Ũhoro Mwega Ũrĩa Waandĩkirũo nĩ Mathayo 15:1-39
15 Thutha ũcio Afarisai na andĩki-watho+ magĩũka kũrĩ Jesu moimĩte Jerusalemu, makĩmwĩra atĩrĩ:
2 “Nĩ kĩĩ gĩtũmaga arutwo aku maagarare kĩrĩra kĩa athuri a mahinda ma tene? Kwa ngerekano-rĩ, matiĩthambaga* moko mbere ya kũrĩa irio.”+
3 Nake akĩmacokeria ũũ: “Nĩ kĩĩ gĩtũmaga inyuĩ mwagarare maathani ma Ngai nĩ ũndũ wa kĩrĩra kĩanyu?+
4 Kwa ngerekano-rĩ, Ngai ooigire, ‘Tĩaga thoguo na nyũkwa,’+ na ‘Ũrĩa ũkaaruma* ithe kana nyina no mũhaka oragwo.’+
5 No inyuĩ muugaga atĩrĩ, ‘Ũrĩa wothe wĩraga ithe kana nyina: “Kĩrĩa gĩothe ingĩgũteithia nakĩo nĩ kĩheo kĩamũrĩirũo Ngai,”+
6 ndarabatara gũtĩa ithe o na hanini.’ Kwoguo nĩ mwagithĩtie kiugo kĩa Ngai kĩene nĩ ũndũ wa kĩrĩra kĩanyu.+
7 Inyuĩ hinga ici, Isaia nĩ aarathire wega igũrũ rĩanyu, rĩrĩa ooigire ũũ:+
8 ‘Andũ aya maheaga gĩtĩo na mĩromo yao no ngoro ciao irĩ kũraya na niĩ.
9 Ũthathaiya ũrĩa maheaga nĩ wa tũhũ, nĩ gũkorũo marutanaga maathani ma andũ marĩ ta morutani.’”+
10 Nĩ ũndũ ũcio agĩta kĩrĩndĩ hakuhĩ nake agĩkĩra atĩrĩ: “Thikĩrĩriai na mũtaũkĩrũo nĩ ũndũ ũyũ wega:+
11 Ti kĩrĩa kĩingĩraga kanua ka mũndũ kĩmũthahagia, no kĩrĩa kiumaga kanua gake nĩkĩo kĩmũthahagia.”+
12 Thutha ũcio arutwo magĩũka makĩmũũria atĩrĩ: “Nĩ ũĩ Afarisai nĩ mahĩngĩkire maigua ũrĩa uugire?”+
13 Nake akĩmacokeria atĩrĩ: “Mũmera o wothe ũtahandĩtwo nĩ Awa ũrĩa ũrĩ igũrũ nĩ ũkaamunywo.
14 Tiganai nao. Nĩ atongoria atumumu. Na mũtumumu angĩtongoria mũtumumu ũngĩ, eerĩ no kũgwa mangĩgwa irima.”+
15 Nake Petero akĩmwĩra atĩrĩ: “Tũtaarĩrie ngerekano ĩyo.”
16 Aigua ũguo akĩmoria: “O na inyuĩ mũtirĩ mũrataũkĩrũo?+
17 Kaĩ mũtoĩ atĩ kĩrĩa gĩothe kĩingĩraga kanua gĩthiaga nda gĩgacoka gĩkoima nja ya mwĩrĩ?*
18 No rĩrĩ, maũndũ marĩa mothe moimaga kanua makoragwo moimĩte ngoro-inĩ, na maũndũ macio nĩmo mathahagia mũndũ.+
19 Kwa ngerekano, thĩinĩ wa ngoro nĩkuo kuumaga meciria moru:+ ũũragani, ũtharia, ngomanio itagĩrĩire,* ũici, ũira wa maheeni, na irumi.
20 Maũndũ macio nĩmo mathahagia mũndũ, no mũndũ kũrĩa irio atethambĩte* moko gũtingĩmũthahia.”
21 Jesu oima kũu agĩthiĩ gĩcigo-inĩ gĩa Turo na Sidoni.+
22 Na rĩrĩ, mũtumia ũmwe Mũfoenicia kuuma gĩcigo-inĩ kĩu agĩũka akĩmũkaĩra akĩmwĩra atĩrĩ: “Njiguĩra tha, Mwathani, Mũrũ wa Daudi. Mũirĩtu wakwa nĩ aranyarirũo ũũru mũno nĩ ndaimono.”+
23 No Jesu ndaigana kũmũcokeria. Nao arutwo magĩũka na makĩambĩrĩria kũmũthaitha makĩmwĩra ũũ: “Mwĩre athiĩ tondũ wa ũguo aratũrũmĩrĩra agĩkayaga.”
