.
20 Mũthia-inĩ, mbeũ iria ciahurirũo tĩri-inĩ ũrĩa mwega nĩ arĩa maiguaga kiugo kĩa Ngai na magakĩamũkĩra, na magaciara maciaro—maita 30, 60, na maita 100 makĩria.”+
21 Ningĩ akĩmeera: “Tawa ndũkunĩkagĩrio na gĩkabu* kana ũkaigwo rungu rwa ũrĩrĩ, kana tiguo? Githĩ ndũrehagwo nĩguo ũigĩrĩrũo mũtĩ-inĩ wa kũigĩrĩrũo matawa?+
22 Tondũ gũtirĩ ũndũ o na ũmwe mũhithe ũtakaguũrio; gũtirĩ ũndũ mũhithe biũ ũtakanĩkwo ũtheri-inĩ.+
23 Ũrĩa ũrĩ matũ ma kũigua, nĩ aigue.”+
24 Ningĩ akĩmeera atĩrĩ: “Thikĩrĩriai na kinyi maũndũ marĩa mũraigua.+ Gĩthimi kĩrĩa mũthimagĩra andũ nakĩo, nokĩo mũgaathimĩrũo nakĩo, o na nĩ mũkoongererũo.
25 Nĩ gũkorũo mũndũ o wothe ũrĩ na kĩndũ nĩ akoongererũo,+ no ũrĩa ũtarĩ kĩndũ, o na kĩrĩa arĩ nakĩo nĩ agaatunywo.”+
26 Kwoguo agĩthiĩ na mbere kuuga: “Ũthamaki wa Ngai ũtariĩ o ta rĩrĩa mũndũ ahuraga mbeũ mũgũnda.
27 Akomaga ũtukũ na agokĩra mũthenya, nacio mbeũ icio ikamera na ikaraiha—no ndoĩ ũrĩa ikũraga.
28 Tĩri guo mwene ũtũmaga igĩe na maciaro itĩna gwa itĩna, ciambaga ikaruta nguha, igacoka ikaruta igira, na marigĩrĩrio-inĩ igira icio ikagĩa na maciaro.
29 Na rĩrĩa maciaro macio makũra, akamagetha na rũhiũ rwa kũgetha tondũ hĩndĩ ya magetha nĩ nginyu.”
30 Agĩcoka agĩthiĩ na mbere kuuga: “Tũngĩringithania Ũthamaki wa Ngai na kĩĩ, kana tũngĩũtaarĩria na ngerekano ĩrĩkũ?
31 Ũtariĩ ta mbegũ ya karatarĩ,* ĩrĩa hĩndĩ ĩrĩa yahandagwo mũgũnda nĩyo yarĩ nini biũ gũkĩra mbegũ iria ingĩ ciothe thĩinĩ wa thĩ.+
32 No rĩrĩa yahandwo, ĩmeraga na ĩkaneneha gũkĩra mĩmera ĩrĩa ĩngĩ yothe ya mũgũnda na ĩkaruta honge nene, ũũ atĩ nyoni cia rĩera-inĩ* ikona handũ ha gũikara kĩĩruru-inĩ kĩaguo.”
33 Aaragia nao ũhoro wa kiugo kĩa Ngai na ngerekano nyingĩ+ cia mũthemba ũcio kũringana na ũrĩa mangĩahotire gũthikĩrĩria.
34 Gũtirĩ hĩndĩ aaragia nao hatarĩ ngerekano, no nĩ aataaragĩria arutwo ake maũndũ mothe hatarĩ andũ angĩ.+
35 Na rĩrĩa gwakinyire hwaĩ-inĩ mũthenya ũcio, akĩmeera ũũ: “Nĩ tũringei mũrĩmo ũrĩa ũngĩ wa iria.”+
36 Thutha wao kwĩra kĩrĩndĩ gĩthiĩ, magĩthiĩ nake gatarũ-inĩ, o ũguo aatariĩ, na haarĩ na tũtarũ tũngĩ twatwaranire hamwe nake.+
37 Na gũkĩgĩa kĩhuhũkanio kĩnene, namo makũmbĩ maahũũraga gatarũ magatonya thĩinĩ, nginya gatarũ kau kaarĩ hakuhĩ kũiyũrũo nĩ maĩ.+
38 No Jesu aarĩ mwena wa thutha akomeire muto. Nĩ ũndũ ũcio makĩmũũkĩria makĩmũũria: “Mũrutani, kaĩ ũtaramaka na tũrĩ hakuhĩ gũthira?”
39 Nake agĩũkĩra agĩkũũma rũhuho rũu na akĩra iria: “Hoorera na ũkire!”+ Naruo rũhuho rũgĩtiga kũhurutana na gũkĩhoorera biũ.
40 Agĩcoka akĩmoria ũũ: “Nĩ kĩĩ kĩratũma mwĩtigĩre* ũguo? O na rĩu mũtirĩ mũragĩa na wĩtĩkio o na mũnini?”
41 No makĩiyũrũo nĩ guoya mũnene, na makĩũrania atĩrĩ: “Ũyũ kũna nũũ? Nginya rũhuho na iria nĩ iramwathĩkĩra.”+
Tũũhoro twa magũrũ-inĩ
^ Kana “mahinda maya.” Rora Ũthathaũri wa Ciugo.
^ Kana “gĩkabu gĩa gũthima.”
^ Nĩ kabegũ kanini mũno konekaga mwena wa Palestina. No gakũre gatuĩke mũtĩ ũrĩ na ũraihu wa mita ta inya ũrĩ na honge.
^ Kana “nyoni cia igũrũ.”
^ Kana “mũũrũo nĩ hinya.”