24 Agĩcokia akiuga atĩrĩ: “Ndiatũmirũo kũrĩ andũ angĩ o tiga kũrĩ ng’ondu iria ciũrĩte cia nyũmba ya Isiraeli.”+
25 No mũtumia ũcio agĩkuhĩrĩria, akĩmũinamĩrĩra, akiugaga: “Mwathani, ndeithia!”
26 Nake akĩmũcokeria atĩrĩ: “Ti wega kuoya mũgate wa ciana ũikĩrie tũgui.”
27 Mũtumia ũcio akiuga: “Ĩĩ nĩguo Mwathani, no tũgui nĩ tũrĩaga rũitĩki rũrĩa rũgũaga kuuma metha-inĩ ya ene tuo.”+
28 Nake Jesu akĩmũcokeria ũũ: “Mũtumia ũyũ, wĩtĩkio waku nĩ mũnene; nĩ gwĩkĩke o ta ũguo ũrenda.” Na mwarĩ akĩhona o hĩndĩ ĩyo.
29 Jesu agĩcoka akiuma kũu, agĩthiĩ hakuhĩ na Iria rĩa Galili,+ na thutha wa kwambata kĩrĩma-inĩ agĩikara thĩ.
30 Nakĩo kĩrĩndĩ kĩnene gĩgĩũka kũrĩ we na gĩkĩmũrehera arĩa maathuaga, cionje, atumumu, bubu, na angĩ aingĩ, na gĩkĩmakomia magũrũ-inĩ make, nake akĩmahonia.+
31 Nĩ ũndũ ũcio kĩrĩndĩ gĩkĩgega rĩrĩa kĩoonire bubu makĩaria na cionje ikĩhonio na arĩa maathuaga magĩĩtwara wega na atumumu makĩona, nakĩo gĩkĩgooca Ngai wa Isiraeli.+
32 No Jesu agĩta arutwo ake akĩmeera atĩrĩ: “Nĩ ndĩraiguĩra kĩrĩndĩ gĩkĩ tha,+ nĩ ũndũ gĩkoretwo hamwe na niĩ thikũ ithatũ na gĩtirĩ na kĩndũ gĩa kũrĩa. Ndingĩenda kũmeera mainũke mahũtiĩ,* tondũ mahota kũgwa njĩra-inĩ.”+
33 No arutwo makĩmũũria ũũ: “Gũkũ na nĩ werũ-inĩ-rĩ, tũkũruta kũ mĩgate ya kũigana kĩrĩndĩ kĩnene ũũ?”+
34 Nake Jesu akĩmoria atĩrĩ: “Mũrĩ na mĩgate ĩigana?” Makĩmũcokeria: “Mũgwanja, na tũthamaki tũigana ũna.”
35 Thutha wa kwĩra kĩrĩndĩ kĩu gĩikare thĩ,
36 akĩoya mĩgate ĩyo mũgwanja na tũthamaki tũu na thutha wa gũcokia ngatho, akĩmĩenyũranga na akĩnengera arutwo ake, nao makĩgaĩra kĩrĩndĩ kĩu.+
37 Andũ othe makĩrĩa makĩhũna, na arutwo makĩũngania cienyũ iria ciatigarire ikĩiyũra ikabu* mũgwanja nene.+
38 Na rĩrĩ, arĩa maarĩire maarĩ arũme 4,000, o hamwe na atumia na ciana.
39 Na thutha wa kuugĩra kĩrĩndĩ ũhoro, agĩtonya gatarũ agĩthiĩ gĩcigo-inĩ kĩa Magadani.+
Tũũhoro twa magũrũ-inĩ
^ Gwĩtheria kũringana na watho.
^ Kana “ũgaathũũra.”
^ Kana “gĩgathiĩ kĩoro.”
^ Ũingĩ wa kiugo gĩa Kĩngiriki por·neiʹa. Rora Ũthathaũri wa Ciugo.
^ Atetheretie kũringana na watho.
^ Kana “mehingĩte.”
^ Kana “ikabu cia irio.”
